بلبل بهار فصلی گزر سنبل تری #اکبریه_صدیف_بختیاری

حالات حضرت علی اکبر (ع)

.
.
.
مرحوم حاج صدیف بختیاری
.
بلبل بهار فصلی گزر سنبل تری
تا شاخه سایبانی اولا برگ بستری
.
تاپجاق قویار ایاقینه رویون یومار گوزون
بستر دوشر او بلبله، گول، برگ اخضری
.
تر ایله سون دماغینی اول خسته بلبلون
لاله الینده، ژاله، دوتار سرخ ساغری
.
بلبل او شبنمی یم لطف نگاریدن
نوش ائیله یر سروریله باشلار هنروری
.
محو جمال و جلوۂ جانان اولوب ایدر
سمفونی طبیعت زیبایه رهبری
.
بیداد ایدر ترانه سی ماهور و شوریده
مبهوت ایدر چغانه سی، سروی، صنوبری
.
بلبل نیازیله گوله ابراز راز ایدر
گول ایلیر او بلبله نازیله دلبری
.
افسوس تز پوزار او گولون اتفاقینی
جبر زمان و جور خزان باد صرصری
.
بلبل بو سوگنامه ده لیلانی فرض ایله
گولده وجود اقدس شهزاده اکبری
.
بلبل که محو طلعت دیدار یاریدی
لیلاده چوخ سووردی اورکدن او سروری
.
اون سگیز ایل تحمل ایدوب هر مشقته
بیر سرو ناز بسله دی با مهر مادری
.
گاهی دیردی آرخام ائیلیم آی گوزل بالام
ایتدون بو چولده لیلی مسکینه یاوری
.
گاهی دیردی توک یوزه زلف سیاهوی
سد ایله سون حرارت خورشید خاوری
.
توصیف ایتمه اکبری بسدور قلم دایان
گونلن که ذرّه ایلیه بیلمز برابری
.
سن قطره سن مقابل دریای حسنده
کاهون نه حقی وار ایده کوهیله همسری
.
هر قدر حسن اکبری وصّاف وصف ایده
ئوز فهمی قدری وصف ایده جک سبط حیدری
.
شعریله نظم و نثریله اولماز مسلماً
بحر محیط حُسنده ایتمک شناوری
.
نقاش هرچه نقش برازنده نقش ایده
نقاشی وصف ایدلّه نه نقش مصوّری
.
حُسن و وجاهتی اونا لطف ایلیوب خدا
شایسته دور ثنا ایلمک حُسن داوری
.
وصف ایلین کمال علیدن گرک یازا
انسان کمالیله ایلیر قومه مهتری
.
بیر نکته سالدى طبعیمی دریای محنته
علّت او دور بو شعریمه، فرض ایتمه سرسری
.
بیر حُسن وار علیده گرک وصف ایدک اونی
اُول حسنیلن تاپوب شهدا ایچره برتری
.
ایمانه باخ عقیدیه باخ دینه باخ اوگون
مشعوف قیلدی قلب امام مطهّری
.
آماده سن دیوم سنه اول هانسی حسندور
شاد ائتدی قلب شاه شهیدانی سوزلری
.
آتلار گلیب قولاق با قولاق بین راهیده
آلمیش ارایه اکبر و قاسم او سروری
.
بیر هوش آپاردی حضرتی دیسگیندی خوابیدن
چون زعفران سارالدی اونون رنگ احمری
.
اوّل بویوردی جمله یارانمش ئولر صورا
یوخ حول و قوّه غیر خدا اولدی ازبری
.
اکبر ادبله عرض ایله دی خیر اولا بابا
ایتسون اوزاق او قلبدن الله تکدّری
.
حضرت بویوردی بین زمین و زمان بالا
بیر صوت گلدی هاتف غیبیدی مصدری
.
بو کاروان دیدی ئولومون سمتنه گیدور
ایلیر قضا بو جمع پریشانی رهبری
.
عرض ایله دی بابا بیزیلن حق دگول مگر
سنسن سپهر معدلتون مهر انوری
.
فرمایش ایتدی حق بیزیلن دور محقّقاً
احیای حقدی نیّتیمیز دادگستری
.
سوز بوردادور امامه علی بر سبیل عشق
بیر سوز دیدی تکان بدى اول عشق مظهری
.
اکبر دیدی نه غصّه سی حق اوسته ئولمه گین
حق اوسته ئولمه گین بیزه وار فخر و برتری
.
هر نه یازیلسا آلنیمیزا راضیوخ اونا
تقدیریمیز نه اولسا خدادور مقدّری
.
ارزش تاپار او جانی که جانانه بذل اولا
گر اولماسا عَرَضى او جان یوخدی جوهری
.
حضرت تبسّم ائتدی اونون حسن درکینه
اولدی ، سهیل اخترینه ماه مشتری
.
روحیم فدا عقیدوه ایمانوه على
ای صلب پاک دُرج شرف دُرّ گوهری
.
سنسن محیط فقه ده بیر مطّلع فقیه
سنسن سپهر معرفتون سعد اختری
.
سلطان عشق عرصۀ هیجا امیرینون
سنسن حماسه خلق ایلین بیر دلاوری
.
اعدایه کاری زار ایله دون کارزاریده
گتدون بروزه خاطرۀ جنگ خیبری
.
وردون غضبله هر کیمه شمشیر شیر تک
اوزدی حیاتیدن الینی گوردی کیفری
.
بکرون باشین حضور شهه گتدون ارمغان
آتدون ایاقی آلتدا او گوی محقّری
.
عرض ایله دون بابا عطش ئولدوردی چاره قیل
گیتسه توان و تابیم اولار دشمنون جری
.
حضرت بویوردی صبر ایله سیراب ایدر اوغول
الان دوتار الینده بابون آب کوثری
.
گیتدون دوباره رزمگهه چوخ شتابیلن
گتدون دوباره ولولیه قوم کافری
.
ناگه کمین ایدوب دالیدان منقذ لعین
بیر ضربه وردی پارچالادی باشدا مغفری
.
زاغ و زغن توکولدوله شهبازین اوستونه
نیللَّه شاهبازه اگر سینسا شهپری
.
اول دسته گل سینوب داغیلوب اولدی بیر عبا
بلبل گوروب عباده گلی سرخ پرپری
.
بیر نغمه باشلادی دولوب اول دشت شوریلن
آز قالدى ناله ساقط ایده چرخ اخضری
.
.
نی تک گلوب نوایه دیدی آی جوان بالا
آی بند بندی نی مثلی دوغرانان بالا
.
من بلبل خزان زده ام سن منیم گولوم
آی گول وجودی گل کیمی پر پر اولان بالا
.
خون دلیله گول بجریب درمه دیم گولون
آغلار منیم مصیبتیمه باغبان بالا
.
سپدیم سو اشک چشمیله زلف سیاهوه
کپریک لریمله شانه لدیم مهربان بالا
.
میدان رزمه یولّادیم اکبر بو فکریلن
حُسنون گوروب ترحّم ایده کوفیان بالا
.
رحم ائتمیله سهلدی حدّن گچوب ستم
میزانیدن چیخوب بدنون الامان بالا
.
گول جسموه دگیب او قدر کارگر یارا
بیر سالم عضو یوخدی اوپم جان جوان بالا
.
قویدون منی قرا گونه سن گیدون آغ کفن
گورنه اولوبدی آغ کفنون لخته قان بالا
.
خطّ شجر باشوندا یازیب منقذ لعین
قطع ایلیوب امیدیمی خنجر وران بالا
.
طوفان أسوب داغیتدی منیم آشیانه می
اولدوم بو چولده بلبل بی آشیان بالا
.
مجنون ائدر بو نسگیلون آخرده لیلی نی
وئردون کنار نهریده لب تشنه جان بالا
.
بو ایلده «بختیاری» یازیب نوحه آغلادی
شاید ئولوم زمانی ویره ساده جان بالا
.
.
#اکبریه_صدیف_بختیاری
#اکبریه_شهادت #اکبریه
#بلبل_بهار_فصلی_گزر_سنبل_تری
#ترکی

.
.