بولمم جهت ندور ندن اولاد مرتضی #حضرت_رقیه_شوری_تبریزی

شهادت جناب رقیّه (س)
..
..
..
..
مرحوم شوری تبریزی
..
..
..
..
بولمم جهت ندور ندن اولاد مرتضی
دنیاده چوخ اولوبلا بلیّاته مبتلا
..
کرب و بلا چولونده حسینی شهید اولوب
اهل و عیالی اولدی گرفتار اشقیا
..
چوخ ظلملر یتیشدى بنات پیمبره
آخر خرابه ده اولارا یر ویروب قضا
..
بیر مدّت مدید قالوبلار خرابه ده
بزم عزا قوراردیلا هر صبح و هر مسا
..
اوخشاردی لیلی اکبرینی اصغرین رباب
اما دیردی بیر بالا بس هارداسان بابا
..
هر نوعی ظلمی گوردی خواتین محترم
ظلمین نواقصینده فلک اولمادی رضا
..
آلدی فلک حریم و حرم اختیارینی
یوز ویردی اهل بیته او دم اوزگه ماجرا
..
یاتمشدیلار خرابۀ شام ایچره بیر گجه
گوردیله بیر بالا بی بی سین ایلوری ندا
..
ای عمّه دور ایاقه اماندور علاج ایله
آز قالدی روحیم عمّه وجودیمدن آیریلا
..
عمّه بویور گوروم هارا گیتدی بابام حسین
گلمیشدی بو خرابیه سلطان کربلا
..
گوردوم جمال اطهری گون تک ایشیقلانوب
بو پربلا قرانلیق ایوی ایلیوب ضیاء
..
گوردوم منی قوجاقینه آلمیشدى عمّه جان
باشیمه ال چکردی دیردی که ای بالا
..
صبر ایت قزیم بو قدر ناله ایلمه
محنت لرون تمامه یتوبدور چوخ آغلاما
..
ایگلردی گه اؤپردی گهی باغرینا باسوب
بولمم نئجولدی عمّه بابام گتدی بس هارا
..
یاندور چراغی تیز بابامی آختاروم تاپوم
اولما رضا بالا آتاسندان اولا جدا
..
عمّه اماندی من بابامی سندن ایسترم
آز قالدی غصّه دن بو قیزون اود دوتا یانا
..
گورجک بو حالی عورت اوشاق دگدی بیربیره
سسلندیلر اوجا سسیلن وا محمّدا
..
زینب دوروبدی تئز بالاسین باغرینا باسوب
فرمایش ایتدی آغلاما عمّون سنه فدا
..
نولدی گنه سنه بو قدر ناله ایلوسن
سالما جهانه غلغله ای معدن حیا
..
صبر ایت سفرده دور گلجاقدور بابان قزیم
بو داغلی سینمی بالا یاندیرما داغلاما
..
هر قدر دل دیوب بالا آرام دوتمادی
چوخ غصّه یوز ویروب او حیالی خانملارا
..
بیرهای و هوی اولدی تماماً پوزولدولار
الله بولور قارشدی بویوکلر اوشاقلارا
..
ناله سسى یتیشدی یزیدون قولاقینه
ایتدی سؤال کیمدی نه واردی گلور صدا
..
ویردی جواب او دمده غلاماندن بیری
ایستور خرابه ده باباسین خوردا بیر بالا
..
بیر حکم ایدوب او وقتیده اود ویردی عالمه
شیعه گرک بو سوزده ایده شیون و نوا
..
سویلوب آتا باشین یتورون اوز بالاسنه
یاندوردی قلب زینبی اول زادۀ زنا
..
قانلو باشی گتوردی غلامان خرابیه
زینب یتیردی عرض ایلدی هارداسان اخا
..
قارداش بالان رقیّه اؤزون ایلوری هلاک
سندن صورا اولوبدی اونون ویردی یا ابا
..
آلدی ایکی الّی قارداشنون قانلی باشنی
قویدی یوزین یوزینه اؤپوب باسدی باغرینا
..
گتدی طبقده قویدی یره سسلدی قزیم
گلدی بابان حسین دور اوتور بسدی آغلاما
..
عرض ایلیوب طعامی قزون نیلور عمّه جان
آختار بابامی هاردادی تاپ تیز گتور بورا
..
فرمایش ایتدی بو آتاوون قانلو باشیدور
مقتول ایدوب سوسوز باباوی شمر بیحیا
..
باخجاق گوروب بالا آتانون نازنین باشین
بی اختیار سویلدی کول باشیمه اولا
..
گوتدی آتا باشین بالا آلدی قوجاقینه
قویدی دوداخلارین او سوسوز گل دوداقلارا
..
عرض ایلیوب که ای شه لب تشنگان بابا
ویرانه ده بالاسنی یالقوز قویان بابا
..
اوّل بویور گوروم بابا کیم باشوی کسوب
شامون امیرینه گتوروب ارمغان بابا
..
کیم بوینوون دامارلارینی قطع ایدوب سوسوز
هاردا قالوبدی پیکرون ای مهربان بابا
..
بابا بویور گوروم منی کیم ایلیوب یتیم
ایتدی صغیر وقته منی باغریقان بابا
..
عمّم منه دیوردی بابان ایلیوب سفر
صبر ایتگلن قزیم گله جاقدور آتان بابا
..
گوردی قزون رقیّه عجب ایتمسن سفر
یوخدور داخی قایتماقوا هیچ گمان بابا
..
بولدوم نه علّته منی چوخ اینجیدوردولر
شامون یولوندا خولی و شمر و سنان بابا
..
ایمدی گورور قزون باشنا کول توکوبدیلر
سن تک آتاسین الدن آلوب کوفیان بابا
..
عمّم اگر چه بیزلره چوخ مهربانیدی
حایل اولوب ووراندا منی ساربان بابا
..
باشدان ایاقه لیک وجودیم ایدوب ورم
بسکه ووروب گلنده منی شامیان بابا
..
شامین یولون پیاده نه نحویله گلمیشم
جسمیم علیل شغلیم اولوبدور فغان بابا
..
باخ بیر بابا ایاقلاریمون گور قابارلارین
شمر و سنان و خولى الیندن امان بابا
..
آتلار دوشونده شامه کیمی گتدیلر منی
قالموب داخی بو جسمده تاب و توان بابا
..
خلخال و گوشواره می الدن آلوبدولار
طعن ایلوری گورنده منی دختران بابا
..
بابا بابا او قدر دیوبدور یانایانا
قویدی یوزون یوزینه او خاتون باوفا
..
بیر بیر تمام درد دلین ایلیوب بیان
خاموش اولوب باتوبدی نفس قطع اولوب صدا
..
زینب خیال ایدوبدی بالا یوخلیوب یاتوب
آهسته گلدی بیر بالاسین ایلیوب ندا
..
باخجاق نه گوردی سسلدی ایوای بالام ئولوب
حاضر اولون عزاسینه باشه سالون قرا
..
عورت اوشاق گلین قره واش دگدی بیربیره
بی اختیار سسلدیلر وامصیبتا
..
ایوای بالا صداسی چخوب عرش داوره
شورش دوشوب خرابیه محشردی گوئیا
..
یاخشی وسیله تاپموسان ال ساخلا شوریا
چوخ چوخ سوور بو خوردا قزین شاه کربلا
..
ویرسن قسم حسینه بو نازلو بالاسینه
محروم ایلمز نقدر حاجتون اولا
..
عرض ایتگلن قسم ویرورم نور دیده وه
اوچ حاجتیم واریمدی منیم لطف قیل آقا
..
..