نه بو محرّم اولیدی ….
.
✍️ #زبدةالاشعار ✍️
.
🆔: @nohe_torki
.
روح اله اسماعیلی
.
«بوعالمین غم واندوهی عالم عالم اولیدی
نه بومحرم اولیدی نه زینبه غم اولیدی»(1)
.
محرّمین آیی الله نه خلق اولیدی ازلدن
حسینیوه نه گلوب دهم محرم اولیدی
.
نه بیرقراچکیلیدی تمام عرشه بو آیدا
نه غرق بحرغم وغصه عرش اعظم اولیدی
.
قوناق عراقه حسینی نه کوفیان چاغیریدی
قوناق گوزینده ایشیق گون نه لیل مظلم اولیدی
.
حسینین عترتینه نه سویون یولی کسیلیدی
خجل قیامت اولونجانه نهر علقم اولیدی
.
نه شدت عطشیندن چالیدی ال ایاق اصغر
نه خردا اللری بند قماطه محکم اولیدی
.
سه شعبه تیره نه اصغرگولیدی غملی چاغیندا
باباسینا نه او گولماق مسبّب غم اولیدی
.
نه حرمله صودامر آلتی آیلیقا اوخ آتیدی
ربابه بوش بشیگی نه ئولنجه همدم اولیدی
.
نه قاسمه دوتولیدی او دشت ماریه ده توی
نه توی دا توی اتاقی حجله گاه ماتم اولیدی
.
عروسین اللرینه نه حنا او گون یاخیلیدی
حناسی قانه دونوب دیده سی نه پرنم اولیدی
.
نه اکبر اوز آناسیلان وداع ایدیدی او گونده
آنایه اوغلنون ئولماقی نه مسلّم اولیدی
.
نه نعشی اکبرینین خیمیه گلیدی عباده
نه قطعه قطعه اولونماقلیقی فراهم اولیدی
.
نه سرسپاه حسین قولّاری دوشیدی سواوسته
سومشکی پاره لنوب سرنگون نه پرچم اولیدی
.
نه اولمییدی یوزی خیمیه قیودماقا سقا
نه ذکری دیلده بغیشله منی رقیّم اولیدی
.
نه اول جلالیله زینب گلیدی کرب و بلایه
نه بیریاریم گون ایچینده جلالی برهم اولیدی
.
حسین باشین نه سوسوزسویانینداشمرکسیدی
نه ماتمینده پریشان تمام عالم اولیدی
.
یارالی قارداشینا تلّیدن باخیدی نه زینب
نه قتلگاهه طرف قاچماقا مصمّم اولیدی
.
ورا ورا باشنا قاچمییدی مقتله زینب
اوحالیده آغاروب باش نه قامتی خم اولیدی
.
قاچا قاچا نه دییدی دایان هرایه یتیشدیم
نه گوزده شمر جفاسی اونون مجسّم اولیدی
.
نه شمریلن اوچوخور یرده باشلانیدی کشاکش
نه اللری بویانوب قانه اشکی چون یم اولیدی
.
نه شمرچکمه ایاقدا چخیدی سینه شاهه
نه شه گوزینده قرانلیق تمام عالم اولیدی
.
نه اَل آتوب یاپوشیدی محاسینیندن امامین
نه خنجرین چخادانداجهان دولی چَم اولیدی
.
نه نورچشم نبی نین باشین کَسیدی قفادن
اَیاق یالین نه گَلَن کربلایه خاتم اولیدی
.
نه زینبین گوزی باش سیز جنازیه ساتاشیدی
نه گوزده گوزیاشی سایسیزیارایه مرهم اولیدی
.
نه هیچ سویِیدیله شاهین لباسینی ستم اهلی
نه خیمه گاهه قشون دولماقامنظم اولیدی
.
نه جسمی اوچ گجه گوندوزقالِیدی گونلرایوینده
نه دفن اولونماقینابیرحصیره ملزم اولیدی
.
آناسی قاتل ایوینده گیدیب نه نوحه دیِیدی
نه سَس ویرَن سسینه هاجریله مریم اولیدی
.
نولیدی گوزلریمیزبیرگوریدی حشر ایاقیندا
حسینه ظلم ایلیَنلر یری جهنم اولیدی
.
فراته نازایلِییدی اوگون کی گون علی اصغر
سوسوزدوداقلاری سیراب آب زمزم اولیدی
.
اوخردا اَللریلن بیرباغیشلادِیدی بو جمعی
شفاعته عموسی محسنیله باهم اولیدی
.
(منادی)شاداولاروحی نه خوش یازوب سوزی صافی
بوعالمین غم و اندوهی عالم عالم اولیدی
.
یقیناً ایمدیده ذکر ایلیَر مزارین ایچینده
نه بو محرّم اولیدی نه زینبه غم اولیدی
.
.
(1) استقبال از شعر مرحوم واقف سرابی یا مرحوم صافی تبریزی
.
#ورود_محرم #روح_اله_اسماعیلی
#بو_عالمین_غم_و_اندوهی_عالم_عالم_اولیدی
#ترکی
.
✍️ #زبدةالاشعار ✍️
.
🆔: @nohe_torki
نظر دهید