بو قدَر آغلاما باخدوقجا سنه اودلانوام #اصغریه_مصیبی_تبریزی

«زبانحال رباب با شش ماهه علی اصغر»
.
زبدة الاشعار

?: @nohe_torki
.
محمد علی مصیبی تبریزی
.
.

بو قدَر آغلاما باخدوقجا سنه اودلانوام
سوسوزام منده سنون تک سوسوزومدان یانورام
.
گورورم؛غمله اوغول قالمالیام
قره معجر باشیما سالمالیام
.
.
بوردا غمدن ئورگین داغلینی اوخلوللار
داغ محنتدن اوغولوای دیئنی اوخلوللار
سو سؤزین آچما کی سو ایستینی اوخلوللار
کربلا دور بورا بو توپراقی والله تانورام
.
.
گوزیوین یاشینی خون دلیمه قاتما بالا
بو قدَر آغلاما آخر منی آغلاتما بالا
دئمورم یاتگیله اصلا بو گئجه یاتما بالا
یاتما امّا ال ایاق چالما اوغول اودلانورام
.
.
بو جماعت کیمی عالمده ستم خو یوخدی
آخوری چوللره دریا بیزه بیر جو یوخدی
بیربه بیر خیمه لری گزدیم اوغول سو یوخدی
کیمه سو صحبتین آچدیم دئدی منده یانورام
.
.
بوگئجه گرچه سنون چوخدور اوغول درد و غمون
آغلا آسوده قوی آخسون یوزیوه اشک یمون
ئولمیوبدور هله صاغدور سنون عباس عمون
اودا شرمنده دی بیر جرعه سو تاپسون قانورام
.
.
منیم ای دیزلریمین قوتی وی تاج سریم
گوزلریمدن آخوری صورته خون جگریم
همّی آج همّی سوسوزسان بیلورم صودامریم
دئمه یانماقیوی بو سوز عطشده دانورام
.
.
ال ایاق چالما گل آغلاتما اوغول مادریوی
یالواریم من کیمه تا دولدورا بوش ساغریوی
یوخدی چارم ائدورم بند طناب اللریوی
ذهنیمه هر نه گلور چاره سیزم تولانورام
.
.
اوچ گئجه گوندوز اولور کی بالا خواب ایله موسن
دئمورم دیلسیز اوغول فکر رباب ایله موسن
من کی هئچ عمه لری دیده پرآب ایلموسن
یوزلریندن اولارین سرّ ضمیرین آنورام
.
.
باسمیشام باغریما جان تک بو سارالمیش یوزیوی
حسرتیم آرتوری گورجاق سووا حسرت گوزیوی
سینه می یاره لمه زحمته سالما ئوزیوی
قوریوب بوشدی بو سینه دئمه آز غم سانورام
.
.
سارالان رنگیوه قربان منه ای راحت جان
وئرمیشم بیر نئچه پیکانه بو سینمده مکان
قوی دیوم هانسی اوخا سینۀ زاریمدی نشان
بو فراتین سولی پیکانلارینا اوخلانیرام
.
.
دوشه هر درده « مُصَیـّب» گتورر یوز قاپیوا
نیتین پاک ائلیر تا کی گله دوز قاپیوا
یازار آغلار سورونر هر گئجه گوندوز قاپیوا
بی ریا بنده دی آغلار گوزی واردی تانورام
.
#سبک_یارالی_جان_یارالی (بیش از 4 سبک شامل سبکهای کربلا منتظر ماست (با واگیر) … شهریاریمسن آقا …. )
پخش‌کننده صوت

?: @nohe_torki