بو گجه حالون ندندور چوخ پریشاندور رقیه #حضرت_رقیه_اشکی_تبریزی

زبانحال حضرت زینب (س) به حضرت رقیه (س) در خرابه
.
.
اشکی تبریزی
.
.
بو گجه حالون ندندور چوخ پریشاندور رقیّه
آغلاما چوخ ائتمه ناله آز منی یاندور رقیّه
.
.
ای اولان غم گلشنینده عندلیب پر شکسته
ایلمه بیر بیله ناله ئوز ئوزون چوخ ائتمه خسته
بو قوری توپراقلار اوسته یاتما دور گل سینم اوسته
دلده هر درد دلون وار عمّه وه آندور رقیّه
.
.
صورتون دیواره قویما گوز یاشون دوندرمه قانه
گرچه ذی حق سن وجودون اینجیدوبدور تازیانه
صبر ایله اما گتورمه آل آطهاری فغانه
غصّه دن دللر بولورسن غنچه تک قاندور رقیّه
.
.
قطره قطره در اشکون توکمه گوزدن گل عذاره
سوز آهیله یانقلی قلبیمه وورما شراره
سن بولورسن عمّن ئولسون بی کسم یوخ الده چاره
غملو عمّونده سنون تکه دیده گریاندور رقیّه
.
.
پوزقون احوالون گورنده وار یری شام اهلی یانسون
سس سسه وئرسونله یکسر ناله افلاکه دایانسون
قورخورام سن آغلیاندا خرداجا قزلار اویانسون
شیون آل رسوله نالن عنواندور رقیّه
.
.
ای دُر گنج ملاحت گوهر دریای عفّت
چکموسن کرب و بلادن شامه تک بیحد مصیبت
ضربت سیلی یوزونده یوخسا ایلور چوخ اذیت
یاتموسان توپراقلار اوسته شغلون افغاندور رقیّه
.
.
هانسی شهزاده سنون تک گوردی بو رنج و ملالی
آج سوسوز یورقون خرابه منزلی باشی قرالی
تازیانه کعب نیزه ایلیه جسمین یارالی
حالوه ئوز حالیم الده یاخشی میزاندور رقیّه
.
.
آغلاما یاندیم آز آغلا گوزلرون زینب فداسی
آبله پاسَن سیزیلدور آغروری بیحد یاراسی
سولدوروب غم گل جمالون قالمیوب ذوق و صفاسی
گل قالار خارین الینده رسم دوراندور رقیّه
.
.
گلشن عمرون بهارین سولدوروبدور باد محنت
بو گجه گل صورتونده گورسنور آثار و علت
بیر کسه گلمور گمانیم نصف شب غربت ولایت
بیر نفر داده یتن یوخ شهر دوناندور رقیه
.
.
منزل «ابو حسینده » بیر گجه فصل زمستان
واریدی «سعدی زمان» و «اشگی» بیر جمعیله مهمان
مطلعى یازدی «حسینی» شرکتیله تاپدی پایان
یازدیران یاده سالان بو شعری «خوشخواندور» رقیه
.
.
#حضرت_رقیه #اشکی_تبریزی
#حضرت_رقیه_شهادت
#بو_گجه_حالون_ندندور_چوخ_پریشاندور_رقیه
#ترکی
#زبدةالاشعار