کوچ از کربلا
زبانحال حضرت زینب (س)
..
..
مرحوم ذهنی تبریزی
..
..
سنسن منیم قارداشیم ای باشسیز علامت سیز بدن
نه وار لباسون نه باشون معلوم ایدوم آیا ندن
ای خسرو گلگون کفن
..
..
تیترر ایاقیم گلماقا حالون منی مرعوب ایدوب
گیرم سنی ئولدوردولر کیم رختیوی مسلوب ایدوب
گر شمر دون باشون کسوب نعشون ندن منکوب ایدوب
گویا قفادن ذبح ایدوب باشون او بی رحم زَمَن
..
..
واضحدی هر کس بیر بیرین عالمده اوّلدن تانور
باشدان تانور سسدن تانور یا رختیله الدن تانور
یوخ بو علامتلر سنی زینبده مقتلدن تانور
گوردوم گیچن گون چون سنی بو قانلو گودال ایچره من
..
..
آه ای چراغ مصطفی کیملر سنی خاموش ایدوب
سویموش لباسون پیکرون قانیله اطلس پوش ایدوب
سندن آخوب بو قدر قان یا اینکه یردن جوش ایدوب
دوشدون بو قان دریاسینه یوخدور کناره بیر چکن
..
..
گُل پیکرون مستور ایدوب شمشیر و خنجر پارہ سی
کاشکی یتیدی زینبه قلبینده کی اوخ یارسی
ئوولسون باجون قارداش ندن ئولمز ندور بس چاره سی
بیرده حیات ایستر مگر بو قدر محنتلر گورن
..
..
آخر سنون بو حالتون زینبده طاقت قویمیوب
عالمده هیچ مظلوم ئولن مقتولی قاتل سویمیوب
معلوم اولان دشمن گینه جور و جفادن دویمیوب
ئولدوردولر وجهی ندور یوخدور سنی بیر دفن ایدن
..
..
چوخ ظلمیله قارداش سنی بو اهل شام ئولدوردولر
دینون بناسین یخدیلار سن تک امام ئولدوردولر
چوخ نسگل اولدی زینبه چون تشنه کام ئولدوردولر
ای سو یانیندا تشنه لب حسرتله عطشان جان ویرن
..
..
دشمن ووراندا قیزلارون اؤز زلفیمی من یولموشام
وحشت دوتوبدور جانیمی آغلار بولود تک دولموشام
چون قویمیوبدور آغلیام دشمن گلوگیر اولموشام
دیندیر منی یوخسا چیخار جانیم واریمدی چوخ محن
..
..
بیر درده سالدی بو فلک درمانینه من یتمرم
گر قویسا بو لشگر منی قالّام یانوندا گیتمرم
اؤز اختیاریمله حسین هرگز سنی ترک ایتمرم
نیلوم الیمده چاره یوخ سن مطلبه آگاهسن
..
..
شمره اسیر اولماق هارا قارداش حسین زینب هارا
جانینده یوخ بیر بوسه گه آیا قویوم من لب هارا
ذهنی دایاندور ذهنوی گور یتدی بیر مطلب هارا
یوخ مشتری بو سوزلره آز نظمه دوز دُرّ ثَمن
..
..
#کوچ_کربلا #ذهنی_تبریزی #ترکی #زبدةالاشعار
نظر دهید