حضرت زینب (ع)درجستجوی برادرش
مطلع شعر از مرحوم #دخیل
.
✍️ زبدة الاشعار ✍️
?: @nohe_torki
.
مرحوم غلامعلی باقری الهامی ( هوشی تبریزی)
.
بیر بلبلم که صحن گلستان ایتیرمشم
یا بیر گلم که بلبل نالان ایتیرمشم
حیران دولانام هر طرفه بو بلا چولون
بو چولده چونکه جانیمه جانان ایتیرمشم
.
گر چه اوزوم جهانیده بانوی عزتم
الدن گیدوب جلالیم اودور غرق حسرتم
غواص قلزم غم و اندوه و محنتم
قان لجه سنیده گوهر رخشان ایتیرمشم
.
اللر باشیمدا بو چولی دیوانه لرکیمی
حیران دولانام عاشق مستانه لرکیمی
ظلمت سرای هجریده پروانه لرکیمی
نور جمال شمع شبستان ایتیرمشم
.
قویموبدی دلده صبرون آثار آغلاماق
آخر ایدوبدی دیده می خونبار آغلاماق
راحیل تک اولوبدی منه یارآغلاماق
مصر بلاده چون مه کنعان ایتیرمشم
.
افسرده حال و ناله کنان دیده اشگبار
محزون و دلغمین و پریشان و دلفگار
یعنی بو طور عشقده بی صبر وبی قرار
محو تجلی موسی عمران ایتیرمشم
.
الدن آلوبدی لشگر عدوان جلالیمی
ایلوب زیاده دلده کی درد و ملالیمی
بلقیسه یوخدی کیمسه دسون شرح حالیمی
تالان اولان جلالی سلیمان ایتیرمشم
.
اوز جمعیمین جهاندا پریشان خیالیم
گلم نوایه نی کیمی دلدن نوالیم
زهرا عزیزی زینب باشی بلالیم
دشت بلاده شاه شهیدان ایتیرمشم
.
بیر بلبلم بو دشت غم افزادی گلستان
باد جفا اسوبدی اولوب گلشنیم خزان
پامال خاراولوبدی گلوم قالمیوب نشان
گلزار کربلاده نو گل خندان ایتیرمشم
.
چخموش الیم بو چولده امید وپناهیدن
سالّام جهانه نار محن سوز آهیدن
آهیم دلیلی واردی گچرمهر و ماهیدن
عرش وفاده نیر تابان ایتیرمشم
.
رفتاردن گوروم دوشه بو چرخ کجمدار
ایلر جهاندا عادتیدور هر عزیزی خوار
من تک ولیک یوخدی اولان محنته دچار
عزت سریرینه شه خوبان ایتیرمشم
.
یازنوحه (هوشی) زینبه قیل اشگوی سبیل
روز جزاده اَجر ویرر خالق جلیل
خوشدور دوباره ذکراولونا مطلع #دخیل
بیر بلبلم که صحن گلستان ایتیرمشم
.
#قتلگاه
#کوچ_کربلا
#بیر_بلبلم_که_صحن_گلستان_ایتیرمشم
#هوشی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید