شهادت امام حسن مجتبی (ع)
..
..
مرحوم نادری میانجی
..
..
یثربده اولان وقتده اسما دل غافل
ایچدیردی امام حسنه زهر هلال
..
..
چون زهر ستم شاه جهانه اثرایتدی
غملر آناسی زینبی تیز باخبر ایتدى
زهرا قزینی چرخ فلک خونجگر ایتدى
گوردی یخیلوب شاه زمن حالی یاماندور
عرض ایتدى اخا قلبمی یاندورما اماندور
..
..
یاتما حسنیم یرده غم و محنته قالما
دور نوگل زهرا دیزیمون طاقتین آلما
آغلار باجیوی تازه غم وماتمه سالما
دردون دیگلن روشن اولا تا منه مطلب
کیم سالدی بوحاله سنی ؟ قربان سنه زینب
..
..
فرمایش ایدوب ای باجی خلاقدی ناظر
یوخ طاقت و تابیم دَگولم دورماقا قادر
زحمتدی اگر چه باجی بیر طشت ایله حاضر
طشتی گتوروب قویدی یره زینب نالان
طشته توکولوب پاره جگر لخته قزل قان
..
..
گل سولدى یتوب ناله غم بلبله الله
توش اولدی علی سسله سی مشکله الله
دوشدی گنه زینب آدی دلدن دله الله
ووردی باشنا ناله ایدوب زینب کبرا
بیر دفعه دیدی گل قیزیوون دادینه زهرا
..
..
غم توسننی ناله ایدوب پیلدی زینب
ئولدى حسنیم سوله دى غش ایلدی زینب
وقتیکه گلوب هوشه بله سسلدی زینب
بس هاردا حسین قارداشمون گللری سولدی
کیمدور دیه گل قارداشما قارداشون ئولدى
..
..
شهری بورییوب زینب بیچاره صداسی
دربند بنی هاشمی تیترتدی، نواسی
ترسیم اولونور قلبلره حشر نماسی
عمه ، باجیلار ، قیزلاری فریاده گلوبلر
قارداشلاری ، اوغلانلاری امداده گلوبلر
..
..
اولمازدی ویرن بو خبری میر حنینه
اولاد علی دوشدی گنه شیون و شینه
یتدی بو خبر کرب و بلا شاهی حسینه
گلدی گوره قارداشنی توکدی یوزه قان یاش
حالون نجه دور سویله دئ قربان سنه قارداش
..
..
آرام و دل و جانیم آلوبسان آتام اوغلی
عالملری افغانه سالوبسان آتام اوغلی
علت نه دی بو حاله قالوبسان آتام اوغلی
کیم گلشنی پژمرده ایدوب ای گل زهرا
زلفون یولوری ناله ایدور زینب کبرا
..
..
فرمایش ایدوب ملک وطندن خبرون یوخ
صیاد سالوب شیری کمنده خبرون یوخ
جان قالمادی بیچاره حسنده خبرون یوخ
دوردوم یوخودان قامته غم خلعتی بیچدوم
چوخ تشنه ایدوم کوزه نی گوتدوم سویون ایچدوم
..
..
ایچدوم سوئی بو کوزه منی دیده تر ایتدی
یاندوردی دوداقلاریمی خونین جگر ایتدی
اولادیمی گور سمّ جفا بی پدر ایتدی
زهرین اثریندن در و دیواره دایاننام
ئوز حالیمه یوخ ، من سنون احوالیوه یاننام
..
..
صحبت چون اولوب کرب و بلا شاهینه معلوم
آلدی الینه کوزه نی عرض ایتدی او مظلوم
قوی منده ایچوم تا ایده سن تک منى مسموم
عشق اهلینه ساغر دولی پیمانه گرکدی
سندن صورا قارداش منه دنیا نه گرکدی
..
..
سسلندی حسن گل داخی فریاد ایله زینب
تیز ورطۀ غمدن منی آزاد ایله زینب
گل باجی اماندور منه امداد ایله زینب
قویما باجی سن زهری حسین قارداشیم ایچسون
لازمدی حسین قاسمه طوی خلعتی بیچسون
..
..
گل کوزه سویون ایچمه اخا زهر جفادور
قاتل سنه خنجر وطنون کرب و بلادور
مقتل سنه قارداش همان اول دشت بلادور
ای تشنه ویرن جانی بو جاندان هله گیچمه
شمر ئولدوره جکدور سنی ، گل زهری سن ایچمه
..
..
صحبت تزه دن زینبی غمدن غمه سالدی
جان اوسته حسن ، ایندی حسین قیدنه قالدی
کوزه سویونی آلدی حسیندن یره چالدی
سیندی کوزه سوئی یره آخدی جالانوبدی
زهرین اثریندن قوری یر پارچالانوبدی
..
..
باخدی یره زینب دیدی شاه زمنیم وای
دین گلشنینن لاله گلی یاسمنیم وای
وای زینبه وای قاسمه ایوای حسنیم وای
قیل چاره حسین جان گور الیم الدن اوزولدی
زهرا باغینون گلشن و گلزاری پوزولدی
..
..
ال سینه ده حضرت سورونور سم اثریندن
قان لخته لنوب طشته توکولموش جگریندن
قارداش باجی اولادی چخوبدور نظریندن
بیر یاندا حسین دورموش او باب کرم آغلار
قیزلار باجیلار ایوده کی اهل و حرم آغلار
..
بیر حاله امامی سالوب اول ریزۀ الماس
دوتموشلا امام ئلمه میش اطفال و حرم یاس
سس دوشدی گلور الده قلج حضرت عباس
آفاقه سالوب لرزه امیر عرب اوغلی
شیر غضب آلود علینون غضب اوغلی
..
..
غم کشتیسی گردابده ساحل سراغندا
سردار سپه بیر دل غافل سراغندا
عباس گزور کوچه ده قاتل سراغندا
قتلین سوروشور یثرب آرا عاملی کیمدور ؟
فریاد ایدوری قارداشمون قاتلی کیمدور ؟
..
..
درک ایتدی حسن قارداشی عباس صداسین
بسترده گلوب نالیه اول زادۀ یاسین
سسلندی حزین سسله ئوزی زبدۀ ناسین :
گل سالما منیم قلبیمی چوخ شیون و شینه
چوخ گورمه سین الله سنی قارداش بو حسینه
..
..
عباس ایشیدوب چون سسی غم کامه سی دولدی
قارداش یتیشوب قارداشلان قول بویون اولدی
افسرده گوروب قارداشنی گل کیمی سولدی
عرض ایتدى ئولونجه سنی ، عباس ئوله ایکاش
اگلش بره قوی من دولانوم باشیوه قارداش
..
..
گیتدی بابام الدن داخی قلبی کدر اولدوم
گوردوم سنون احوالیوی خونین جگر اولدوم
سن سیز تزه دن عالم آرا بی پدر اولدوم
گر قاتلی ئولدورمسم ای سرو رسالت
عباسی یقین ایله اخا ئولدورى غیرت
..
..
آغلار گوزیله نو گل زهرا دیله گلدی
فرمایش ایدوب صرصر آفت گله گلدی
گلشن پوزولوب نوبت غم بلبله گلدی
چوخ گورمه سین الله سنی بو آل عبایه
ساخلا بو اوزون قوللاریوی کرب و بلایه
..
..
اول دشت بلاده ستم کینه داشاندا
غم موجی او گون موج ایلیوب باشدان آشاندا
زینب شهدا نعشنین اوسته باش آچاندا
امداد ایده سن لیلیه اول وقته برادر
تک قالمیا تا دشمن ایچینده علی اکبر
..
..
گردابه دوشن وقته حسین موج بلاده
قویما قالا قارداشیوی یالقوز او اراده
ساخلا هنرون لازم اولار کرب و بلاده
شاه شهدا اوردا منی یاد ایده جکدی
قارداش بالاسی قاسمی داماد ایده جکدی
..
..
یاز «نادری» گلشنده کی گل رنگی سولاندا
قان لخته لنوب لخت جگر طشته دولاندا
مشگلدی خدا ، قارداشی قارداش سیز اولاندا
جان ویردی حسن زینب زارین گلی سولدی
قارداشلارا سسلندی گلون قارداشیز ئولدى
..
..
#حسنیه #نادری #حسنیه_شهادت #ترکی #زبدةالاشعار
نظر دهید