حالات حضرت رسول
شهادت حضرت رسول اکرم
.
#زبدةالاشعار
.
: @nohe_torki
.
مرحوم تائب تبریزی
.
تائید حقیله گوتوروب کلک خوش نگار
عبرت یولیله من ائدرم دفتره نگار
.
دنیای دونه باغلاما بل سفله بازدور
دل وئرمه بو دنی صفت و دونه زینهار
.
از بس دنیدی نفس دنی طبعی چوخ سُور
عالی سرشت نفسیله اولماز او سازگار
.
مین رنگیله بویانما معاشیندن أترى سن
پیشه ایله قناعتی دوت نفس خواری خوار
.
هر کسده اولسا روح قناعت عزیز اولار
اهل طمع اولان اولى ذلّتلره دچار
.
بو روزگار بوقلمونیدی چون اؤزی
یکرنگی ترک ائدوبدی اولوب رنگ سازه یار
.
وسعت وئرویدی باطله هر عهد و عصرده
ایلوب حقیقت اهلینه دنیانی تنگ و تار
.
ترک ایله رنگ رنگیله، همرنگ اولماقی
یکرنگ راه حقّى دوت اول اوردا رهسپار
.
همرنگ رنگ رنگلر اولسان جهان ده
رنگ دیانتون گئدر البتّه زینهار
.
ایتمه ئوزون هر آینه پابند خارجی
تقلید خارجیده ضرر وار چکیل کنار
.
سوء تفاهم اولماسون ای داوران عدل
کوتاه فکر ایلمیون سیز منی شمار
.
من بو ترقّیات بشردن دیمم قاچون
یوخسا ترقّیات دیانتله نفی اولار
.
تنها ترقّیاتی دوتوب آتما دینوی
دینونده اولسون ای مترقّی بزرگوار
.
توأم دیانتیله تدیّن اولا اگر
دنیا آتار بو وضعی بهشت برین اولار
.
بی دین ترقّی ایلماقون وار نه ارزشی
وورسان همین او یولدا ولو گام صدهزار
.
دینون تداومینده بیر آزدا قدم گوتور
بو سوزده واردی اهل ترقّیدن انتظار
.
قرآندا آیه نازل ائدوب ذات ذوالجلال (1)
کفار حیله سیندن اماندور قاچون کنار
.
دین دشمنیله اولمیون عالمده همصدا
قرآن دییَن یولیله گئدر مرد هوشیار
.
اُؤز دشمنوزی قادر قهّار دشمنون
یار یگانه اؤز اؤزوزه وئرمیون قرار
.
خوش دل دیوب وئره لَّه سیزه عاقبت فریب
بیر بیله دوستی سیزه مین باب درد آچار
.
ال تاپسالار همی دیل آچاللار هم ال سیزه
ایتمزله ظلم ایتماقا سیزدن فروگذار
.
تصدیق ایتمیون بو کذائی تمدنی
ایلر پیمبر مدنی اوندان احتذار
.
سن قهقراده سن نه ترقّی ده بینوا
اضلال محضدور بو ترقی بو کار و بار
.
تحریف ائدوب کتابلرین چون مسیحیان
علت او دور که ئوزلری یولدان چخوبدیلار
.
قرآنی سنده گوزله که تحریف ایلمه
ایلرسن اوندا أؤز اؤزیوی ذلّته دچار
.
قرآن اؤزی کتاب الهیدی نقصی یوخ
حکم خدادی حکمی قوانینی استوار
.
نازل اولوب پیمبر ذیشأنه بو کتاب
پیغمبرین الیله تاپوب بیله انتشار
.
قرآن یولوندا چوخ چالشوب ختم انبیا
کفّاردن گوروبدی فزون رنج و انزجار
.
گاهی ائدوبله طعن و شماتت او سروره
یولدا توکوبدولر ایاقی آتدا گاه خار
.
گاهی او عقل کُلّه جنون نسبتی وئروب
کاذب دیوبله گاه او صدّیقه آشکار
.
کفار گه وئروبله بد اخلاق لیق نشان
خُلق عظیم صاحبین ایلوبله سنگسار
.
بیر داش گلوب اوتوردی جبین منیرینه
آنّی یاریلدی سجده گهی اولدی زخمدار
.
قان آخدى باتدی قانه جمال مُنوّری
باخ صبره صبر قیلدی او سلطان بردبار
.
درگاه حىّ داوه عرض ایتدی یا رحیم
رحماً هدایت ایله که ناداندیلار بولار
.
ملّت او تاجداره اذیت ائدوب مدام
ایلوب دعا او ملّتی هر لیل و هر نهار
.
مسموم ایتدیلر نچه دفعه او سروری
آخر دوشوب ایاقدان او پیغمبر کبار
.
گلدی او فخر نوع بشر اولدی بستری
دنیانی آز قالوب ائده ترک اول بزرگوار
.
زهرایه اؤز وفاتینی اعلان ایلدی
زهرادن آلدی صحبت هجرانی اختیار
.
هجران غمین سالوب ئورگه گلدی رقته
حالی پوزولدی دولدی گوزی اولدی اشکبار
.
فرمایش ایتدی فاطمه جان بیله آغلاما
سن آغلینده من گلورم درده زینهار
.
صبر ایله آغلاما منی بیر بیله داغلاما
ای نور دیده بو باشوین چوخ بلاسی وار
.
امت آپارمیوب قاپوین احترامینی
ایتموب هله ایوینده جسارت سنه شرار
.
اود وورمیوبدیلر قاپوا یانمیوب قاپون
دیوار و در وجودیوه وئرموب هله فشار
.
سیلی گوروب یوزون هله اولموبدی نیلفام
مسمار سینه وی هله ایتمیوبدی زخمدار
.
حقّون آلینمیومدی الوندن جفائیله
من سیز اولونمیومدی سنه ظلم بی شمار
.
دوزدور که فاطمه سنی امت چوخ اینجیدر
بیر باره ده و لیک سنه بیر نوید وار
.
احضار قیلدی فاطمه نی باسدی باغرینا
دیندیردی خوش دلیله ائدوب زینت کنار
.
بیرده گتوردی قویدی دوداقین قولاقینه
آهسته سَمعینه دیدی گویا او شهریار
.
چوخ تیزلیقیله ملحق اولارسان قزیم منه
بیله پوزولما آغلاما چوخ اولما دلفگار
.
بو مژده نی آلاندا اولوب شاد فاطمه
آرام دوتدی اودلی دلینده سونوبدی نار
.
هر دم وئرردی ضعف رسول خدایه یوز
آثار مرگ اولوردی جمالینده آشکار
.
ناگه قاپو دوگولدی چخوب دیشره فاطمه
گلدی قاپو دالیندا دوروب حالتی نزار
.
فرمایش ایتدی کیمسن ارادون ندور سنون
وئردی جواب قاصدم ای معدن وقار
.
محبوبدن حبیبه واریمدور رسالتیم
ضمن عیادتیله اولار نکته آشکار
.
زهرا بویوردی باب کباریم مریضدور
ممکن دگول عیادت سلطان تاجدار
.
صوت مهیبیله دیدی وارد اولام گرک
ایتدی او صوتیله دل زهرانی بیقرار
.
چوخ مضطرب قیتدی پیمبر حضورینه
عرض ایتدی ماجرانی او محزون و دلفگار
.
فرمایش ایتدی او ملک الموت دور قزیم
ایلر او عمر رشته لرین پاره تار تار
.
زهرا او دور که یاری سالار آیری یاردن
ایستکلینین الیندن او ایستکلیسین آر
.
قارداشی قارداشیندان آتادان اؤز اوغلونی
هر بیر آنانی قزدان اودور ایلین کنار
.
هر خانمان چراغینی خاموش ائدن اودی
شمع عزا ائدن اودی ایولرده شعله بار
.
بر هم ائدن اودور هامی بیر عیش و عشرتی
عیشی پوزار هر ایوده عزا بزمی قوردورار
.
گوزده قویان اودور هامونین آرزولرین
قویماز اولا جهان ده بیر کیمسه کامکار
.
لذّتلری آلان اودی هر بیر مذاقدن
شیرینی تلخ ائدندی تاپوب صیت و اشتهار
.
هر بیر یارانمیشی اودی کیم قبض روح ائدر
باخماز گدادی، یا شه دارای اقتدار
.
باغلى دگول اونا قاپیلار وارد اولماقا
واردور یولی هامی ایوه بی نشر اِختِبار
.
ساخلار ولی سنون قاپوون احترامینی
ایستر اجازه سندن او مأمور کردگار
.
گلموش قزیم یقین منی ده قبض روح ائده
دعوت ائدوب سنون آتاوی مهربان نگار
.
بو سوزده وئردی ضعف رسول خدایه یوز
گورسندی گل یوزونده علامات احتضار
.
دوزدی جبینه قطره به قطره ئولوم ترین
یعنی که باغلورام سفر آخرتله بار
.
جان اوسته مصطفا باشی اوستونده مرتضا
قرآن اوخوردی معنی قرآنه اشگبار
.
زهرا دیردی وا أبتا شور و شینیله
گوزدن توکردی عارضینه درّ شاهوار
.
صاقدا حسن صولوندا حسین ابن فاطمه
هر تک تکی سزیلدویوب آغلاردی زار زار
.
بیر پنج تن یغشدیلا بویرده بیر یره
کرب و بلاده بیرده بو امر اولدی برگزار
.
اول ساعتی که دوشدی آتیندان حسین یره
لب تشنه دلشکسته بدن خسته زخمدار
.
الده عمامه حاضر اولوب جدی مصطفا
باشی آچوخ آتاسی علی شیر کردگار
.
مسموم زهر کینه امام حسن گلوب
زهراده خَم قدیله او دشته ائدوب گذار
.
جمع اولدولار حسین یخیلان یرده پنج تن
فریاد واحسینیله دللرده آه و زار
.
زهرا نه حاله قالدی ایا صاحب الزمان
حلق حسینی گوردی اؤپَر تیغ آبدار
.
دوزمز آنا گوره، بالا قاتل الینده دور
خاصه حسین و فاطمه، پی مطلبه آپار
.
دوشمز غلط دیسم که گوزل اللرین ائده
زهرا گوزونه حایل او پیغمبر کبار
.
تا گورمه سون او صحنۀ جانسوزی فاطمه
گورسه او حالى فاطمه نی یاندیرار یاخار
.
معناده گلدی ختم رسل مرتضا بتول
هم مجتبا حسین کیمی مظلوم روزگار
.
زینبده گلدی سس وئره زهرا آناسینا
ساز ایتدی ئوزگه صحنه او زهرایه یادگار
.
تک گلمدی گتوردی حسینون بالالارین
بیرده حسینی صاق گوره اول عدّه سوگوار
.
بی کس امامی دوره لیوبلر بیوک کچیک
گویا گُلون کنارین آلوب دستۀ هَزار
.
غمگین ترانه باشلادیلار خوش ترانه لر
حلقه ووروب او یرده عزا بزمی قوردوار
.
بیر صحنه گوردولر اونی واضح دینمرم
کشف ایتماقا او مطلبی من قیلّام اعتذار
.
واردور بوقدر هاموسی سسلندی وا حسین
فریاد و شیونیله دولوب دشت و کوهسار
.
بعضی اوشاق هراسه دوشوب یومدی گوزلرین
بعضی یانا یانا ائدوب اول عالمه نظار
.
ایش بیر یره یتشدی نه اولدی، بوقدر وار
وا عَمَّتا دیوبله او اطفال گلعذار
.
آچدی حسین تشنه جگر عاطفی گوزون
فرمایش ایتدی دورما باجی بوردا زینهار
.
گئت خیمه گاهه سن باشیم اوستونده آغلاما
دوره شماتت اهلیدی دشمنلریم باخار
.
اولام شهید عشق سوسوز کوی عشقده
قانیله ایلرم بو بیابانی لاله زار
.
من کربلانی کرب وبلا ایلرم باجی
گئت شهر شامه سنده ایله حقى آشکار
.
سجاد عابدینی آپار اوردا منبره
سفیانیانی ایتماقا رسوای روزگار
.
آل یزیده مدح علی ایلسون بیان
کابینۀ یزیدی ائده جمله تارومار
.
«تائب» چکیلدی آخر صحبت چتین یره
یازما قوتار کلاموی بَر وجه اختصار
.
طبعون گلوب تلاطمه طغیان ائدر قلم
گوزله کُمیتِ طبعِوه چوخ وئرمه اختیار
.
چوخ دولدوروبدی دفتر اعمالوی گناه
قیل اعتصام دامن معصوم هشت و چار
.
بلکه او خاطره سنی الله بغیشلیه
ایتسون جزاده اهل بهشتیله همقطار
.
.
(1)سوره ممتحنه آیات 1 و 2
.
.
#پیامبراسلام_تائب_تبریزی
#مبعث
#پیامبراسلام_شهادت
#تائید_حقیله_گوتوروب_کلک_خوش_نگار
#ترکی
.
#زبدةالاشعار
.
: @nohe_torki
نظر دهید