دئنن یازهرا …
–
–
اکبر ستاری (قیزیل قلم)
–
شاعرا باشلادین اشعاری دئنن یازهرا
ائیله سین روحِ قُدُس یاری دئنن یازهرا
ای قلم فاش ائله اسراری دئنن یازهرا
ساخلاما سینه ده گفتاری دئنن یازهرا
باشووه جمع ائله حضّاری دئنن یازهرا
بوشلا بو شهرت بازاری دئنن یازهرا
قویما الدن گئده معیاری دئنن یازهرا
متمرکز ائله افکاری دئنن یازهرا
گؤر بو گون دولت بیداری دئنن یازهرا
بلکه آسان ائده دشواری دئنن یازهرا
.
.
.
کیمدی زهرا کی اونون شأنینه نازل برکات
برکاتیندن اونون شیعه لری آلدی برات
بیر براتی کی اولوب اهل دِله باب نجات
کیم نجات ایسته سه زهراده دی یوم عرصات
عرصات عالمی محشر گونو واردیر ثمرات
ثمرات نبوی دن داخی قالماز نقمات
نقماتین یئرینه روز جزا وار حسنات
حسنات ایسته ییسن ذکر ائله قرّاء #صلوات
صلواتیله خانم فاطمه دن ایسته نجات
بو نجات ائیلییه جک دشمن بدفطرتی مات
مات و مبهوت اولاجاق پیرو هر لات و منات
نفسووین لات و مناتین ائله پژمرده صفات
بیر صفات آل کی اونون وجهینه هر دولتی سات
خضر زهرایه گؤره آلدی او گون آب حیات
درک قیل ارزش و مقداری دئنن یازهرا
.
.
.
کیمدی زهرا کی لطافت باغینین غنچه سی دیر
کیمدی زهرا کی رسالت ائوینین میوه سی دیر
کیمدی زهرا کی حجاب اهلینین آیینه‌سی‌دیر
کیمدی زهرا کی قیامت اونون عدلیّه سی دیر
کیمدی زهرا؟شجرِ طیّبه نین ریشه سی دیر
کیمدی زهرا کی فدک باغلاری ارثیه سی دیر
کیمدی زهرا کی فراتین سویو مهریّه سی دیر
کیمدی زهرا کی حیا صورت تسمیّه سی دیر
حضرت فاطمه حوری لرین اُنسیّه سی دیر
غضب و خشم خدا صورت قهریّه سی دیر
کُتُب ایچره صُحُفِ فاطمه نشریه سی دیر
کلّ سادات جهان فاطمه ذریّه سی دیر
فاطمه مٰاخلقین کوکب دُرّیّه سی دیر
ذِکر زهرا دئسین هر کیمسه اونون شیعه سی دیر
عشق اؤزو ئورگدیر اجباری دئنن یازهرا
.
.
.
او گؤزل آدینی آدم دئدی حوّاده دئدی
حال بحرانی ده گرداب بلایاده دئدی
بو آدی نوح نبی ورطه‌ی دریاده دئدی
غرق اولان وقت ده کشتیسی او غوغاده دئدی
بطن ماهی ده اونو یونس متّاده دئدی
یاخلیل الله اولوب یانماقا آماده دئدی
اود گلستان اولوب ابراهیمه زهراده دئدی
طشت زر ایچره کسیلمیش سر یحیاده دئدی
یا مُشاریله بؤلونموش زَکریّاده دئدی
باخ کلیم اللهّا گؤر حضرت موساده دئدی
رود نیل ایچره و یا سینه ی سیناده دئدی
ییغدی حوّاری لرین باشینه عیساده دئدی
قویمادی حق چکیله داره مسیحاده دئدی
اؤز آتاسی سؤزونو اُمِّ ابیهاده دئدی
شاد ائله احمد مختاری دئنن یازهرا
.
.
.
بو آدین عزتینی خالق دادار بیلیر
حرمت فاطمه‌نی احمدمختار بیلیر
رتبه و منزلتین سیّد ابرار بیلیر
گیزلین اسرارینی تک حیدرکرّار بیلیر
دئمیرم بیر سؤزو اخیاریلن احرار بیلیر
بو سؤزو پرده ی غیبتده قالان یار بیلیر
نییه گیزلیندی مزاری؟ اونو دلدار بیلیر
خانیمین دردینی میخِ در و دیوار بیلیر
یاری یانمیش قاپینین اوسته کی، مسمار بیلیر
نام زهرانی شفا هر دل بیمار بیلیر
فاطمه لطفونو هر دیده‌ی خونبار بیلیر
باب حاجت اونو هر درده گرفتار بیلیر
مدّعی لر ولی بو مطلبی دشوار بیلیر
حُبِّ زهرانی اَحبّا بیزه معیار بیلیر
او گؤزل آدینی تکراری دئنن یازهرا
.
.
.
#فاطمیه_مدح #فاطمیه
#شاعرا_باشلادین_اشعاری_دئنن_یازهرا
#قیزیل_قلم #کیمدی_زهرا
#ترکی
–
نظر دهید