تاپشیروب تا جسم زهرانی مزاره مرتضا #فاطمیه_ستار_رزاقی

شهادت حضرت زهرا (س)
.
#زبدةالاشعار
.
: @nohe_torki
.
#ستار_رزاقی
.
تاپشیروب تا جسم زهرانی مزاره مرتضا
اگلشوب قبرین کنارینده یره اول مقتدا
.
باخدی بیر ایستکلیسی زهرا یاتان قبره طرف
توکدی رخساره سرشگ حسرتین ایلوب نوا
.
بس کی پوزموشدی فراق فاطمه اول سروری
نصف شبده ذکر زهرائیله ایلوردی بکا
.
سسلنوردی ای منیم آرام جانیم فاطمه
بو یامان گونده نیه اولدون عم اوغلوندان جدا
.
دلخوشیدیم سنله هرلحظه جهان فانیده
حیف اولا گِتّدی سنیله روزگاریمدن صفا
.
تکلیقیندا بیر قوی لشگر مثالیدون منه
سنکی گِتدون قالدی حیدر بوجهاندابی قوا
.
مرتضادن عشقیله دائم حمایت ایلدون
بو مقدس یولدا چکدون روزوشب جور وجفا
.
پشت درده مندن ائوتری یارلندون ظلمیله
هیچ زمان چیخماز یادیمدان اول اسفلی ماجرا
.
سن شهامتله بو یولدا جانیوی بذل ایلدون
تا قالا دین و ولایت پرچمی دائم بپا
.
تک ائوزون یوخ محسنونده اولدی بو یولدا شهید
صبر قیلدون بیربیله آلامه بی چون و چرا
.
ظلم اشرار زمان ایتدی منی سندن خجِل
شرمسارم سندن ای آرام جان مصطفا
.
قانه دوندردی گوزومده اشگیمی درد و غمون
اولموشام تیر بلیّاته نشان صبح و مسا
.
دهریده سندن صورا قالماق چتیندور حیدره
قیل دعا منده اولوم بو دارمحنتّدن رها
.
سنله دفن ایتدی علی دار و ندارین قبریده
قالدی دنیاده کمکسیز شهریار ماسوا
.
دیزلریم گلمور دوروب قبیرین کناریندن گیدم
چوخ چتیندور یاریدن یار وفادار آیریلا
.
دودمانیم ایمدی بنزور بیر قرانلوق محبسه
هجر زهراده اولار بوندان صورا ماتم سرا
.
بوش یِئرین ایمدی گورور ایوده یتیملر آغلاشور
عرشه اوج ایلور او ماوادن گویه غملی صدا
.
ایمدی کلثومیله زینب بزم غم برپا ایدوب
حسرتیله سسلنولّر هارداسان تیز گل آنا
.
ذکر ایله زراقی بو عنوانی شعرینده مدام
حضرت زهرا .س.اولوب قربانی راه ولا
.
سنده سعی ایله ولایت سنگرین ترک ایلمه
تا سنونده دادیوه زهرا یته روز جزا
.
#فاطمیه_شهادت
#تاپشیروب_تا_جسم_زهرانی_مزاره_مرتضا
#ترکی
.
#زبدةالاشعار
.
: @nohe_torki