استقبال اهل مدینه از کاروان اهل بیت (ع)
.
.
✍️ #زبدةالاشعار ✍️
.
🆔: @nohe_torki
.
مرحوم یحیوی اردبیلی
.
تاپوب نجات ائله کی اهل بیت زنداندان
کناره چخدیلا اول شهر شام ویراندان
.
اسیرلر اولوب آزاد یوزلرینده نقاب
نه وار ایاقیده کنده نه واردو قولدا طناب
.
اوتوردی اهل حرم قاره پوش محملده
هره سینون نچه برجسته داغی وار داده
.
او حاجیان مصیبت کشیده ی ایام
قرا لباسیله مینایه باغلیوب احرام
.
قدم قدم یریور ساربانی چوخ سنگین
عزا نواسی ایله سسلدور دوه زنگین
.
اوزنگیلر سسینه توقّوشور حزین سسلر
ایکی سسون سسی بیردفعه یاحسین سسلر
.
دیار کرب و بلا ایچره بانوان حریم
مطاف شاه شهیدانه ایتدیلر تعظیم
.
مدینه سمتینه یول باشلادی قطار بلا
همان قراریله طىّ منازل ایتدیله تا
.
قالاندا بیر نچه فرسخ مدینه گورسندی
یانان اورکلره بیردن غبار غم اندی
.
امام مفترض الطاعه قافله سالار
وئروب اجازه او دم کاروانی ساخلادیلار
.
وورولدی بیر اوجا خیمه یئره به رسم عرب
کئچوب او خیمه ی مخصوصه اگلنوب زینب
.
امام عابد بیمار او سیّد رنجور
بشیری ائیلدی شهر مدینیه مامور
.
گئدوب مدینه ده خرد و کباره چکسون جار
گلور عراقه گئدن کاروان محنت بار
.
بو فکریلن که چیخان وقته شهر یثربدن
چیخوبدو عمه سی زینب جلال و شوکتلن
.
گرک مراجعتی کوچمگه مثال اولسون
اولاندا داخل شهر اوزگه بیر جلال اولسون
.
بشیر امر امامتله الده قاره علم
اوزی قرا گینوب شهر ایچینه قویدی قدم
.
امامون امرینی شهر ایچره انتشار ائلدی
او گوزلری که گوزتلردی اشکبار ائلدى
.
دیلی دییوردی گوزی آختاروردی صاق صولونی
گوزتلیوردی ابوالفضلون اوغلنون یولونی
.
رموز محنتی بیربیر آچوب عیان ائتدی
حسین آدین دیمدی زینبی بیان ائتدی
.
که ای مدینه نون اهلی بیلون اولون آگاه
قریب شهرده چادر قوروبدو آل الله
.
گلور او بانوی عصمت مریض امامیله
چیخون قباقلارینا عزّ و احترامیله
.
نئجه گیدنده یولا سالمیشدوز عزّتیلن
ورود شهر ائلیون غایت جلالتلن
.
او زینبی که گئدوب تخت زرنگاریلن
گلور مدینه سینه تیره روزگاریلن
.
گئدنده گئتمیشیدی دودمان اعلادن
ولی چیخوب گلور ایندی خرابه ماوادن
.
آپاردی وئردی مناده فدالرین گلدی
چکوبدو کوفه و شامون بلالرین گلدی
.
سالاردی محملی سایه او چرخ دوّاره
فلک کجاوه سینون اورتوگون ائدوب قاره
.
گیدون اونی گتورون وار خجالتی گلسون
آناسی فاطمیه وار امانتی گلسون
.
هر اول خانم که او خاتونی ایلیور پیشوا
یولوق یولوق ایلسون ساچلارینی پای انداز
.
طعام و سو آپارون پیشوازه فرصتدور
او خورداجا بالا قیزلار طعامه حسرتدور
.
آپارمیون قباقا شیرخواره طفل لری
دگل یانیندا ربابون او طفل صودامری
.
ادب گوزتلیون آخر عروس فاطمه دن
گلین لره قباقا چیخماقی ایدون قدغن
.
چوخ احترام ایلیون اکبرون آناسینه
فلک قویوب اونی حسرت جوان بالاسینه
.
هیچ ایستمزدی گوره لیلی دهری اکبرسیز
او بینوا نئجه گورسون بو شهری اکبرسیز
.
پیام قاصدی شهر اهلی درک ایدن ساعت
اوجالدی عرش برینه صدای وامحنت
.
مدینه شهرینون اهلی تمام خرد و کبار
اوشاق بویوک هاموسی شهردن اولوبلا کنار
.
عموماً اگنینه گئیمیشدی جامه ی ماتم
بشیر قباقه دوشوبدهور الینده قاره علم
.
یاخونلاشاندا هامی بارگاه اردویه
نقدری عورتیدی آیریلوبدو بیر سویه
.
حسین حسین سسی ائتدی عروج نُه طاقه
او طول راهده زلفلر توکولدى پراقه
.
خلاصه سوز یازورام طوله کئچمسون مطلب
قیامت ائتدی همان وقتده خانم زینب
.
مدینه اهلی حسیندن منه قالان تَرَکات
گتورمیشم سیزه بیر قانلو کوینکی سوقات
.
آچوب او کوینکی سردی ایکی دیزی اوسته
آلوب زیارت ائدن قویدی اوز گوزی اوسته
.
غرض مقدمه نی سوز یتوردی بو امره
سوزون دالین دیمورم اختیاری وئر صبره
.
واریدی محضر زین العباده بیر دسته
رجال شهردن امّا هامی ایاق اوسته
.
حضور پاک امامتده باش اگوب ناگاه
جناب جعفر طیارون اوغلی عبدالله
.
اجازه ایستدی محرم سرایه بیر گئتسون
عیالی زینبه تا تسلیت ادا ائتسون
.
به امر حضرت زین العباد ولىّ الله
مقام زینبه یوز دوندروبدو عبدالله
.
دوروب کنارده گوز یاشینی روان ائتدی
جناب زینبون اوز آدینی بیان ائتدی
.
سلام اولا سنه ای بنت مرتضی زینب
رشیده ی علوی مظهر حیا زینب
.
یارالی قلبوه بوجان ناتوان قربان
ائشیدمیشم سنی ظلم عدو سالوب جاندان
.
حضور زینب علیایه بو صدا یتدی
جوابینی او سلامون خانم ادا ائتدی
.
خمیده قامتیلن آهیلن ملالیلن
کناره چیخدی خانم خیمه دن نه حالیلن
.
او خیمه سمتینه دقتله ایلینده نگاه
بیر عورتی نظرینه گتوردی عبدالله
.
قرا لباس گیوب باشدا بیر قرا معجر
او معجر آلتدا ساچین گیزلدوب او غم پرور
.
سالوب اشاقه باشین اوندا علتی واردور
بیله مشخص اولور که خجالتی واردور
.
گئدنده زینب او زلفی قرا آپارمیشدی
مدینیه قیدنده او زلف آغارمیشدی
.
کمان کیمی بوکولوب قد و قامتی اگیلوب
جمالینه دییه سن رنگ زعفران چکیلوب
.
قیافه سینده پراکنده دور چوخ احوالی
ائله ضعیفدو یوخدور تانینمالی حالی
.
تانیمادی دئدی ای عورت غم آلوده
هانی علی قیزی خاتون ماتم آلوده
.
او بانوی حرمی ایستورم ایدم دیدار
حسین غمینده اونا تسلیت ایدم اظهار
.
چکوبدو ضجه ی جانسوز حضرت زینب
زمانه گور منی سالمیش نه صورته یارب
.
گوروم خراب اولاسان ای سپهر سفله نواز
رئیس خانه عیالین باخار گورر تانیماز
.
بو کلمهنی او خانمدان ائشیتدی عبدالله
تعجبیله دئدی لا اله الا الله
.
حسین عراقه گیدنده جلال و حشمتیلن
هاچان سنی یولا سالدیم خانم بو حالتیلن
.
او گون او زینبی که سالمیشام یولا من اوزوم
او زینب اولسون اگر کور اولا گورونجه گوزوم
.
منی باغشیلا که یوخ منده ذره ای تقصیر
بیر ایلده کیم گوروب اولسون رشیده عورت پیر
.
نه باعث اولدی بیله قامتون کمانه دونوب
خانم دئدی خبر آلما علی چراغی سونوب
.
بیر ایلدن آرتوق اولور روزگار کجرفتار
توکوبدو اوستومه دنیاده هر مصیبت وار
قیریلدی کرب و بلاده هامی جوانلاریم
گتورمیشم اوزیمیله بودور قالانلاریم
ایکی بالاندا سنون قانینه اولوب غلطان
دئدی اولاردا اوزومده حسینوه قربان
.
آغارماسون نئجه باشیم ائشیت ندور مطلب
او هندون اوغلی دئدی کَلِّمنی یا زینب
.
الونده یحیوی بو کلمه ده دایاندی قلم
کفایت ائله داخی بوندان آرتوق ایتمه رقم
.
.
#ورود_مدینه_یحیوی_اردبیلی
#تاپوب_نجات_ائله_کی_اهل_بیت_زنداندان
#ترکی
.
✍️ #زبدةالاشعار ✍️
.
🆔: @nohe_torki
نظر دهید