تا گوردی زینبون گوزی یثرب دیارینی #ورود_مدینه_نوروزی_نوین

زبانحال حضرت زینب (س) در ورود به مدینه
..
..
..
..
علی نوروزی نوین
..
..
..
..
تا گوردی زینبون گوزی یثرب دیارینی
عرشه اوجاتدی دیلده اولان آه و زارینی
..
سسلندی ای پیمبر رحمت مدینه سی
زینب گتوردی حسرتیله غم قطارینی
..
آگاه اول که زینب بی خانمان گلور
آغلار گوزیله سسلوری اوز تاجدارینی
..
واردور دیلیمده ذکر حسین باشدا شور عشق
بیر کیمسه عشقیمون ندی بولمز عیارینی
..
قارداش غمینده هر گیجه گوندوز من آغلارام
سالّام خیاله قارداشیمون روزگارینی
..
من سایه سینده دالدالاناردیم حسینیمون
خوش وقتیدیم گورنده حسینون عذارینی
..
قارداش دیوب گزردیم عجب من جلالیله
دیلدن سیلردیم عشقیله محنت غبارینی
..
باشه یتوبدی سنده اولان خوش گونوم منیم
هجران غمی آلوب بو اورک اختیارینی
..
بیر گونده یدّی قارداشیمی آلدی چرخ دون
آرتیردی گون به گون منه دنیا فشارینی
..
زهرا عزیزی زینبی غملر قوجاتدیلار
یاندیردی شامیان بو دل بی قرارینی
..
کرب و بلاده قارداشیمون سولدی گلشنی
دست جفا خزانه ویروب نوبهارینی
..
اکبر کیمی جوانی سوسوز ایتدیلر شهید
سیندیردیلار او لؤلؤ چون شاهوارینی
..
قاسمده گیتدی جنگه او گون تشنه لب ولی
توپراقه ییخدیلار حسنون یادگارینی
..
حیدر نشانی قارداشیم عباسی تشنه لب
نهر اوسته ییخدیلار او حسین جان نثارینی
..
سو اولمیوبدی اصغره اوچ گون قالوب سوسوز
میدانه تا آپاردی حسین شیر خوارینی
..
فرمایش ایتدی لشگره اول شهریار عشق
لب تشنه دور بالام گوروسوز احتضارینی
..
رحم ایلیون ویرون بیر ایچیم سو بالام یانور
سوز عطش گورورسوز آلوبدور قرارینی
..
سو ویرمیوبله اوخلادیلار گل بوغازینی
اوز قانین ایچدی یومدی او چشم خمارینی
..
شرم ایتدی قارداشیم گتوره خیمیه اونی
خرگاهیلر دالیندا قازیبدور مزارینی
..
دفن ایتدی قارداشیم بالاسین پشت خیمده
بیکس آناسینین ایلیوب ناله کارینی
..
تک قالدی قارداشیم اوزوده عزم جنگ ایدوب
هجرینده آغلادیبدی من غمگسارینی
..
آخرده شمر قارداشیمی ئولدوروب سوسوز
یاندیردی زینبین بو دل داغدارینی
..
ای یثرب ایمدی زینبی گل ایلمه قبول
قوی مسکن ایلسون بو چولون کوهسارینی
..
بو شهر گر حسین سیز اولا من قالوم نجه
سالمیم جهانه من نجه گور غم شرارینی
..
من کربلالیم وطنیمدور او دشت غم
مسکن گرکدی من ایلیم غم دیارینی
..
کرب و بلانین عاشقیدور من کیمی «نوین»
من تک حسین حسین ایلیوبدور شعارینی
..
..
..
#ورود_مدینه #نوروزی_نوین #ترکی #زبدةالاشعار