کوچ از شام
.
✍️ #زبدةالاشعار ✍️
.
🆔: @nohe_torki
.
علیرضا عباسی ( احسان تبریزی )
ترک ائدیر شامی خانم زینب مرضیه تبار
آچیلیب قید اسارت ولی یوخ دیلده قرار
چخدیلار کنج قفسدن او پریشان بالالار
دام ظلّامیدن آزاد اولوب اولاد رسول
یاسلیدی غمزده دی جمله سی محزون وملول
.
.
گر چه آزادیدیلر یکسر اوره ک داغلادیلار
گوزی یاشلی در ویرانه ده صف باغلادیلار
وای رقیه دئدیلر بیردن اولار آغلادیلار
بیری سسلوردی باجی کوی صفایه گئدیروق
خبرین یوخدی مگر کرب وبلایه گئدیروق
.
.
یوکلنوب ناقه لره توشه ی ره بار سفر
بعضی اشیاءلر اوبار ایچره وورار قلبه شرر
قانلی پیراهن ودستار علم قانلی سپر
غارت اولموشدولا سجاد آقا دشمندن آلیب
یوخدی صاحبلری اما اولار اللرده قالیب
.
.
آلدی اصراریله هر نه واریدی میر انام
گورجاقین شیون ائدیب آل عبا اولمادی رام
نئجه ساکت ائله سین عمه لرین بیکس امام
آتا قارداشلارینین گوردوله تا جامه سینی
اصغرین بوش بشگین اکبرین عمامه سینی
.
.
یادگار شهدادن هره آلدی الینه
هره بیر نوعیله آغلوراولارون نسگلینه
ووردی زینب ولی اود اهل سمانین دیلینه
کربلایه ساری باخدی ائلدی داد وانین
دئدی ای یوسفیم آلدیم گتیرم پیرهنین
.
.
ام کلثوم باخیب زینبه چوخ اولدی غمین
آلدی عباسین اله مشگیله قانلی علمین
دئدی قارداش نه دئیم آلسا خبر ام بنین
کسیلن قولارا قربان گل اوزون آل علمی
گل آپار شامیدن عباس بو یورقون حرمی
.
.
ساربان هی ووروب آماده اولوب غملی قطار
وقت او وقت اولدی اولا آل عبا ناقه سوار
باخدی محمل لرین اوسته نه گوروب زینب زار
قرمزی پرده لره باخدی دئدی وا اسفا
بیلمیسیز یاسلیوق آیا ووروسوز قلبه یارا
.
.
وورمیون بوندان علاوه دیلیمه تیر ملال
ندی بو ناقه لر اوسته چکیلن قرمزی شال
یوخدی بو مسئله ده هئچ سیزه بیر جای سئوال
بیلمیسیز یاسلی اولان اگنینه سیز قاره گئیر
هانسی قارداشی ئولن باجی بو محملده گئدر
.
.
شرم ائدین تیر محن آز بو دل زاره وورون
یاسلیوق دربدروق دیللره آز یاره وورون
گوتورون قرمزی الان یئرینه قاره وورون
چخمارام یاسدان ئولونجه من عزا ساخلیارام
نقدر عمروم اولا باشه قرا باغلیارام
.
.
سس دوشوب بدرقه ائتماقه گلیب مردم شام
ازدحام اولدی جماعت توکولوب گلدی تمام
باخدی اول شوره گلن خلقه اوصدیقه مرام
گوردی آغلولا دئدی ساکت اولون آغلامیون
بوندان آرتیق بو یارالی سینه می داغلامیون
.
.
گوردی زینب اوخانملار هره بیر سوز دانشیر
بعضی سی قیزلار الیندن اتگیندن یاپشیر
دقت ائتدوقجا دیلی نار غمیله آلشیر
حولیله گوردی که بعضی ال ایاقین ایتیریب
کول توکنلر باشنا الده اوگون گل گتیریب
.
.
بیری سجاده دئییر سوزلرینی دیلده نوا
بیری ایستیر کی بیزی عفو ائدین ای آل عبا
سیزی اینجیتمیشوق ای عترت سلطان جزا
خارجی آدی دئییب بسکه اذیّت ائلدوق
کوچه لرده داش آتیب طعن وشماتت ائلدوق
.
.
دئدی بیر سوز اولارا زینب مرضیه مقام
عیبی یوخ ظلم ائله دوز چوخ بیزه ای مردم شام
واردی بیر شرطی سیزی عفو ائده م ای خلق عوام
حقیدن ایستیسیز حشریده پاداش آلاسوز
او رقیه بالامی یادوزه هر گون سالاسوز
.
.
قبرینه زائر اولانلاری دعا ایلیه جاق
اولسا هر دردیز اگر دیلده دوا ایلیه جاق
بو خرابه ائوینی دار شفا ائیلیه جاق
قلبی سنمیشدی ولی قدرینی سندیرمیاسوز
قبرینین اوسته گئجه شمع عزا یاندیراسوز
.
.
نسگیلی چوخدی اورکده بالامون واردی غمی
هر باخاندا یوزونه یاده سالاردی ننه می
قالدی غربتده بالام محنتینین یوخ رقمی
شامیده قالدی بالام من دئمیرم خوشدی یئری
کربلایه گئدیروخ قافله ده بوشدی یئری
.
.
گویلوم ایستیردی بو یولدا منیله باهم اولا
کربلایه آپارام غصّه سی دیلده کم اولا
قویمادی دست قضا قیزلاریلا باهم اولا
قالدی ویرانه ده من سینه یارالی گئدیرم
چخمییب قرخی هله یاسلی عزالی گئدیرم
.
.
اولدی ویرانه منیم بلبلیمه غم قفسی
او قدر ناله ائدیب سینه ده باتدی نفسی
غربت ائلده بالامون اولمادی بیر دادرسی
غم کتابین اوخورام نسگیلی چوخدی بالامون
قبرینین اوسته گله بیر کسی یوخدی بالامون
.
.
.
.
#کوچ_شام #علیرضا_عباسی
#ترک_ائدیر_شامی_خانم_زینب_مرضیه_تبار
#ترکی
.
✍️ #زبدةالاشعار ✍️
.
🆔: @nohe_torki
نظر دهید