وقایع راه شام
از ناقه افتادن دختر امام
.
✍️ #زبدةالاشعار ✍️
.
🆔: @nohe_torki
.
علومی تبریزی
.
توسل ایله ماقا اولموسان گر آماده
سالاخ مصائب آل محمدی یاده
.
بلا چولنده شهید اولدی سید الشهدا
اسیر ایدوب آپارور شامه عترتین اعدا
.
گجه گونوز یول ایدوبلر گیدوله سرعتیله
چکورله شامه حسین باجسین مشقتیله
.
علیل امامین انیسی دوشاخه و زنجیر
دواسی خون جگردی طبیبی شمر شریر
.
دلنده شام و سحر وا حسیندور ذکری
اسیرلقی ستمی خردا قزلارون فکری
.
بیری دیور سوسوزام بیر یره یتشمز الیم
بیری دیور که اسیرم هانی کمک ایدنیم
.
النده چاره سی اولمازدی سینه داغلاردی
جهازسیز دوه ده سس چکردی آغلاردی
.
چخاردی ناله طفلان سپهر اعلایه
یتوبله بیر گونی بیر خوفناک صحرایه
.
هوانین ایستیسی رفتاریدن قالوب لشگر
نزوله حکم ایلیوب ابن سعد بد اختر
.
قوروب چادرلارینی بیر به بیر تمام سپاه
عیال حیدره امّا نه خیمه و خرگاه
.
قالوبلا گون قاباقندا تمام دل داغلی
توکردی گوزیاشی رخساره قولاری باغلى
.
اولار ایچردی سرین سو بولار باخاردی تمام
بنات حیدره أئتموشدولر حلالی حرام
.
توکردیله یره آرتوخ سویی او اهل عذاب
گون ایستیسیده بولار تشنه لب اولاردی کباب
.
چادرلاروندا اولار استراحته مشغول
بولاردا خار مغیلان دیبینده زار ملول
.
او قدر گچمدی سعداوغلى حکم ایدوب او زمان
دوباره دوشدی یولا قافله سپاه گران
.
یولی گیدوردی او قومیله عده ای اسرا
اوشاقلارین بیری قالدى او دشتیده اما
.
او نازنین بالاگوزدن جهانی آتیمشدی
او چولده ضعف ایله میشدی و یا که یاتمیشدی
.
آچاندا گوز نگوروب یار هم زبان یوخدی
ایدوبدی کوچ گیدوب اهل کاروان یوخدی
.
دوروب صاقا صولا قاچدی او طفل سرگردان
هراینه چاغوروردی حرملری گریان
.
دیردی عمه بو صحراده گئتمه من قالدیم
منِ یتیمه نی سال یاده گئتمه من قالدیم
.
منی آتام سنه تاپشردی عمه جان گتدی
عجب زمانه منى ظلم الیله خوار ایتدی
.
نه باعث اولدی که مندن بیله دویوب گیدوسن
منی بو چولده آدامسیز هارا قویوب گیدوسن
.
سن اولموسان من بی یاورین پرستاری
توقف ایله دایان عمه جان سنی تاری
.
ایتورموشم یولی بو چولده بیلمورم هارادی
گلنمورم یولی عمه ایاقلاریم یارادی
.
او قز بو سوزلری دلده دیردی حسرتیله
بویاندا قافله اما گیدوردی سرعتیله
.
همان او حالده ناگه نگوردی لشگر شام
جدا باشندا دایاندی سر منیر امام
.
دونوب دالی طرفه قانلو گوزلری باخوری
سرشگ دیده سی ابر بهار تک آخوری
.
نقدر سعی و تلاش ایتدی قوم بدفطرت
دایاندی نیزده شه باشی ائتمدی حرکت
.
حضور حضرت سجاده گلدیلر او زمان
بو ماجرانی ایدوبلر او شهریاره بیان
.
بیوردی عمه گتوردی بو غم منی داده
اوشاقلارین بیری شاید قالوبدی صحراده
.
بنات حیدره زینب ایدن زمان دا نظر
نگوردی بیر بالا یوخدی توکوب سرشگ بصر
.
بیوردی ائتمیون ای شامیان بو قدر تلاش
بالاسی چولده قالوب ناگراندی گتمز باش
.
چالشمیون بوقدر مدعاسینه یتورون
قالوبدی هاردا حسینون قزی گیدون گتورون
.
خبر ویروبله عمر سعده کی زنا زاده
قالوب اسیر بالانین بیریسی صحراده
.
او شوم ایلدی مأمور زجر خونخواری
تاپوب گتورسون او طفل یتیم و بی یاری
.
دیر که راوی تانوردوم او ظالم و شومی
که تاپسا ئولدورر آخر او طفل معصومی
.
او ظالمیله قایتدیم گلن یولا منده
که قویمیام اولا درمانده چنگ دشمنده
.
بیر آز گیدوب بالا گوردوخ گلور شتابیله
صول و صاقا قاچوری بیحد اضطرابیله
.
بیزی گورن کیمی رنگی سارالدى وحشتدن
علاوه وحشت ایدوب زجر بی مروتدن
.
دیدیم بالا بیله ائتمه فغان و شور و نوا
جسارت ایلیه بلمز سنه بو شوم و دغا
.
بروزه ایستدی ویرسین او بی حیا ستمین
دیدیم اوتان بو یتیمین چوخاتما درد و غمین
.
او بی حیا داخی فاش ائتمدی عداوتنی
اورکده ساخلادی هر کینه و شقاوتنی
.
دیدیم او بیکسه گل ترکیمه سوار ایلیوم
یتیش حرملره بو ورطه دن کنار ایلیوم
.
باخوب منه ایله توکدی عذاره اشگ ترین
بیوردی یوخدی مگر حکم دیندن خبرین
.
سپهر عصمتین آخر ایشقلی اولدوزیام
پیمبر اوغلی حسین ابن فاطمه قزیام
.
نقدر ول اولا سانما یول اوسته دینجلّم
سورون سیز آتلاری لابد پیاده من گلّم
.
دیر دوشوب یولاگلدوخ ولیک آهسته
گلوردی سرعتیله اول یتیم دل خسته
.
گوزونده اشگ بصرگه چکردی داد و فغان
دوشردی گه یوزی اوسته او طفل سرگردان
.
باخاردی گه گویه دلده فغان ناله و آه
دیردی یوخ منه دلدار یالقوزام الله
.
گلوب گھی اوتوراردی توکردی اشگ ترین
آچاردی معجرینی بیقرار زار او غمین
.
فغانیله ایکی حصّه ایدردی محنته باخ
سالاردی باشنه بیر قسمتینی عصمته باخ
.
ایاقلارینادا بیر قسمتینی باغلاردی
باخاردی گه قابار اولموش ایاقه آغلاردی
.
گنه دوشردی یولا اضطراب وحشتیله
یتشدی قافیله منتها اذیتله
.
باخوردی اهلحرم گوردولر او کان شرف
گیدور اورکده مرامی سر امامه طرف
.
نگوردولر یوزینه اشگ چشمی قان ویروری
قابار ایاقلارینی اول شهه نشان ویروری
.
دیور بابا نظر ایت گورنه نوعی گریانم
پیاده یولاری چوخ گلمیشم پریشانم
.
چوخ اینجدوبدی منی یولدا بی حیا دونان
یانار بو حالیمه عمّه م همیشه ای بابا جان
.
وفالی عمّه مه آخر بیور اوزون باباسن
بو دشمن ایچره بیر آن گوز گوتورمه سین مندن
.
علومی باشه یتور بو ملال عظمانی
اگر چه بو غمین عالمده یوخدی پایانی
.
.
.
#راه_شام_علومی_تبریزی
#توسل_ایله_ماقا_اولموسان_گر_آماده
#ترکی
.
✍️ #زبدةالاشعار ✍️
.
🆔: @nohe_torki
نظر دهید