زبانحال امام کاظم (ع)
.
.
فرهاد فکری اردبیلی
.
.
تیر غمه هر لحظه ده آماجم الهی
لطف ایله منه بیر سنه محتاجم الهی
.
.
سنسن ائدن عالملری بیر آنیده ایجاد
مظلوملرون لطفیله قلبین ایلین شاد
بو گوشۀ زندانیدن ایله منی آزاد
تأثیر مگر یوخدی الهی نفسیمده
روحیم قوشی آواره دی کنج قفسیمده
.
.
هجران غمی ایلوبدی یانان قلبیمی یاره
آخر شب عمرومدی نفس دوشدی شماره
ئولسم قالاجاق یرده جنازم ندی چاره
کیم وار باشیم اوسته باش آچوب آغلیا یارب
بیر کیمسنه یوخ گوزلریمی باغلیا یارب
.
.
ایللردی منه درد و محن همدم اولوبدی
اجلال و تفاقیم نئجه گور برهم اولوبدی
جسمیم اریوب ظلمیله قدّیم خم اولوبدی
یوخ دورماقا یردن گوروسن تاب و توانیم
ایکاش گلیدی باشیمون اوسته جوانیم
.
.
.
بیر کیمسنه یوخ حالیمی گلسون خبر آلسون
غربتنده اقلاً منی بیر یادینه سالسون
یانیمده آنام وار نه باجیم فکریمه قالسون
تک قالمیشام الله گوروسن دام بلاده
ئولسم بیلورم قالمالیدور نعشیم آراده
.
.
غربتده اسیر محن اولماق نه چتیندی
آواره و دور از وطن اولماق نه چتیندی
یاندی اورگیم بی کفن اولماق نه چتیندی
آخر نقدر تاب ایلیوم زوریله جبره
کیم وار گتوره نعشیمی یردن قویا قبره
.
.
هر جان وئره نون دلده اولار سوز نهانی
ایستر گله بالینینه گر اولسا جوانی
جانیم چیخار آسوده گوزوم گورسه رضانی
جانانیمه ئوز جانیمی تسلیم ائدرم من
گورسم بالامی قبره ده راحت گئدرم من
.
.
جان اوسته اولان رسمیدی اولادینی گوزلر
آهسته اورک سوزلرینی اوغلونا سویلر
من تک بیری غربتده آدامسیز اولا نیلر
یوخدور بیری تا اود گتوره اودلی دلیمدن
یا اینکه دوران وقته گلوب دوتسون الیمدن
.
.
ای قاصد آهیم گذر ائت یثربه ساری
آگاه ائله احوالیمه پوزقون بالالاری
سویله گوزی یولّاردا قالان قزلارا باری
فکر ایلمیون گوزدن آتوز سیزلری آتدی
درد و غموز آخر اونی زنداندا قوجاتدی
.
.
من سیز بیلورم سیزده قرا گونلره قالدوز
هر صبح و مسا زلف پریشان اله آلدوز
جانسوز اولان آهیله شرر عالمه سالدوز
نسگل لروز ایلوبدی منیم باغریمی شان شان
جانیم او گوزی یولدا قالان قزلارا قربان
.
.
چوخ آغلاما معصومه قزیم گلمه فغانه
هجران غمی دوندرمیه گوز یاشیوی قانه
اولما بو قدر غصه و اندوه نشانه
صبر ایله قزیم گلشنیمون زیوری سن سن
بیر عده قرا معجریمون یاوری سن سن
.
.
یغ باشیوه منزلده قزیم خرد و کباری
قویما گئده الدن اولارون صبر و قراری
دشمن گوره هر یرده بو غمگین بالالاری
من تک سیزه ده جوریله مین دام قورالّار
گه دل یاراسی گه باشوزا قمچی ویرالّار
.
.
#کاظمیه #فکری_اردبیلی #کاظمیه_شهادت #ترکی #زبدةالاشعار
نظر دهید