شهادت حضرت علی (ع)
.
جانشین مصطفیٰ یعسوب دین
عارف کامل امیرالمؤمنین
.
لنگر ارض و سماء ، کوه وقار
شهره ی عالم شرفلی شهریار
.
معرفت کانی ، تهجّد صاحبی
سابق و شاهد ، شهادت طالبی
.
حاکم عادل ، فدای عدل و داد
دشمن تبعیض و تضییع و فساد
.
فرشه پا بند اولمویان ، عرش آشیان
گوزلری گریان ، ئورک آتش فشان
.
عبد ممتاز عاشق شایسته جاه
عارف بی مدّعا ، عالم پناه
.
جان طاها ، کفو زهرا ، ذوالکرام
طاعت حق ده اولان عمری تمام
.
حق دئین ذرّات جسمی دم به دم
خدمتی حدّن اضافه ، خرجی کم
.
تتردن اذکاری چرخ اطلسی
قلب نخلستاندا ویلی ناله سی
.
سجده حالنده دوشوب بیحال اولان
تشنه گول تک رنگ رخساری سولان
.
عاجزانه آغلیوب ارحم دئین
ذات حق دن عجزیله عذر ایستین
.
طاعت الثّقلینه باش بیر ضربتی
هر عمل ده قصد قربت نیّتی
.
خلقه همدرد ، هم صدا ، درد آشنا
بنده ی حق ، حق رضاسی ، مرتضا
.
بو گجه سیر سماوات ایلیور
آیت حق سیر آیات ایلیور
.
انجم و آفاقه ایلردی نظر
ذکر ائدردی سرّ غیبی دن خبر
.
دؤز خبر وئرمش رسول مؤتمن
صبح وقتنده بویاننام قانه من
.
خلعت دنیانی تندن سویموشام
رغبتیم دنیایه یوخدور دویموشام
.
اولسا صبح ، اوللام بو زنداندان رها
مسلخ عشق ایچره اوللام جانفدا
.
طالب وصل نگارم ، عاشقم
واله جَلوات یارم ، عاشقم
.
چوخدی شوقیم چاتماقا پیغمبره
تشنه یم وصل بتول اطهره
.
درد هجران چکمیشم افسردیم
بو مظالم خانه دن آزردیم
.
گه اولور غرق عبادت اول جناب
ذات هو ذکریندن اولسون کامیاب
.
صبح اولونجا اولدی مشغول نماز
ذات حق له ایلدی راز و نیاز
.
صبح اولاندا قیلدی تجدید وضو
اول وضو وئردی نمازه آبرو
.
کعبه اوغلی عزم مسجد ایلدی
بیلمیرم هجرینده اهلی نیلدی
.
آلدی مرغابی لر اطراف شهی
سدّ ائدیب لر شاه والایه رهی
.
پر وروب ایلردی لر داد و نوا
یالواراردی تک تکی گتمه آقا
.
عزم مسجد ایلمه ای خوش سیر
وار فضا اوسته علامات خطر
.
قوشلاری قیلدی نوازش شهریار
ائتدی فرمایش اولون یولدان کنار
.
ائتمیون افغان و ناله بو قدر
ناله زین آردیجا واردی ناله لر
.
آستان دان ایلین وقته گذر
بند اولوب دور شالئنه قلّاب در
.
باغلادی شالین دئدی بیر سوز ولی
باغلا بند مرگی محکم یا علی
.
مسجده چاتماقه ایلردی شتاب
یئر گویی دوتموشدی رعب و اضطراب
.
وارد اولدی مسجده تا شهریار
بیر ندا وئردی یاتانلار دوردولار
.
فیض آلیب ذکر اذان دان کائنات
سسلنیب گویده ملک لر اصّلاة
.
وارد محراب اولوب روح نماز
ذات حق له ایلسین راز و نیاز
.
کلمه ی تکبیری تا ائتدی ادا
یئر گوی اولدی اول امیره همصدا
.
عرشین اهلی ایلدی فرشه نظر
شاهد اولسونلار اولور یئرده نه لر
.
حمدی قورتاردی ، اولوب سوره تمام
راکع اولدی خالقه ، سندی قیام
.
ذکر ائدیب سبحانه ربّی العظیم
عالمین قلبین دوتوب دور رعب و بیم
.
قورتارئب ذکر رکوع ، ائتدی قیام
قیلدی تحصیل رضایه اهتمام
.
سجدیه گئتدی ، اولوب دور خاکسار
آز قالئب گئتسین الیندن اقتدار
.
ربّی الاعلایه سبحان سسلدی
صوتینه لبّیک جانان سسلدی
.
قوزویاندا باشینی اولدی اولان
سجده گاهندن ائدیب فوّاره قان
.
باشه دگدی تیغ اشقاالاشقیا
فزتُ و رب سسلنوب دور مرتضا
.
قان آتوب ، محرابی دوتدی رنگ قان
اولدی مولانین جمالی ارغوان
.
مسجد ائتدی ناله منبر آغلادی
ناله قوزاندی ملک لر آغلادی
.
جبرئیلین ناله سی سالدی طنین
سندی ارکان هدا ، ارکان دین
.
قانه باتدی ابن عمّ مصطفیٰ
آند اولا آللهه ئولدی مرتضیٰ
.
پاره لندی عروة الوثقای حق
گون یوزونده گورسنیر قانلی شفق
.
یاردی باشین تیغ اشقاالاشقیا
قانه باتدی مرتضیٰ واحسرتا
.
کوفه اهلی بیلدی لر طوفان اولوب
مرتضیٰ ئوز قانینه غلطان اولوب
.
مسجده یوز قویدی یار و آشنا
دیده گریان داده گلدی مجتبا
.
گوردی سیراب ایلئیب محرابی قان
باش قانی باشدان یوزه اولموش روان
.
طاقتی یوخدور ایاقه دورماقا
اگلشیب دور بی رمق یئرده آقا
.
زهرلی خنجر سالیب ایله حالا
ناتوان اولموش علی شیر خدا
.
اوتدوقی یئرده نماز ائتدی ادا
جان ایمان ، جان دین ، دینه فدا
.
قالمامشدی چون توانی دورماقا
بیر کلیمه بوکدولر حمل اولماقا
.
اولدولار چون درب مسجددن کنار
باخدی بیر گوی سمتینه اول شهریار
.
سسلدی هئچ اولدی بیر یول گون چخا
چشم بیدار علی یاتمش اولا
.
گلدی لر بیر آز قالاندا منزله
شهریار بی رمق گلدی دله
.
قیلدی فرمایش اگر چه خسته یم
آز قالور کی جان وئرم جان اوسته یم
.
ایستورم هر نه توان وار سعی ائدیم
ئوز ائویمه ئوز ایاقمله گئدیم
.
گورمه سین پژمرده اولادیم منی
زینبین قویموم اوجالسین شیونی
.
آغلاسا زینب اولار قلبیم کباب
زینبی آغلار گورنمز بوتراب
.
یا علی آگاهی دون سن مطلبه
یوز وئرر هانسی بلالر زینبه
.
سن بولوردون خیمه سی تالان اولار
دوغرانار اعوانی ، سرگردان اولار
.
سن بولوردون کی ائدللر دستگیر
قان توکن لر زینبی ایلر اسیر
.
قوللاری باغلی چکرلر کوفیه
قارداشین باشین وراللار نیزیه
.
اهل کوفه حرمتین پامال ائدر
الده کول زینب دن استقبال ائدر
.
کول سپرلر باشینه کول باشلیلار
داشلیارلار قارداشین باش داشلیلار
.
دوندی قانه گوزیاشیم داغلاندی دل
اولماسا حقّی ادا اوللام خجل
.
یا علی ایستور ( هدایت ) کام آلا
با کفایت اللرینده جام آلا
.
.
نظر دهید