جهاندا ویرما لب لعله جام صهبانی #مجلس_یزید_ذهنی_زاده

مجلس یزید
خطبۀ حضرت زینب (س)
..
..
مرحوم حاج عبدالعظیم ذهنی زاده
..
..
جهاندا ویرما لب لعله جام صهبانی
حیات خرمنینه سالما نار سوزانی
..
اگر چه بیر سودی ظاهرده لیک باطنده
یانار بیر اودّی که اودلار تمام اعضانی
..
نهال عمرى بو آبیله آبیار ائلیین
چتتین دره ثمر نخلۀ منایانی
..
اولار زمانه ده هر کیمسنه که باده پرست
بولر هوا و هوس دُورِ چرخ مینانی
..
هوای بادۀ گلگونیله اولان سرمست
اولار پرستشی عقلاً هوای نفسانی
..
او کس که ساخلیا بیر لحظه الده پیمانه
بیر عمر الدن آتار تار عهد و پیمانی
..
او زوری وار که بو آتش مزاج آب مضاف
چو خاک باده ویره قدر باده پیمانی
..
ائدر ذلیل عزیزی اراذل اشرافی
گدادن اسکیک ایدرمی مقام سلطانی
..
دیر شرابیله سرمست اولوز گرک دیمه سون
ایدر او شرّ عملی غیر شأن و شایانی
..
شهود ایستیه سن اهل عصر حاضردن
گوزوم گور آخرینی خواره و سُکارانی
..
گر عبرت اخذ ایده سن ایسته سن کچن لردن
اوخی صحایف تاریخ شام ویرانی
..
یزیدی گور ایله جبّار و مقتدر سلطان
اودم که گوردی مرادینجه دور دورانی
..
می ایچدی مست و خراب اولدی خانمانی خراب
دانشدی مست و خراب عالمینده هذیانی
..
تلاوت ایلدی بیر آیۀ کلام الله
ایدن کلام اِلهیّه دن تبرّانی
..
ایدوب او آیه نی ناحقّ حقله استدلال
بنی امیه نی حق، ناحق آل عمرانی
..
دیدی خدادور آلار مُلک ایسته سه کیمدن
اوزی سُوَر کیمه ملکی بویورسا ارزانی
..
اولوب بیر آتش طعنه بو ناحق استدلال
یانوب او آتشه حق اهلینون دل و جانی
..
او آتش ایلدی مجبور آتشین نطقه
یگانه بنت قسیم جنان و نیرانی
..
دل آچدی نطقه على تک علی قیزی زینب
کلامی حیرته سالدى کلیم موسانی
..
بیوردی حمد او پروردگاره دور مخصوص
وجوده گتدی عدمدن بو کون و امکانی
..
اولا صلوة و سلام اوز بابام رسول حقه
که ذات حق اونا زیبنده بولدى اسرانی
..
صورا دیدی صدق الله العلی العظیم
بَریدی کذبدن البته ذات سُبحانی
..
او لهجه ایله ایدردی تلاوت آیه
على اوزی دیه سن بس اوخوردی قرآنی
..
یزید ذکر ائلیین مُلکه آیه ردّینده (1)
کلام حقدن اولوب ثُمَّ کانَ عنوانی
..
یتوردی آیه نی یستهزؤنیده ختمه (2)
او اهل باطله آندردی لفظ و معنانی
..
که یعنی سوءده اصرار ایدنلر آخرده
گرکدی ایلیه تکذیب صدق فُرقانی
..
یزید بیله گمان ایله دون جفائیله
که بیزدن اخذ ائله ماقدان بسیط غبرانی
..
و تنگ ایله ماقون بیزلره فشاریله
بو وسعتیله بو آفاق طاق خضرانی
..
و صبح إتماقیمیز حالت اسارتیله
سنون قطاریده سیر ایتماقون اُسارانی
..
و سن بوگون بیزه ذوالاقتدار اولماقوون
خدادن اولدی بیزه یوخسا شأن نُقصانی
..
و بیر کرمدی سنه ربّ ذوالکرامتدن
اوزیوه فرض ایله دون امتنان مَنّانی
..
و ظنّ ایلدون اوز قدریون جلالتی دور
بو گوزده ذلّتیله گورماقون عزیزانی
..
بِأَنفِکَ فَشَمختَ نَظَرتُ فی عَطفِک
سروریلن سیلوسن آستین و دامانی
..
و تَنفضُ مَرحاً مدرَوَیکَ حینَ رَاَیتَ
ایدن مرادوه اقبال دون دنیانی
..
اوخورسان آیۀ ملکی بو قصد و نیتله
که جلوه لندیره سن حقّ اهل بطلانی
..
بو فکره بیزدن اولوب منتزع سنه تفویض
بوخانوادیه مخصوص ملک سلطانی
..
دایان یزید دایان گیچ بو فکر باطلدن
باشوندان آت بو هوای غرور بیجانی
..
اونوتدون آیۀ لاتحسَبَنَّ نی آیا؟ (3)
که اهل باطل ایدر قول حقّ نیسانی
..
خدای حقّ که حقّیله گوندروبدی کتاب
دیوب کتابده هر خیر و شر انسانی
..
گمان ایلمه اعمال خلقدن غافل
خدای قادر وحی و بصیر و دانانی
..
ویرر جزاده سالان انتقامی تأخیره
جزای ذرّۀ اعمال پیر و بُرنانی
..
و بیله بولمه که کُفّاره خیر دور مهلت
نه بلکه شرّیدی یتسون کماله عصیانی
..
کماله یتمسه عصیانی درک ایده بولمز
لَهُم عذاب مُهینی وعید یزدانی
..
دگول بو سلطنتون ای دنی خدادادی
مقام عالیه أَعلا یتورمز أدنانی
..
بساط کینه و بیداد دور بو تشکیلات
گرکدی سلطنته عدل و داد میزانی
..
بوعدلدندی ای آزاد گشته نون اوغلی
سالا عذارینه اهلون نقاب دیبانی
..
ولی قالا باش آچوخ اهلبیت پیغمبر
یوزه نقاب ایلیه طرّۀ مُطرّانی
..
اولا سنون حرمون عزّتیله پرده نشین
تناول ایلیه هر نعمت گوارانی
..
ولیک فاطمه قزلاری آج سوسوز قالسون
اسارتیله دولانسون چولی بیابانی
..
او نوع شهر به شهر اهل کین دولاندیرسون
که هر وضیع و شریف ایله سون تماشانی
..
و اولماسون بولارین بیر حمایت ایلینی
که قانینه بویانوب هاشمی جوانانی
..
بولار پیمبری انکاریوون نتیجه سیدور
و دانماقون اثری بیزلره تولّانی
..
بلی زنای جگرخوار هند زانیه نون
اولار نتیجه سی آخرده سن کیمی جانی
..
پیمبرین قیزینون اوغلونی شهید ایلر
اسیر ایدر حرم شهریار بطحانی
..
ساتار اوز آخرتین پنج روزه دنیایه
اوزینه مایۀ عزت بولر بو سودانی
..
مگر نشانۀ عترتدی دهر اقبالی
و یا زمانه نون ادباری ذلّ برهانی
..
بیزه نه فرق ایدر اقبال دهر یا ادبار
بیز اهل بیته طفیلی دور عالی و دانی
..
بیزیم طریقتیمیزدور شریعته ترویج
بو یولدا فقر و غنانون نه جای رجحانی
..
و حال آنکه بوبلقیس خادمه حرمه
ولو مسلّم اولا حشمت سلیمانی
..
و یا که ایلیه دنیای دون ایله ادبار
نه اوّلى اولا ادبارینون نه پایانی
..
خدا یانیندا بیزیم شأنیمیزدن اسکیلمز
فقط بیزه یارادوب شأن خالق شانی
..
اوکه گوزونده سنون مایه مذلت دور
قسم عزیزه بیر عزّتدی عزّلر کانی
..
عجب دگل بوجنایات فاجعه سندن
ایدر سنون کیمی هر تخم نسل شیطانی
..
نیه امید دوتولسون أو تخم فاجره دن
که دیشلیوب کبد سیّد شهیدانی
..
نموّ پرورش لحمینون بولوب سببی
ره سعادته جاری سعیدلر قانی
..
اولار زمانه ده اولاد فاسق و فاجر
هامی فجوره مروّج فسوق ایچون بانی
..
مگر دگول سنه اجداد بدر اشیاخی
پیمبرین یوزینه چکدی تیغ برّانی
..
مگر پیمبر اسلام قتلنه فرمان
اُحد ده ویرمدی کفّار آل سفیانی
..
دونن دی وقعۀ صفین و نهروان و جمل
آتان معاویه سالدی او شور و غوغان
..
اوزونده ایتماقا تکمیل نقص اجدادون
پیمبر اوغلونا ویردون او قتل فرمانی
..
او قدر ناحق اولانلار توکوبله حق قانی
دیماق اولار یوولوب دین و شرع بنیانی
..
یغیشدی بیر بیله قان عاشر محرمده
محیط خون ایله دی وادی بلایانی
..
ایله تلاطمه گلدی که سیندى فلک نجات
زمانه یاد ایلمز بیرده نوح طوفانی
..
بولار نتیجۀ کفر قدیمدور سیزده
که آشکار ایلدوز دلده بغض پنهانی
..
سن آرزو ایدوسن ایمدی بدر اشیاخین
على الینده ئلن قوم بی سروپانی
..
گوریدیلر که نجه بدره انتقام آلدون
و سیر ائدیدیله بو قدرت مهیّانی
..
دییدیلر سنه شل اولماسون بو ال که قوروب
بو سلطنتله بیله انتقام دیوانی
..
و شادیسن بوناکیم نور حقی سوندوردون
جهانی ایلموسن روزگار ظلمانی
..
آغاج ویرورسان او خشکیده تشنه لعل لبه
که یاندورار شَرَر ظلمون آب حیوانی
..
و حال آنکه پیمبر اوپوپ او لعل لبی
نه تک او لعل لبی درّ تک ثنایانی
..
نه آنّوسان او دیشین قیمتین شکست ایدوسن
بلی گدا نه نه بولر قیمت برلیانی
..
بابالاروندا پیمبر دیشین شکست ایتدی
خبیث نطفه خبائث لره اولار بانی
..
هله آییلمیه جاقسان بو خواب غفلتدن
که خواب غفلتی سنگین ایدر هوسرانی
..
و توکموسن اوز ألونله او کیمسه نین قانین
شباب اهل جنان سیّدیدی رحمانی
..
و آفتابیدی اولاد عبد مُطلَّبه
و نور دیدۀ یعسوب دین ربّانی
..
فرحله سسلوسن اَسلافوی که کافریدی
و ایلوسن او قبول اولمیان تمنّانی
..
بو آرزوده سن ای کاش اولیدیلر حاضر
گوریدیلر سن ایدن ظلم بی مهابانی
..
قسم معاده قیتسیدیلر بو دنیایه
دئسیدیلر سنه اوضاع دار عقبانی
..
اوزون او وقت دیردون که کاش اولیدیم شل
سُوَردون اوندا کسیلمیش بو دست عدوانی
..
بو آرزونی ایدردون که دوغمییدی آنان
و اَممییدون او شیر حرام پستانی
..
و تیز اولار که مسیرون اولار عذاب ألیم
مخاصمون گوره جاقسان رسول رحمانی
..
دونوب خانم گویه باخدی دیدی شکایتیله
که ای عُلُوّ ایلین قدر عرش اعلانی
..
آل انتقاموموزی سن بوقوم ظالمدن
و آل حقوقوموزی ای حقین نگهبانی
..
بولاردی ظلمیله ئولدوردور رجالیمیزی
بو اهل کفر توکوب خون اهل ایمانی
..
بولاردی کسدی بیزیم رشتۀ حیاتیمیزی
و قتل نفس ایلدی هر نفوسه اولانی
..
و هتک ایله دیلر احترام پرده میزی
و ایتدیلر عَوَضِ احترام ایذانی
..
بولاردی ایلدی بی پرده پرده لی حرمی
بولادری ویردی حریم خدایه تالانی
..
بولاردى عترت پیغمبری سویان امّت
آلان بولاردی نقاب بنات زهرانی
..
دونوب یزیده بویوردی گنه عتابیله
که ای ایدن شرف عقلى نفس قربانی
..
نه ایله سن ایله افعال مایشائه قَسم
اولورسان عاقبت افعالیوون پشیمانی
..
قسم خدایه که سن کسمه دون مگر اوز الون
کسنده ماریه ده هر یمین و یُسرانی
..
و یاره ایلمه دون سن مگر که اوز بدنون
یارالیَنده قوشون زخمدار اَبدانی
..
یزید تیز اولی بیرگون که درک ایلرسن
وبالِ قتلِ حسینله حضور طاهانی
..
او گون پیمبرون اطرافین اهل بیتی آلار
نجه که اولدوز آلار دور ماه تابانی
..
و لیک بیر یاراسی قانینه اولار غلطان
خجل او یوزلر ایدر رنگ لعل مرجانی
..
بولار اولاردی که ظلمیله قانلارین توکدون
و توپراق اوسته دوشنلر وجود عریانی
..
و بعضی سی او لارین سبز اولار زبر جد رنگ
سالار خفایه جلالی جلای خضرانی
..
اولاردا زهر جفادن شهید اولانلار اولار
که زهر ظلمیله درک ایلیوب منایانی
..
او گونده منتقم حق بیر انتقام آلاجاق
او انتقامدن اولماز فرار امکانی
..
وئرر او گون بیزه بیر سلطنت خدا که ایدر
غبار مقدمیمیز فرق تاج شاهانی
..
بیز ایلروخ او گونون امر و نهینی لاغیر
جنانه یولاروخ احبابی ناره اعدانی
..
قیامتین گونونون وحشت عظیمیندن
بیزیم محبّتیمیز قورتارار احبّانی
..
یتر اوگونده جزای زنای شومه سنی
رکاب ملّت اسلامه میندیرن زانی
..
و تیز بولوندوره جاق اَیُّکُم اَشَرَّ مَکان
ومن أَضَلُّ سبیلاً معاد جسمانی
..
فرح سنی بو قدر دلخوش ایتمه سین بونا کیم
کسوفه سالدون عجب شمس عالم آرانی
..
اولار که ظلمیله سن قاننه بویاندیردون
آلوبلا رحمت پروردگار مهمانی
..
سبیل حقّیده قانه باتوب شهید اولانون
تاپار مماتیله بیر جاودانی احیانی (4)
..
وَلاتَقولوا لِمن یُقتلی تلاوت ایله
دوشون او آیه ده معنای لفظ احیانی (5)
..
بوگونده من که سنون قدریوی کیچیک سانورام
و ایلورم سنه توبیخ و پند عظمانی
..
نه بوخیاله سنه فایده بغیشلیه جاق
و نه بو فکره سنه یوز ویره پشیمانی
..
سعادتین قاپوسی باغلیدور شقی یوزینه
سن اهل شرّه گرک روی خیر حرمانی
..
که قویموسان هامی اسلامیان گوزون آغلار
و غم شرارینه همدم صدور حرّانی
..
او سخت دللره پند لطیف اثر ایتمز
که شوره زار نیدر آب ابر نیسانی
..
قلوب قاسیه دور بیله قلبلر سیزده
ایدن بو نفس لروزدی خدایه طغیانی
..
دولوب خدا غضبیله تمام جسم لروز
ایدوب بو جسمه نبی لعنت فراوانی
..
بولاردا باغلیوب اوز آشیانه سین شیطان
بو نفس لردى شیاطین یار و اعوانی
..
بو آشیاندان اولانلار سنون کیمی لراولوب
دانوب عزیزی قبول ایلیوبدی عُزّانی
..
ویرار سنون کیمیلر ایله صدمه اسلامه
نه بیر مجوس ویرار نه یهود و نصرانی
..
ایدر بوعالم اسلامی ایله بیر تنگین
که طعنه ده قویار هر ملت مسلمانی
..
عجبدی بیر طلقادن اولان زنا تخمی
شهید ایلیه بیر متّقی جهانبانی
..
و چوخ عجبدی توکولسون یره جفائیله
رسالتون گویونون انجم درخشانی
..
و تپراق آلسون او اولدوزلار اوسته بیر پارا ال
او اللر اولماسون عالمده دست انسانی
..
یزید سن بیله فکر ایلوسن بو دنیاده
شهید ایتماقیلا شهریار خوبانی
..
و هاشمی لری تپراقلار اوسته توکماقیلان
و سود امرلرینه وورماقیله پیکانی
..
و هاشمیله لری پرده دن چخاتماقیلان
و باغلاماقلیقلان قولقولا صبایانی
..
وروم اسیر تک انظاره جلوه ویرماقیلان
بو بانوان بنات بتول عذرانی
..
و بیر خلاف شریعت فروش امریله
بو شاهزادۀ سلطان کون و امکانی
..
سنه مسلّم اولار ملک سلطنت بیزدن
وسیر شپّره ایلر فضای عنقانی
..
قسم بیزی شرف وحییله شریف ایدنه
و هاشمی ایدنه فرق تاج لولانی
..
محالیدور که بیزیم سلطنت سنه یتیشه
دگول فضای هما خاک پشّه میدانی
..
بیزیم مقام رفیعه محالیدور یته سن
ثَرایه اندیره لر اوجدن ثرّیانی
..
بیزیم جلالتی خالق بیر آدمه ویرمز
یاراتسا یوز مین اگر آدمیله حوّانی
..
بیزیم نهایتیمیز درک اولونمیوب اولماز
که ذرّه درک ایلمز کُنهِ مهر رخشانی
..
آتانماسان یر اوزیندن پیمبر اولادین
چه قتل عام ایده سن امّهات و آبانی
..
محالیدور آدیمیز یر یوزوندن اولسون محو
ولو که محو ایده سن اسمیله مسمّانی
..
خدایه ایلرم اوز شکوه و شکایتیمی
عدوّدن آلا داد دل احبّانی
..
نه فکر و حیله که قلبونده واردی گیزلتمه
و ایله بیزلره هر ظلمده تقلّانی
..
خطادی ایله دوقون اعتقاد هر نه که وار
چوخ آزدی عمرؤون البته روز و شب سانی
..
و تیز اولاندی بو جمعیتون پراکنده
او گون که خلق گورر رستخیز برانی
..
او گونکی گونده منادی حق ندا ایلر
که ایمدی لعنت حق دوتدی ظلمه دارانی
..
او گونده سیزلر اولورسوز بو قانلارا مسئول
او دردمند اولاجاقسوز که یوخدی درمانی
..
خدادن أیسترم ائتسون بیز اهل بیته تمام
تمام اجر جزیلی ثواب و احسانی
..
و ایسترم بیزه ویرسون جمیل اِنابتیله
اوزی خ افت حیّ ودود بنیانی
..
و حمد اولار او خدایه که ختم ایلر اوزی
هامى ولى لرینه رحمتینی احسانی
..
نظام کلمه نى ذهنى صحیفۀ رویه
مداد اشکیله خوش دوزدی کلک مژگان
..
او خطبه عقلیمون اندازه سیجه شرح اولدی
اگر چه ایلموشم قطره شرح دریانی
..
او شرح خطبه ده هر جمله نی که زاید اولا
یانوب یازوب الیمون کلک آتش افشانی
..
و بعضی جمله نی شرح ایلماقدان عاجزیدیم
یازانمادیم اولورام اعتذار خواهانی
..
دگل نظر منه فردوس یا برائت نار
رضای حق منه منظور دور حسین جانی
..
..
..
(1) آیۀ مُلک (سوره آل عمران آیه 26): قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاء وَتَنزِعُ الْمُلْكَ مِمَّن تَشَاء وَتُعِزُّ مَن تَشَاء وَتُذِلُّ مَن تَشَاء بِيَدِكَ الْخَيْرُ إِنَّكَ عَلَىَ كُلِّ شَيْءٍ قَدِيرٌ (بگو بار خدایا تویی که فرمانفرمایی، هر آن کس را که خواهی فرمانروایی بخشی و از هر که خواهی فرمانروایی را باز ستانی و هر که را خواهی عزت بخشی و هر که را خواهی خوار گردانی همه خوبی‌ها به دست تواست و تو بر هر چیز توانایی )
(2) سوره روم آیه 10 : ثُمَّ كَانَ عَاقِبَةَ الَّذِينَ أَسَاءُوا السُّوءَى أَنْ كَذَّبُوا بِآيَاتِ اللَّهِ وَكَانُوا بِهَا يَسْتَهْزِئُونَ (آنگاه فرجام کسانی که بدی کردند [بسی] بدتر بود [چرا] که آیات خدا را تکذیب کردند و آنها را به ریشخند می‌گرفتند)
(3) سوره آل عمران آیه 178 : وَلَا يَحْسَبَنَّ الَّذِينَ كَفَرُوا أَنَّمَا نُمْلِي لَهُمْ خَيْرٌ لِأَنْفُسِهِمْ إِنَّمَا نُمْلِي لَهُمْ لِيَزْدَادُوا إِثْمًا وَلَهُمْ عَذَابٌ مُهِينٌ (و البته نباید کسانی که کافر شده‌اند تصور کنند اینکه به ایشان مهلت می‌دهیم برای آنان نیکوست ما فقط به ایشان مهلت می‌دهیم تا بر گناه [خود] بیفزایند و [آنگاه] عذابی خفت آور خواهند داشت)
(4) سوره آل عمران آیه 169 : وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ (هرگز کسانی را که در راه خدا کشته شده‌اند مرده مپندار بلکه زنده اند که نزد پروردگارشان روزی داده می‌شوند)
(5) سوره بقره آیه 154 : وَلَا تَقُولُوا لِمَنْ يُقْتَلُ فِي سَبِيلِ اللَّهِ أَمْوَاتٌ ۚ بَلْ أَحْيَاءٌ وَلَٰكِنْ لَا تَشْعُرُونَ (و به آنان که در راه خدا کشته شوند مرده نگویید، بلکه زنده ابدی هستند و لیکن همه شما این حقیقت را درنخواهید یافت.)
..
..
..
..
#مجلس_یزید #ذهنی_زاده
#جهاندا_ویرما_لب_لعله_جام_صهبانی
#ترکی
#زبدةالاشعار