حجّت تمام قیلدی او الله حجّتی – #حسینیه_واقف_سرابی

شجاعت و شهادت امام حسین (ع)
.
زبدة الاشعار

?: @nohe_torki
.
مرحوم واقف سرابی
.
حجّت تمام قیلدی او الله حجّتی
دوردی دایاندی کوفه و شامین جماعتی
.
تبلیغ حجّتینده ویروبلر جواب سخت
بلدی گیچوبدی وقت شهادت یتوبدی وقت
.
اول دمده ذوالفقار اوزینی سالدی واسطه
چکدی شراره گلدی یدالله باسطه
.
غیظه گلوب ولیّ خداوند ذوالجلال
آز قالدی سلب اولا ملک الموتیدن مجال
.
هر چند اوخ یاغاردی هوادن تگرگ تک
قومی توکردی یر یوزینه برگ بید تک
.
فریاد زخمدار و هیاهوی گیر و دار
شور نشور اولدی او صحراده آشکار
.
پامال ایدر ننوعیله خاشاکی تند باد
ابطال قوم منتشر اولموشدی کالجراد
.
شیر خدانین اوغلی ایدوب حمله شیر تک
اول شیریدن قاچاردیلا روباه پیر تک
.
کثرت اولوبدی صورت وحدتده آشکار
دولموشدی کربلایه حسین الده ذوالفقار
.
یوز مین سواره هر طرفه ایلیوب نگاه
ایتمزدی جلوه غیر حسینیله ذوالجناح
.
حیرتده قالما کثرت اجسام عشقیدور
یوخ عیب سوزده معرکۀ بدر مشقیدور
.
آز قالدی روح قطع ایده اجسامیدن قبول
فی الفور عهد نامۀ ذر ایلدی نزول
.
سالدی خیاله دوره عنقای قافیدن
قویدی غلافه تیغی گیچوبدور مصافیدن
.
سالدی خیاله دوره عنقای قافیدن
قویدی غلافه تیری گیچوبدور مصافیدن
.
نصرت دِهِ زمانیه گلدی زمان عُسر
عرض ایتمرم نه ظلم ایلدی مالک ابن یُسر
.
حکم ایتدی ابن سعد ستمگر سپاهینه
حایل اولون حسینیله اوز خیمگاهینه
.
لشکر قاریشدی بیر بیرینه برهم اولدی صف
بعضیسی دوندی غارت ایچون خیمیه طرف
.
اهل حرم نگوردی گلور های هو سسی
خوردا اوشاقلارین چیخوب افلاکه ناله سی
.
زینب الی باشیندا کنار اولدی خیمه دن
سسلندی یا اخا کُمَگه گلموسن ندن
.
آلدی صدای زینبی فرزند مصطفی
ایتدی ندا او فرقه نی سلطان کربلا
.
ایتدی خطاب لشکره کای قوم بی ادب
یوخ دین سیزده هاردا قالوب غیرت عرب
.
ای قوم خیمه لر یولونی دوتمیون بو گون
من ئولمه میش عیالیمی قورخوتمیون بو گون
.
رجّاله لر بلوبله منیم ضعف حالیمی
ایستولّه من باخا باخا سویسونلا آلیمی
.
شمر شریر سسلدی ای فرقۀ جهول
کفّ کریمیدور سوزینی ایلیون قبول
.
اوّل گلون بو تشنه لبی راحت ایلیاخ
باشین ووراخ جدایه صورا غارت ایلیاخ
.
اُول بیحیا کناره گلوبدور سپاهیدن
حکم ایلدی قیتدی قشون خیمگاهیدن
.
فریاد گیر و دار ایلیوب نُه سمایه اوج
حمله ایدوب او قوم حسین اوسته فوج فوج
.
بیر دسته گَلدی خنجر و شمشیریله وورا
بیر فرقه سنگیله بیریسی تیریله وورا
.
از بس ووروبلا نیزه و شمشیر و سنگ و تیر
دورت مین یارا او سینه ده اولموشدی جای گیر
.
راوی دیر باخوردوم او مظلوم تشنه لب
گوردوم تکلّم ایلوری آهسته زیر لب
.
بلدوم تمام اولوب بو جهاندان گیدور او دم
گویا حسین او فرقه نی نفرین ایدور او دم
.
بیحال اولان زماندا او مظلوم ایدردی غش
حاله گلوب دیردی ایا قوم، العطش
.
دیلدن دوشوب گلوب دیله سویلردی دشمنه
الله رضاسینه سوسوزام سو ویرون منه
.
بو غملی ماجرانی بیله نقل ایدر هلال
بیر شربه سو گتورماق اونا ایلدیم خیال
.
گلدیم بیانه گتدیم عمر سعده ماجرا
بلدوم سکوت قیلماقینی موجب رضا
.
دوتدوم فرات سمتینی گیتدیم او حالیله
جامی لبالب ایلدیم آب ضلالیله
.
شاید او آبیله اوزیمه آبرو ویرم
جان ویرمه میش او تشنیه بیر جرعه سو ویرم
.
اثنای راهیده دوشوب آفاقه انقلاب
گون تیره لندی گویده منادی ایدوب خطاب
.
بو اهل کوفه حقی فراموش ایدوبدولر
پیغمبرین چراغینی خاموش ایدوبدولر
.
گوردوم او دمده شمر گلور الده خنجری
معلوم اولان قویوبدی اوغولسوز پیمبری
.
گورجاق هلالی شمر خطاب ایتدی یا هلال
سن بو سوئی هارا آپارورسان ندور خیال
.
سویلدیم ایستورم آپارام سو حسینه من
جان تاپشوراندا خدمت ایدم بو حسینه من
.
دوندی دیدی سو ویردیم اونا خنجریله من
زحمت چکوب او تشنه لبه سو آپارما سن
.
دامانین آچدی ویردی حسین باشینی نشان
گوردوم او قانلی باشدان آخار قطره قطره قان
.
#واقف بو غملی واقعه نی ایتگلن تمام
خامه آلیشدی الده ، ایله مختصر تمام
.

#حسینیه_شجاعت
#حسینیه_شهادت
#قتلگاه
#حجت_تمام_قیلدی_او_الله_حجتی
#واقف_سرابی
#ترکی
.
#زبدةالاشعار

?: @nohe_torki