حضرت رقیه سلام الله علیها
.
✍️ #زبدةالاشعار ✍️
.
🆔: @nohe_torki
.
حاج مختار صادق زاده
.
حدیث عشقی من بی قراردن سوروشون
هزاره دن سوز آچین لاله زاریدن سوروشون
.
امیر کشور عشق اولموشام آغام باخالی
اینانموسوز بو گئجه لیل تاریدن سوروشون
.
بوعشق کشورینین غملی شهریاری منم
بو مملکتده نه وار شهریاریدن سوروشون
.
بو سینه مملکت عشق اولوب اورک سلطان
قلم ده کاتب اولوب حکم یاریدن سوروشون
.
اورک قبالسینی وورموشام حسین آدینا
قلمه آند ایچیرم بو شعاریدن سوروشون
.
قلم مقدس اولار گر یازا مقدس سوز
بو سوز منیمکی دگیل کردگاریدن سوروشون
.
خدا اوزی قلمه آند ایچیبدی قرآندا
اونوندی کالقلم و انتشاریدن سوروشون
.
حسینیلن وئریلیب باده مست و مستم من
بو دیدگان نم و اشکباریدن سوروشون
.
گئجه گونوز آغاما آغلارام نه فدری وارام
گئجه لر حالیمی ابربهاریدن سوروشون
.
گلین بو گون هامیمیز بیر قوناق گئدک خانما
اورکده سوزلریزی اول مزاریدن سوروشون
.
سوال اولونسا خانم سن هارا دمشق هارا
دئیر اونی فلک کج مداریدن سوروشون
.
اگر دئسز گوزلیم راه شامیدن نه خبر؟
دئیر گئدین اوچوله نیش خاریدن سوروشون
.
اگر خانم گوره سیز آغلیسیز اوزی دانشیار
دئیر منیم حالیمی آه و زاریدن سوروشون
.
اوقدری صبحه کیمی بو مکاندا آغلامیشام
گزین بو مسجدی گوشه کناریدن سوروشون
.
بابامی وئرمه دیلر بیر دویونجا من دانشام
دئینده ووردی منی نیزده داریدن سوروشون
.
اوقدری دیل یاراسی ووردولار بو یئرده منه
قالیر یاراسی هله قلب زاریدن سوروشون
.
اوشاقین ئولسه آتاسی دئمزله رسمدی بو
ولی بولارداکی رسم و قراریدن سوروشون
.
بولار منیم بابامین باشینی گتیردی منه
ائشیتمیسز ولی من دلفکاریدن سوروشون
.
آچاندا اورتوگی گوردوم لبینده قان قورویوب
نه حالدا دوشدوم اونی انتظاریدن سوروشون
.
دئدیم بابا بو سوسوز لبلرین جراحتی وار
دئدی دئمه باجیما خیزران حکایتی وار
.
ذئدیم یاواش اوپرم لبلریندن اینجمه سین
دئدی قیز اوپسه بابانی بیر آیری لذتی وار
.
دئدیم باغیشلا منی منزلیم محقّردی
نه فرش و بالشی نه جای استراحتی وار
.
یا بوردا قال منیلن یا منی اوزونله آپار
یورولموشام بورادا قالماغین مصیبتی وار
.
دوزوم نه قدری اولار اوچ یاشیندا بیر قیزدا
بو خیردا قلبیمین اّیا نه قدری طاقتی وار
.
اوقدری عمه م آلیب باشیمی او دیزلرینه
دئینمیرم بیبیمه چوخ سوزون خجالتی وار
.
ییغیر کنیزلرینی باشینه یزید قیری
گلیر خرابیه هردن اونون جلاتی وار
.
قولاقدا سیرقالاری گردنینده سلسله سی
لباسی تازه دی خلخالینین ده قیمتی وار
.
خرابه نین قاپسندا دورور اشاره ائدیر
دئییر منیم بابامین قصری وار عمارتی وار
.
من آغ اطاقیده پرقوده نازیلن یاتیرام
سنین ده منزلیوین تکجه قاره تربتی وار
.
ولی داریخما بابا وئرمیشم جوابین اونون
قیزین رقیه دی سینماز کسرلی صحبتی وار
.
او گون گلنده بیبیمدن اجازه آلمیشدیم
وئرم جوابینی گوردوم که آیری نیتی وار
.
دئدیم اوتان او ددَندن ایت اوینادان قیزسان
اوزون دئنن آتاوین هند ایله نه نسبتی وار
.
سنین نَنَن جگرین حمزه نین چکیب دیشینه
ولی منیم ننه مین حق یانندا عزتی وار
.
بیر آزداصبرائله سن آز قالیر اذان دئییله
قولاق وئر اوندا گوررسن کیمین شرافتی وار
.
منیم بابامین اذانلاردا آدی ذکر اولونور
ولی سنین باباوین لعنتیله شهرتی وار
.
گوتور کنیزلریوی گئت گئت منی دانشدیرما
اسیره دیل یاراسی وورماقین نه لذتی وار
.
بئله حقارتیله باخما منده شاه قیزییام
واریدی منده هرنه اساس زینتی وار
.
و لیک کرب بلاده آداملاریز تالادی
باباوا فخر ائله چون افتخار غارتی وار
.
اگر چه شاه قیزیسان ذره جه یوخوندی ادب
ادبسیز انسانی دیندیرمگین کراهتی وار
.
بابام ئولوبدی منه دیل یاراسی وورماگینان
یتیمی خوار ائلَمَز هر کیمین لیاقتی وار
.
سفرده قارداشیم اکبر گلنده گورسه درم
ائله گوزلدی بیبیمدن سوروش نه قامتی وار
.
گلنده شامه منه گوشواره ده آلاجاق
گوررسن اوندا نه قدری منه محبتی وار
.
آلیب قوجاقه منی شامیده دولاندیراجاق
باجینین اولماسا قارداشی دوزدی خفتی وار
.
باخیب منه دئیه سن اوندا بختور باشیوا
کیمین بئله اوجا بوی قارداشی وجاهتی وار
.
گل ایندی اهل عزا سینه داغلیاق باهم
باخین بو آل یزیدین نه جور جنایتی وار
.
سالاخ یادا او بالا غصّه مرگ اولان گئجه نی
گورک نه قدری او نازدانه نین مصیبتی وار
.
#حضرت_رقیه_شهادت #مختار_صادق_زاده
#حدیث_عشقی_من_بی_قراردن_سوروشون
#ترکی
.
✍️ #زبدةالاشعار ✍️
.
🆔: @nohe_torki
نظر دهید