مبعث
.
.
علی شهودی
.
.
حرادن مگر مهر انور گلیر
ائدیبدیر جهانی مسخر گلیر
.
دوتوب پرتو حسنی عالملری
ائدیب کایناتی منور گلیر
.
مگر یول سالیب باغ رضوان دن
جهانی ائدیبدیر معطر گلیر
.
چکیب صف ملکلر اوپه مقدمین
کی اهل سماواته سرور گلیر
.
یاییر گویلره نوررحمت یوزی
نشاطه مه و مهر و اختر گلیر
.
ندا گلدی ای اهل عالم بیلین
حریم حرادن پیمبر گلیر
.
قویوب باشه تاج نبوت نبی
چکیب ملک ظلماته لشکر گلیر
.
وئریر داغ داش اول شاه دینه سلام
بوتون وجده بحر و بوتون برگلیر
.
بو درگهده یوخ آغ قره فرقی بیر
بو درگهده سلطان و نوکر گلیر
.
عربله عجم بوردا جان بیردیلر
کی سلمانه قارداش ابوذر گلیر
.
جهاندان کوچور یاس و جهل و نفاق
فروغ امید یله باور گلیر
.
اوچور بوم اندوه ویرانه دن
همای سعادت آچیر پر گلیر
.
سالیب لرزه ارکان کفره فری
ائدیب لات و عزانی مضطر گلیر
.
قولاق وئر بوتون یئر گویی دولدوروب
ایشیت بانگ الله اکبر گلیر
.
قوری چشمه لر جان تاپیبدیر آخیر
سارالمیش بوداقلاره نوبر گلیر
.
نبوت تاجین باشه قویموش نبی
آلیب ساغ سولون حمزه ، جعفر گلیر
.
بو کالای دینه اولان مشتری
اولده خدیجیله حیدر گلیر
.
نه سحر و اساطیر اولوب کارساز
ائدیب دعوت حقّ محشر گلیر
.
اولوب فتح و نصرتله دائم قرین
آلیب بیر به بیر قلعه ،سنگر گلیر
.
ییتیب باشه عهد ضلال مبین
اولان اهل ایمانه رهبر گلیر
.
جوشوب لبلریندن حیاتین سویی
کی پابوسه خضر و سکندر گلیر
.
نه تهدید و تطمیع اولور کارگر
نه غالب حقه کید و کیفر گلیر
.
دییب بیر بیره جهل و ظلمت ،گوزه
نه زور ائیلییر جلوه ، نی زر گلیر
.
بو مکتبده معیار تقوادی بس
کیمین واردی تقواسی برتر گلیر
.
نه قصد ریاست نه قدرت ائدیب
منادی عدل و برابر گلیر
.
کی کفرون بوگون پانبیغین وورماغا
خلیل اوغلی چیگنینده آذر گلیر
.
قَسیمٌ جَسیمٌ نَسیمٌ وَسیمٌ
گلین صاحب وجه انور گلیر
.
مُزّکی مذکِّر مُعلّی مُطاع
موقفی و منصور و منذر گلیر
.
بوگون رحمه العالمین مصطفی
اولوب جیش ظلمه مظفر گلیر
.
#علی_شهودی #پیامبراسلام #مبعث_ترکی #زبدةالاشعار
نظر دهید