حسینون عاشقیم …
.
.
محمد علی مُصَیّبی تبریزی
.
حسینون عاشقیم من صفاسی خاطرینه
ال ئوزمرم اتگیندن عطاسی خاطرینه
.
حیاسیزام ولی بئل باغلادیم حیالی کسه
دوتار منیمده الیمدن حیاسی خاطرینه
.
اسیر بادۀ عشق حسین اولوب ئورگیم
دوشوبدی تاب وتبه کربلاسی خاطرینه
.
دوایه باغلامارام بئل غریق درد اولالی
بلا چولونده کی خاک شفاسی خاطرینه
.
بوش اللریم آچیلوبدی او باصفا حرمه
او آلتی گوشه لی قبرین نماسی خاطرینه
.
عزاسینه گئدرم گوزیاشیمداغرق اولارام
حصار قبرین اولان ماجراسی خاطرینه
.
کرملیدی من ِبدکاری طردائدوب قووماز
اقلّی شاه ولایت آتاسی خاطرینه
.
حسینون آدی دوادی اگرچه هر درده
بو آدی سسله مرم من دواسی خاطرینه
.
نیه؟بوعلته کی؛هرزادیم حسیندی حسین
جانیم فدا اونا اولسون رضاسی خاطرینه
.
عنایت ایلیه ازّل منیم یوزوم آق اولا
اولان بواگنیمه زینت قراسی خاطرینه
.
عزاسی محفل اخذ وقاریدور آقامون
گلن ؛ وقار آپاروبدور عزاسی خاطرینه
.
قالا بو عزت و جاهیم همیشه پابرجا
اوآلتی گوشه لی عزت سراسی خاطرینه
.
گوزوم بو دارفناده کور اولماسین یارب
آخان گوزیمدن عذاره بکاسی خاطرینه
.
دیولـله گوزیاشینون وامداری زهرادی
شفاعته سبب اولموش بهاسی خاطرینه
.
حسین فاطمه دن ئوزمه ال«مصیبی»سن
عنایت ایلیه بلکه آناسی خاطرینه
.
یازاندا آدون حسینون ریا سؤزه قاتما
آناسی فاطمه نین مرحباسی خاطرینه
.
#حسینیه_مدح
#حسینون_عاشقیم_من_صفاسی_خاطرینه
#مصیبی_تبریزی
#ترکی
#زبدةالاشعار
نظر دهید