«غارت خیام»
.
✍️ زبدة الاشعار ✍️
?: @nohe_torki
.
محمد علی مصیبی تبریزی
.
حسین جان آچ گوزون دشت بلا میدان غارت دور
نه غارت ! آند اولا آللهه غوغای قیامت دور
حسینیم وای حسینیم وای …
.
وئروبدورغارته سعداوغلی فرمان خیمه لر یانسون
یارالی قانه باتمیش خسته جان پیکرلر آتلانسون
همان بو آتلار آتدا تشنه لب قیزلار ایاقلانسون
نئدوم قیزلار امان تاپسون بولار سندن امانت دور
.
وروللار قیزلاری ، بیرکیمسه ائتمور اعتنا قارداش
جدا باشینده قرآنیندن ائتموللر حیا قارداش
نه دشمن رحم ائدور نه دیزلریمده وار قوا قارداش
حیاسیز کوفیانه فرصت دشت غنیمت دور
.
وفاسیز کوفیاندان زینبین چوخ سوزلری واردی
بولار بیر کسدیلر هر هرزه فعله یوزلری واردی
باشیمدا قاره بیر معجرده حتی گوزلری واردی
غریبه بی حیا و هرزه و اسگیک جماعت دور
.
بولار ئوز نفعینه تفسیر ائدوللر دینین احکامون
وروبلار اود یانوبدور آتش ظلم ایچره اخیامون
کفن سیز اولدی صحرای بلاده قانلی احرامون
قوم اوستونده کفن سیز پیکرون تندیس عزت دور
.
وروبلار خیمۀ سجّاده اود مخیم الولاندی
آلیشدی نار ِ غارت جامۀ سجّادون اودلاندی
مریض و ناتوانیدی عمامه اود دوتوب یاندی
ائدن بی تاب او آتش دن منی بحث امامت دور
.
بو گیر و داریده جان فکرینی باشیمدن آتدیم من
امامت سرّینه خاطر بهاسیز جانی ساتدیم من
باسوب آغوشه بیماری یانان اوددان چیخاتدیم من
آنام زهراکیمی بیلدیم نه اود دور هانسی صحبت دور
.
بو بیر آتش دی یثربدن آلیشدی تا بورا چاتدی
او گون کی فرقه ثانی بیزیم درگاهه اود آتدی
نه تک زهرانی بلکه حیدر کرّاری آغلاتدی
همان اود دور کی دامنگیر بیت آل عصمت دور
.
حرارتدن شماتتدن اولوبدور قلبیمیز یاره
وئرن یوخ جرعه بیرسو یابن زهرا بو سوسوزلاره
ایراق عباسیدن ، سندن ووروللار قمچی قیزلاره
نه استظلام و دعوا بلکه اوج خوف و وحشت دور
.
دگنده قیزلارا قمچی سپر اولموشدی قوللاریم
او اندازه دگوب یاره پوزولدی رنگ رخساریم
قرالدی جسم بی تابیم اولوبدور پاره طوماریم
عدو قرخ مین شرف سیز لیک حریفی تک بیرعورتدور
.
اولوبدور تازیانه قیزلارون ساشلارینه شانه
بو قوللار ضرب قمچی دن یانوب چون پرِّ پروانه
تلالو ایلوری باشون چُنان شمع حرمخانه
یارالی باشیوه قربان ، تسلّی بخش نهضت دور
.
عزیزیم زینبین تیکمز گوزون دامان اغیاره
پوزولموش سوسنه بنزر کورک یاره ئورک یاره
بو دشت پرتلاطم ده وئرر زینب ئورک ، یاره
طبیبیم دور کی ازّلدن سنون حُکمین طبابت دور
.
«مُصَیب»غارت احوالین یازانمازسان هراس ایله
سوزون یاز جوهرین امّا ئورکدن اقتباس ایله
یازاندا سوز ، یانان دربار شاهه التماس ایله
دئنن دنیا سوزیم دردیم قیامتده شفاعت دور
.
#غارت_خیام
#حسین_جان_آچ_گوزون_دشت_بلا_میدان_غارت_دور
#مصیبی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید