کربلا
#گریز به #قتلگاه
.
.
مرحوم حاج محمد علی نیکوکار (تایید تبریزی)
.
.
نه کربلا آدی عالمده گلستان بهشت
آدینون عاشیقدور جمله ساکنان بهشت
.
نه کربلا غم هجرینده شیعه لر آغلار
صباح و شام یوزه گوزیاشین باغلار
.
نه کربلا که اونون تربتی مریضه شفا(1)
او قانلی توپراقی عالمده دردمنده دوا
.
نه کربلا که اونون تلّ زینبیّه سی وار
او تلّیده خانمیم زینبون حزین سسی وار
.
همان او یر خانمین گوز یاشی آخان یریدی
یارالی قارداشینا بویلانوب باخان یریدی
.
همان او یرده آلوب اصغری رباب الینه
خیامی چوخ دولانوب گلمیوبدی آب الینه
.
او یرده تیر بلا قلب زینبی دلدی
حسین دئیه دئیه قارداش هراینه گلدی
.
او لشکری که اونون فکری قتل و غارتیدی
یقین او ساعت او گون کربلا قیامتیدی
.
او هایهوده زهرا عزیزه سی زینب
نه نوعی تاپدی باجی قارداشین او گون یارب
.
یتوب نه گوردی خدایا که گورمسون گوزلر
یارالی قارداشی جان اوسته باجیسین گوزلر
.
او گیر و داریده زینب ایتیرمیوب اوزونی
تلاش ائدردی باجی باغلیا حسین گوزونی
.
مگر او حالیده شمر دنی امان وئردی
شقاوتین او دنی زینبه نشان وئردی
.
ایا امام زمان ای امام کون و مکان
نه چکدی عمّن او گون من اولوم سنه قربان
.
الینده خنجر برّان اوزی قوی دشمن
نه نوعی کشمکش اولدی او حاله آگهسن
.
او ظالمین اَل آتوپ دوتدی خنجرین ناگاه
تکان وئرنده نه غم یوز وئروب امان الله
.
بویاندی اللری قانه چکوبدی شمریدن اَل
دوباره ایلمدی قاتلیله جنگ و جدل
.
مدینه سمتینه دوتدی یوزون او اثناده
آناسی فاطمه نی سسلیوبدی امداده
.
دئیردی گل آناجان باخ گوزومده گوزیاشیما
ترحّم ائتمدی دشمن یارالی قارداشیما
.
گوزوم باخا باخا قارداشیمین کسور باشینی
باجی نه حاله قالار گورسه بیله قارداشینی
ـــــــــــــــــــــــــــ
(1)- أَلسَّلامُ عَلى مَنْ جَعَلَ اللهُ الشّفآءَ فی تُرْبَتِهِ،(زیارت ناحیّه مقدّسه)
.
.
#کربلا
#آرزوی_کربلا
#قتلگاه
#نه_کربلا_آدی_عالمده_گلستان_بهشت
#تایید_تبریزی
#ترکی
#زبدةالاشعار
نظر دهید