ذکر توصیف شهور محترم و اشاره به ظهور حضرت قائم آل محمد(ص)و #گریز به مجلس یزید ملعون
ــ
?: @nohe_torki
مرحوم میرزا عبدالوهاب حقیرخویی
حکیم حکمت اوزیله قویوب بو آیلارا نام
شهور محترمه قویسون احترام انام
علاوه آیلارا ایّامده تفاوت وار
شرافیت سَبَبیندن دگول محلّ کلام
نجه که لیله ی قدر اشرف لیالی دور
اونون نظریدی هم جمعه سیّدالایّام
شریف امکنه دن بیر حرمدی بیت الله
بقاع طیّبه دن ارض کربلادی مرام
بیان واقعه ی عدة الشّهوره خبر
اولوب مقدّمه اثنا عشرده شهر صیام
توکندی ماه رجب گلدی نیمهٔ شعبان
که آخر رمضاندا اولا سه ماهه تمام
عزیز آیدی بو آیلار گرک عباداته
اولا بو ماه مبارکده میل خاص و عوام
بو آی پیمبره وار نسبتی اؤزی بویوروب
تحیّتیله منه گوندرون بو آیدا سلام
شب براتیدی بو لیله ی مبارکه ده
گلوب ظهوره تولد اولوب امام همام
بو محترم گجه نین قدرینی چو لیله ی قدر
ائدوب عظیم اولور آمرزش ذنوب عظام
وجود صاحب عصری زمانه خلقینه حق
شب برات برات نجات ائدوب انعام
نزول ائدوب کی ائدوب رحمتین بیزه نازل
وجودینین سببیندن خدای ذوالاکرام
اون ایکی برجی ائدوب سیر آی به آی دولانوب
اولوبدی گون کیمی طالع اولاندا بدر تمام
منوّر ایلیوب آفاقی آفتاب کیمی
ولیک ماه کیمی سیر ائدر بولوطدا مدام
وئرور بو عالم سیرنده سیر افلاکه
ظهور ائدنده وئره نظمیله جهانه نظام
زمانه نی ائده جاق نور عدلیله مملو
دوتاندا یر یوزینی کفردن ظلام ظلام
دگل قلوب خبردار سرّ غیبتدن
اؤزون بو سرّدن آگاه ائله یا علّام
توکندی شیعه لرین انتظاریدن صبری
زمان مصیبتی از بسکه اولدی طول انجام
حضوری وار اؤزی غائب امام حاضردور
دوشوب سبب ندی تأخیره بس ظهور امام
قالوبدی یرده شهیدان کربلا قانی
دونوبدی قانه گوگل لرده قالمیوب آرام
بنا علی خبر کل یوم عاشورا
و کل ارضه گوره کربلادی کلّ مقام
دلیلیم الده دی یوماً فیوم هر گونده
اولور شهید جفای قوم لئام
دوتوبدی عالمی ظلم یزیدیدن ظلمت
اماندی وقت فرج دور ضعیف اولوب اسلام
غلاف غیبت کبرا فداک یامولا
نه وقته تک اولاجاق تیغ انتقامه نیام
سنه نهان دگل ای عالم شهادت و غیب
او ظلملر که ائدوب اشقیای کوفه و شام
یتوردی حدّ کماله یزید نقصانین
کمال نقصیله اؤز ظلمینی ائدوب اتمام
شهور محترمین احترامی ایله قتال
اولوبدی اربعه ی اشهر الحرمده حرام
ولی معاویه اوغلی حرامی بولدی حلال
پوزولدی عاشر شهرالحرامیده احکام
محرّماته که نصّ صریح وارد اولوب
صراحتاً ائدوب انکار ایلدی اقدام
بساط نرد قاباقدا شراب بیر یاندا
برابرینده قیزیل طشت ایچینده رأس امام
حریف بزمیله مشغول بازی شطرنج
بقای سکریله مخمور مست شرب مدام
خطاب ائدردی اولاندا حریفینه غالب
درنگ ایلمه ساقی گتور می گلفام
چو عقلینی اثر باده دن وئروب باده
غرور سلطنت و کامرانی ایام
گوزی گوزینده امامین الینده ساغر می
باخوب امامه گولردی چکردی باشینه جام
خمار خمریله بد مستیلیق گچوب حددن
بیر اؤزگه نغمه چالوب چون خروس بی هنگام
کنایتاً دئدی جدّون حرام ائدوب هرچند
منه حلالیدی ساغر الیمده دور مادام
کسیک باشیلا بو بزمه سلامه خوشگلدون
بو گلماقون سنه زحمت وئروب ولی منه کام
روادی سن باشون اوسته ایاقیمه گله سن
باشاردوقوم قدری ائتمیم سنه اکرام
گلور نقدر الیمدن لوازم حرمت
برین اسیر کمرم سندن ای سلیل کرام
قصاص بدر و حنین آلماقین بوگون گونیدور
الیم شل اولسون اگر بیرجه سینده کسر قویام
دئدی گئدون گتورون چوب خیزرانی منه
آلوب اله او زنازاده ی نمک به حرام
ائدوب پیمبر اؤپن یرلره خلاف ادب
او وقت قالمادی زینبده طاقت و آرام
دئدی الین قوروسون بسدی وورما ال ساخلا
دوروب حرملری ای بی ادب باخولّا تمام
خروش شیون اطفال سالدی مجلسه شور
او گون او بزمیده گویا قیامت ائتدی قیام
مخلّد ایله خدایا شرار قهرونده
نقدر نار جهنّمده وار خلود دوام
«حقیر» ختم ائله کافیدی هول خاتمه دن
حسین آدی اولا ختم نفسده ختم کلام
#مهدیه
#مجلس_یزید
#حکیم_حکمت_اوزیله_قویوب_بو_آیلارا_نام
#حقیر_خویی
#ترکی
✍️ #زبدةالاشعار ✍️
?: @nohe_torki
نظر دهید