زبدةالاشعار

خامه ایستور نقش ایده دفترده نام زینبی #زینبیه_آسال_اردبیلی

حالات حضرت زینب سلام الله علیها
.
✍️ زبدة الاشعار ✍️
.
🆔: @nohe_torki
.
#آسال_اردبیلی
.
خامه ایستور نقش ایده دفترده نام زینبی
یوخ توانی یازماقا گرچه مقام زینبی
بی گمان هرکس یازانمز احتشام زینبی
ایستیور اولده یاری خالق قهاریدن
اولمیا شرمنده خامه زینت کراریدن
.
.
زینبون اوصافی فوق منطق و ادراکیدور
دامن عنبرفشانی معصیتدن پاکیدور
مجلس عدوانیده زهرا کیمین بی باکیدور
گورمیوب گورمز اونون تک قهرمان چرخ فلک
افتخاریلن أوپر خاک قدومیندن ملک
.
.
شامیده یا مصریده ظاهرده بو مدفونیدور
باطنا أوز دینینه ایمانینه مفتونیدور
هم تشیع هم تسنن زینبه مدیونیدور
اولماسیدی انبیانون زحمتینی بر بادیدی
نام زینبدن دی کی دینون اوی آبادیدی
.
.
ویرمدی فرصت عدوی کین شعارو غافله
کربلادن شامه جک اولدی امیر قافله
ناقه لر اوسته خانم قیلدی نماز نافله
دادگاه عشقیده دوزدی غمه محکومه دی
هر نه دیلر قوی دیسونلر بو خانم معصومه دی
.
.
زینبون آدین گرک مریم باشیندا تاج ایده
حقی وار الطافینه هاجرلری محتاج ایده
عشقینی بازار عشاق ایچره گر حراج ایده
عشقینه شایسته هانسی خلق اولان قیمت ویرر
چونکی زینب عشقینین قدرین فقط الله بیلر
.
.
بی گمان احسن دیوب اغیار و دشمن زینبه
لطفینی اعطا ایدوب ذات مهیمن زینبه
بی معلم عالمه حاشا دییم من زینبه
ویرمیون نسبت بونی صاحب جلالت زینبه
ویرمدی زهرا مگر درس شجاعت زینبه
.
.
محضر جانانیده قوردی خواتین انجمن
بحثیدی آرتار نه فعلیلن جهاندا قدر زن
حفظ عفتلن دیدی زهرا عزیز پنج تن
عفتون قدرین اوگون زهرا گر احیا ایلدی
فاطمه طرح ایتدی اما زینب اجرا ایلدی
.
.
هیچ زمان گوسترمدی زینب یوزون اهل شره
چون باخانمز شعشعات آفتابه شب پره
عصمت اللهین قیزی معجر ویرر قاتل لره
عفتون زیبا گلون زینب بلی تر ساخلادی
ویردی عباسین ولی باشینده معجر ساخلادی
.
.
ایستدی زهرا آناسی باشدان آچسون معجرین
تیتردوب ذات الهی مسجد پیغمبرین
باش آچیق گورسه اگر اعدا بتولون دخترین
کیم دیور خشم الهی او زمان مستور اولار
زینبون زلفین گورن گوز تاقیامت کور اولار
.
.
امر واضح دی مورخ پایه سیز سوز چوخ دیر
وار دلیلیم اهل منطق بوسوزی تأیید ایدر
بی حجاب عورت نجه تبلیغ اسلام ایلیر
اهل دین باری گرک راه خطادن گتمیه
زینب عالی جنابه شیعه توهین اتمیه
.
.
چونکی زهرانون عفاف و عصمتی زینبده دی
قولسوز عباسین سراسر غیرتی زینبده دی
خیبری فتح ایلین شه قدرتی زینبده دی
سیل گوزون یاخجی تانی زهرای اطهر مظهرین
کیم ده قدرت وار چکه زینب باشیندان معجرین
.
.
اللی بش ایل عمر ایدوب بو افتخار بوالحسن
اللی ایل اولدی انیس و همدم و دردو محن
چشم دوران گورمیوب زینب کیمین بیر غم چکن
تازه ایستوردی بیله بو قهرمان سوت دادینی
سسلدی طاها بونون ام المصایب آدینی
.
.
یعنی بیر غم یوخدوکی ام المصایب چکمیه
یوخدی بیر نخل مصیبت دلده زینب اکمیه
اولمادی بیر گون عذاره اشک حسرت توکمیه
بش یاشیندا أولدی زهرا سینه سین غم داغلادی
او زماندان یعنی زینب باشه قاره باغلادی
.
.
یادیمه زینب آدی سالدی اسفلی بیر خبر
بو خبر بولدی یارالی قلبیمی اوخدان بتر
نقل ایدور سلمان طاهر بو سوزی اهل نظر
بعد زهرا داخل اولدوم بارگاه حیدره
خاضعانه بیر سلام ایتدیم او والا محضره
.
.
گوردی بیر صحنه گوزوم کی قلبیدن گیتدی دوام
ایلیوبدور قیزلاری مولا دیزین اوستون مقام
ساق سولوندا اگلشوب گوردوم ایکی زیبا امام
عرض قیلدیم حیدره ای سرور کون و مکان
ای امیر بی نظیر مومنات و مومنان
.
.
واردی بیر سوز اوخ مثالی قلب سلمانی دلر
بو جهانه یا علی ای یاور خیرالبشر
یعنی زهرادنده آرتیق غم چکن بانو گلر
همدم اولدی گوردوم اوندا آه و افغانه علی
گوزلریلن زینبی گورستدی سلمانه علی
.
.
اوهمان زینب کی نازیلن بویوتدی مرتضا
قدینی اگدی اونون اما بلای کربلا
ایتمدی حرمت اونا بیلمم نیه دست قضا
بعد عاشورا ایدوب احیا حسینی مکتبی
بیرده شاماته گتیردی چرخ دوران زینبی
.
.
عرشیدن فرشه گتیردی زینبی چرخ فلک
کیم دیور جان ویردی زینب شامیده شهزاده تک
یدی قارداشدان اونا بیر قانلی کوینک قالدی تک
باسدی قانلی کوینکی هی باغرینا ای وای دیدی
کربلاده دوغرانان قربانلارا لای لای دیدی
.
.
جان ویرن وقته دیدی ای پیک خلاق ازل
پیکر بی روحیمی گل راحت ایله ای اجل
زنده قالماقدان علامت تک نفسدور داده گل
چونکی عشقین عالمینده حقه زینب سان ویروب
ایل یاریم بوندان قاباق مقتلده زینب جان ویروب
.
.
احتضارینده خانم ام القرایه باخمادی
یا کی قبر مرتضا شیر خدایه باخمادی
یوخ دلیم گلمور دییم کی کربلایه باخمادی
یوز دوتوب گوداله ساری سسلدی ای شاه نور
یدی قارداش باجی سی ایندی آدامسیز جان ویرور
.
.
جان ویرن وقته ننم زهرا حسینیم،وای دیدیم
یا أولن لحظه بابام حیدر اونا لای لای دیدیم
گوز یومان وقته حسن بسدور مصیبت دای،دیدیم
کربلانون محنتی کیم دی توانیم آلمادی
باغلاسون زینب گوزون باری رقیم قالمادی
.
.
ایل یاریم قارداش سنون احوالووه قان آغلادیم
نوحه خوان اولدوم أوزوم قلب جهانی داغلادیم
نصفی یانمیش خیمه ده شام غریبان ساخلادیم
شهر شامه ایندی گل ای شاه مردان یا حسین
سنده ساخلا زینبه شام غریبان یاحسین
.
.
من سنه خاطر حسین میندیم او عریان محمله
من سنه خاطر حسین صبر ایلدیم زخم دله
من سنه خاطر اسیر اولدوم سپاه قاتله
فکر منتلن حسین حاشا بو اعمالی دییم
بو وظیفمدی ولایتدن حمایت ایلییم
.
.
افتخاریمدور سنون تک شهریاریم وار حسین
نهضتوندندی نقدری اعتباریم وار حسین
سن منیم أوز قارداشیم سان انتظاریم وار حسین
ایستورم وصلت تلین بیر یول حوروب اوندان أولم
ایستورم بیر یولدا عباسی گوروب اوندان أولم
.
.
زینبم من حقووی اهل جفادن آلمیشام
نطق آتش باریلن شاماته لرزه سالمیشام
ایندی سوز توتمور دلیم،باخ گور نه حاله قالمیشام
کربلادن شامه جک دایم ویریلدیم یا حسین
بیر دعا ایله أولوم والله یورولدوم یا حسین
.
.
ای (نوید) ایجاد ایله عشق و صفانون پللارین
قلبیدن قطع ایله سن کبر ومنیت خوللارین
سسله یا رحمان اوزون آچ شهر شامین یوللارین
چون بوگون عاشقلره بیر یوم محنت باریدور
زینبون یوم وفاتی قبری بی زواریدور
.
#زینبیه_مدح
#زینبیه_شهادت
#خامه_ایستور_نقش_ایده_دفترده_نام_زینبی
#آسال_اردبیلی
#ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  مژده ویرون مژده ی دیگرگلور #اصغریه_محمدی_ناعم

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی