خبرنگار زمان اوایل اسلام #حیدریه_حسینیه #انور_اردبیلی

کشته شدن عَمرو توسط امیرالمؤمنین(ع) و گریز به آمدن حضرت زینب(س) در قتلگاه
.
زبدة الاشعار

?: @nohe_torki
.
مرحوم انور اردبیلی
.
خبرنگار زمان اوایل اسلام
یازوبدی بو خبرون متنینی ائدوب اعلام
.
ائشیتموسوز بیلوسوز نثرینی منابرده
او نثره خامه ولی نظملن چکور پرده
.
نظر بودور که اولا مطلبون مقدمه سی
سؤزه قولاق آسانون آرتا قلبیده هوسی
.
گتور خیالیوه بو یرده جنگ احزابی
رسول ایزدی گور سن دالیندا اصحابی
.
او جبهه ده قوشونی چوخدی قوم کفّارون
شکست حالیده دور لیک حالی اخیارون
.
گلوب او جبهه ده عمرو لعین آچوب پرچم
قالوب محاصره حالینده حضرت خاتم
.
قازوبلا خندق اگرچه جوار لشگرده
سپاه ختم نبی جمع اولوبدی بیر یرده
.
او وقته عمرو لعین کبر باده سین ایچدی
وروب آتینی او وسعتله خندقی کچدی
.
بوئیدی فکری رسول خدانی خوار ائتسون
سپاه تازه ی اسلامی تار و مار ائتسون
.
ظهور ائدوبدی او ساعتده قدرت ازلی
مرامه قویمادی یتسون اونی علینون الی
.
اجازه اخذ ائلیوبدور رسول اکرمدن
قوتاردی لشکر اسلامی غصه و غمدن
.
دل جهانه آچوب پرچم حقی ویردی
پیاده گلدی حریفیله روبرو دوردی
.
گوروب علینی او حالتده عمرو بی پروا
دئدی ندور بئله گلمکده نیّتون آیا
.
بویوردی شیر الهی او ضد معدلته
مبارز ایستیوسن گلمیشم مبارزته
.
ولی بو شرطیله سنده پیاده اول حالا
مقابل ایکی لشکرده ایلیک دعوا
.
ائشیتدی بو سؤزی عمرو لعین غضبلندی
آت اوسته قالمادی تعجیلین یره اندی
.
دولیدی قلبی ز بس آتش خباثتدن
آتینی پیلدی یخدی ترابه نخوتدن
.
مقابل اولدی ولیّ خدایه سؤز چوخدور
نه نوعی جنگ ائلیوب شرحه فرصتیم یوخدور
.
فقط بونی دیه بوللم که اندی شمشیری
یارالی حالدا علینون اوجالدی تکبیری
.
حسینده کرب و بلاده دیوبدی بیر تکبیر
سسینی درک ائلیوب زینب اولماسون دلگیر
.
علی خلاصه حریفی دولاندیروب سیخدی
وروب بودونی قلم ائتدی تپراقا یخدی
.
همان او ضربتیله زنده ائتدی احکامی
همان او ضربتله روحه گتدی اسلامی
.
علی ئوزی او ستم پیشه نون آیردی باشین
خیال ائتمه ولی نیزه اوسته وردی باشین
.
طریق دینیده ظلم و جفاده دورمازلار
کسوک باشی بلی نوک جدایه ویرمازلار
.
سپاه کفرون علی سیندیروب داخی کمرین
باجیسی عَمرون ائشیتدی قتالینون خبرین
.
چیخوب ئوزیندن او ملعونه آز قالوب ئولسون
یولا یولا باشینی گلدی قارداشین گورسون
.
دیلینه مانع اولان یوخدور اوخشاماق اوسته
باشینا قمچی ویران یوخدی آغلاماق اوسته
.
یتیشدی قارداشینون نعشی اوسته آغلاماقا
گلن یوخیدی اونون قوللارینی باغلاماقا
.
گورنده قارداشینون نعشین حیرت ال وئردی
هامی لباسلرین جسمیده باخوب گوردی
.
سویولمیوب زرهی گرچه قیمتی چوخدور
هامی لباسی سلامتدی ناقصی یوخدور
.
سیلوبدی گوزلرینی سینه سینی داغلامادی
باجی برادرینون نعشی اوسته آغلامادی
.
عزا دئدی سنه قارداش ئولینجه ساخلامارام
نجیب شخصون الینده ئولوبسن آغلامارام
.
اگرچه نفعینه قارداش تمام اولوب بو جدل
کریمیمش نه عجب ورمیوب لباسیوه ال
.
اولیدی غارت اساسون قالاردون عریان سن
باشیمدا قویمازیدوم توک قالا یولاردوم من
.
#گریز #قتلگاه
.
مقدمه قوتاروب گلدی مطلبون باشینا
دولاندی سؤز گینه مظلومه زینبون باشینا
.
گورک تاپاندا حسینی نه حالیلن تاپدی
یارالی پیکرین آیا جلالیلن تاپدی
.
اونوندا واریدی آیا لباسی اگنینده
سویولمامیشدی قالوردی اساسی اگنینده
.
یانور منیم اورگیم یاندیران سؤز اوستونده
حسینی تاپدی بلی زینبی یوز اوستونده
.
تانیمادی غم اودی قلبینی آلیشدیردی
قسم ویروب آناسی حقینه دانیشدیردی
.
اول قویوب دوداقین تشنه حنجرین ئوپدی
کچوبدی صاق صولونا قانلی اللرین ئوپدی
.
دئدی حسین بو نه حالتدی زینبون ئولسون
هایاندا قالمیش آنام فاطمه سنی گورسون
.
یارالی باشون هانی من ئوپوم سوسوز لبوی
تانیمادیم سنی اول باغیشلا زینبوی
.
سسیمه سس وئر حسین آه و نالم عرشه چیخوب
ندور دلیلی سنی قاتلون یوز اوسته یخوب
.
قالوب نه حالته گور قتلگهده گل بدنون
الوی بارماقوی باشوی کسوبله سنون
.
سوزوم اولاردا دگول بس نیه سویوبلا سنی
گون ایستیسینده بئله بی کفن قویوبلا سنی
.
زرهوی دئمورم غارت ایلیوبله نیه
فقط بو دردوه زینب چتین دوام ائلیه
.
اورگیمون باشینا داغ آتشین قویولوب
او کهنه پیرهنون قیمتی ندور سویولوب
.
نه ارذل آدم الینده ئولوبسن ای سلطان
یوخوندی پیرهنون پیکروی اورتوب قان
.
بو پیکری که قالوب گونلرون قباقینده
نقدری وار نفسیم آغلارام فراقینده
.
گوزیمده اشکه امان وئرمرم باجون ئولسون
آچوب بو ساچلاریمی هورمرم باجون ئولسون
.
قوتارمیان غموی ساخلارام اورکده سنون
الیمه گلسه اگر دورت مین اوخلی پیرهنون
.
او کوینگه باخارام سینه داغلارام قارداش
اورگیمون باشی اوستونده ساخلارام قارداش
.
باجیلارا باجیلیق عشقیمی نشان وئرّم
او پیرهن اورگیمون باشیندا جان وئرّم
.
نقدری شرح ائده سن« انورا» بو مطلبدن
ئولینجه گر یازاسان شرح حال زینبدن
.
قوتارمیاندی قوتارماز سوزون تمام ایله
او غصه دن آغاران ساچلارا سلام ایله

.
#حیدریه_شجاعت
#حسینیه_شهادت
#خبرنگار_زمان_اوایل_اسلام
#انور_اردبیلی
#جلوه_عاشورا2_انور
#ترکی
.
#زبدةالاشعار

?: @nohe_torki