اربعین
زبانحال حضرت زینب (س)
.
.
مرحوم نجمی تبریزی
.
.
ای روح روان مهری بقا توشه سی قارداش
آرام آپاران مرقد شش گوشه سی قارداش
.
.
شوریله گلوب قبریوه زینب دیه دردین
اشکیله سپه سو، سیله مژگانیله گردین
.
.
بو قبریده زهرا آنامون روحی یاتوبدور
صد پاره قرار دل مجروحی یاتوبدور
کشتیّ نجاتین یارالی نوحی یاتوبدور
ای ظلمیله دریای بلا غرقی حسینیم
ناله م بوریوب غربی دوتوب شرقی حسینیم
.
.
تا گوردی گوزوم توزلی بو شش گوشه لی قبری
غم لشگری تاراج ایلدی کشور صبری
شرمنده گوزوم یاشی ایدر بارش ابری
بو قبردی یا طایر دل لانه سیدور بو؟
یا محنت و اندوه و الم خانه سیدور بو؟
.
.
ای خاک دری چشم دله کحل بصیرت
آغشته اولوب قانویله یوخسا بو تربت
اسدیقجا صبا پخش ایدوری عالمه نکهت
بو دشتی ختا دشتینه بیر رشک ایدوب عطرین
اشکیله دولی گوزلریمی مشک ایدوب عطرین
.
.
ای کاش باجون حشره کیمی زنده قالیدی
مسکن بو بیاباندا ایدوب عطرین آلیدی
بو قبریوه زلف سریله سایه سالیدی
حسرتله یانیدی اؤزی گونلر قاباقیندا
گول تک سارالیدی یوزی گونلر قاباقیندا
.
.
وار علّتی قانیله باجون قلبی دولوبدور
بو قبریوه باخدوقجا گول رنگی سولوبدور
بیر قبر که باشیسز بدنه مدفن اولوبدور
نیلدوردی او باش داشینی باش داشیوه قربان
داشلار هدفی پیکریوه باشیوه قربان
.
.
دنیا بویی پخش ایلیه جاق نور مزارون
پر شور ایده جاق دللری پر شور مزارون
بیر گون اولاجاق شهلره منظور مزارون
چون کعبه طواف ایتماقا قبرون گله جاقدور
زینب کیمی مژگانیله گردین سیله جاقدور
.
.
بیر خط یازیلوبدور آنام اوغلی بو مزاره
هر کلمه سی هر سطری سالور اود دل زاره
هر کیم بخا بو خطّه آخار اشکی عذاره
حشره کیمی دیوان غم عنوانیدی بو خط
جان ویرماقوین تشنه لب اعلانیدی بو خط
.
.
ای قانی آخان سو یرینه گلشن دینه
اوچ گوهری بو گنج ایدوب آرایش سینه
اولماز بیرینون قیمیتی مینلرجه خزینه
قربان ایاقون آلتدا یاتان جوهر جانه
سینونده کی گنجینه اولان گوهر جانه
.
.
بلبلدی باجون غنچۀ خندانیوه قارداش
پیرایه ویرن سینۀ شان شانیوه قارداش
صدرونده کی قانی قاریشان قانیوه قارداش
مین عالم او بیر غنچه گولین عالمی واردور
قان قطره لریندن دوزولن شبنمی واردور
.
.
ای قبر شریفی دل دنیایه سالان سوز
روشن ایلین نه فلکی ماه دل افروز
جمع ایلمیسن دوره وه یتمیش آخان اولدوز
تا واردی جهان بیر فلک عشقیدی قبرون
ماه فلکه انجمه سرمشقیدی قبرون
.
.
لازمدی ابوالفضل جوارونده یاتیدی
سرلشگرون ای شاه کنارونده یاتیدی
همسایه اولوب ظلّ مزارونده یاتیدی
طومار محبّتده آدوز بیر یازیلبودور
قبری نیه قبروندن اوزاقدا قازیلوبدور
.
.
آخسا یری وار خون جگر عارض زرده
گلسه بو دولان دردیله سینم گینه درده
سقّا سو کنارینده یاتوب دوشدوقی یرده
قارداش نیه قارداشوین حمل اولمادی نعشی
یوخسا چوخودی یاره سی نقل اولمادی نعشی
.
.
بو غمدی اوجالدان باجوین عرشه نواسین
یغمایه ویرن طاقت و آرام و قواسین
چوخ خرداجا دور قبری ندن اشجع ناسین
زیبنده دگل قامت عباسه او مرقد
بولمم نجه مدفون اولوب آخر او رسا قد
.
.
بو شعر که «نجمی» آپارور طاقت و یارا
بیر بیر دوزولوب رشتیه چون لؤلؤ لالا
هر کلمه سی بیر گوهر نایابدی گویا
دل پارچالیان هر الفی نیش تر اولدی
نظم اولماقنا عمده سبب «رنجبر» اولدی
.
.
هم «رنجبری» من سؤورم هم سُور احباب
تبریزده وار قیمتی چون گوهر شاداب
چشمین اونا بیر گنج ویروب کوچۀ «سیلاب»
چرخین نجه صدری گجه مهتابیله خوشدور
«سیلاب» ایله اوندان اودا سیلابیله خوشدی
.
.
#اربعین #نجمی_تبریزی #ترکی #زبدةالاشعار
نظر دهید