خوش گلوبسن حاجی درگاه حق سبحاندان

راجع به آمدن حاجی از مکه مکرمه
.
زبدة الاشعار

?: @nohe_torki
.
چوپانی
.
خوش گلوبسن حاجی درگاه حق سبحاندان
نه گتوردون بیزه سر سفره الرحماندان
.
او حاجی که دولانور بیت خدانون باشینا
قلبینی پاک ائلسه دغدغه هذیاندان
.
ائله بیل که قدمین تازه قویوب دنیایه
بنذور اول طفله هله صود یمیوب پستاندان
.
بو سفر چوخلارا شاید ائله بیر دفعه چاتا
دادا بیر یول نمک سفره بو احساندان
.
اودی که هر حاجی ایستور قییده اوز ائوینه
ائله بیل که قییدوبدی سفر رضواندان
.
هره بیر نیّت و فکریله اوپر اللّرینی
میزبانین سوروشار مرحمتین مهماندان
.
اوپورم اللریوی منده بو نیّتله سنون
آچاسان صحبته دل غصّه لی قبرستاندان
.
سنه من گوز یاشی وئرمیشدیم امانت آیا
هارا سپدون اونی سویله منه بو جریاندان
.
دی گوروم فاطمه نون قبرینی تاپدون یا نه
دی منه قصّه بیت الاحزن و هجراندان
.
دی گوروم کوی بنی هاشمه دوشدی گذرون
گتوروبسن نه خبر بارگه سوزاندان
.
او قاپی یاندی دیوللر عُمرین ظلمیله
ائله یانمشدی چیخوب چارچوبه سی میزاندان
.
واریمش اوندا دیوللر که ایتی بیر مسمار
تیزیمیش نوکی اونون چلّه ده کی پیکاندان
.
ائله یانمشدی قاپی ایستی قیزارتمشدی اونی
ئولدوررمش کیمه دگسِیمیش اگر هر یاندان
.
پشت درده نئجه که فاطمیه دگدی او میخ
توش اولوب سینه سینه سالدی اونی امکاندان
.
ائله باتمشدی دیوللر قاپی آیریلموردی
یوم گوزون ذهنده بیر صحنه دوت اول بحراندان
.
گور کیم اوردان قوتارار زنده که زهرا قوتارا
بادبان سینسا مگر کشتی چیخار طوفاندان
.
بیر بونی گوردیله بیر یول چاغیروب گل فضّه
محسنیم ئولدی اوزیم ظلمیله دوشدیم جاندان
.
فضّه گلدی نه گوروب گُل ایاق آلتندا قالوب
قان آخور سینه زخمی شده قرآندان
.
فضّه آلنیندان اوپنده خانم آچدی گوزینی
تا گوزین آچدی خبر دوتدی شه مرداندان
.
تئز دئدی فضّه عموم اوغلی علیدن نه خبر
آغلاما با خبر ائت فاطمه نی جریاندان
.
فضّه عرض ائتدی خانم قولاّرینی باغلادیلار
آپاروبلار باش آچیخ مسجده بو ایواندان
.
دئدی گیر قولتوقوما فضّه عم اوغلوم تکدی
یتیشر صدمه اونا فرقه بی ایماندان
.
مندن اوزگه مگر عالمده علینون کیمی وار
من گرک قورتارام اوز لاله می آتش داندان
.
ایندی فکر ایلوری دشمن که آدامسیزدی علی
اوندان اوتری ولی زهراسی گئچوب ساماندان
.
قوی علی اوسته عمر فاطمه نی ئولدورسون
آلاجاخ بو سوزی تاریخ خبر وجداندان
.
الده ئولماقیمه بو اود دوتان ائو مدرکدی
بو قاپی اولمیاجاخ پاک بو ناحق قاندان

.
#زائر_کعبه #کعبه
#خوش_گلوبسن_حاجی_درگاه_حق_سبحاندان
#چوپانی_مشعل
#ترکی
.
#زبدةالاشعار

?: @nohe_torki