دخت زهرایم بلایه استقامت ایلرم #وداع_آثم_تبریزی

وداع
زبانحال حضرت زینب (س)
.
#زبدةالاشعار
.
: @nohe_torki
.
آثم تبریزی
.
دخت زهرایم بلایه استقامت ایلرم
آل طاهادن گجه گوندوز حمایت ایلرم
.
چکمه غم بو آیرلیق هنگامی پوزما حالوی
هر وصیت ایلوسن ایله اجابت ایلرم
.
مین بلا بیر گونده یوز ویرسه اگر ائتمم هراس
آشنایم محنته، هر درده طاقت ایلرم
.
هر مصائبدن منی آگاه ایدوب زهرا آنام
هر مصیبت ویرسه یوز دلدن رضایت ایلرم
.
من شریکم انقلابوندا بو ملک عشقده
هر بلاده عشقله بو چولده شرکت ایلرم
.
أود ویراندا خیمه گاه طاهراته اهل کین
قیزلاروندان سانما کیم بیر لحظه غفلت ایلرم
.
سید سجّاد دن اولّام مواظب تا وارام
حالنی هر حالیده قارداش رعایت ایلرم
.
ویرمه رم باد فنایه خرمن صبری حسین
هر زمان عالی قیاموندان حراست ایلرم
.
لشگر غم اوستومه هر سمتدن ائتسه هجوم
صابرم هر بیر غمه سانما شکایت ایلرم
.
باشیمه جمع ایلرم باشسیز قالان اطفالوی
مادرانه قیزلارا مهر و محبت ایلرم
.
مین دلیله بیر به بیر آلّام اوشاقلار گوئلونی
نازیله هر تک تکیندن دفع محنت ایلرم
.
قویمارام شام غریبانون بو چولده خوار اولا
بزم ماتم قورماقا هر یرده همّت ایلرم
.
ترک قیلّام عاقبت اؤز کعبۀ مقصودیمی
کوفه و شاماتیده جبراً اقامت ایلرم
.
قیدیمه قالما منه یوز ویرسه مین مین گر بلا
نیزه ده سندن تمنّای اعانت ایلرم
.
سن اؤزون آگاهسن ای خسرو ملک حجاز
هر زمان هر بیر مکاندا حفظ عفت ایلرم
.
بو سفرده تا حیاتیم وار رضای حق ایچون
اهلبیت عصمته هر لحظه خدمت ایلرم
.
باشون آردینجا دوشوب گلّم فغان و شیونه
هر یره قویسام قدم ذکر مصیبت ایلرم
.
باشلارام بیر خطبه سالّام حسرته کوفیلری
مجلس باطلده اثبات حقیقت ایلرم
.
زادۀ مرجانه نین اکبادینه ویرّام شرر
حق سوزومله اهل بطلانی خجالت ایلرم
.
مجلس عام ایچره ویرام بیدق حُرّیتی
باطل اهلین من رهِ حقّه هدایت ایلرم
.
ساخلارام ویرانه ده ماتم آنام اوغلی سنه
شام شهرینده او گون که من اقامت ایلرم
.
یاتمینجه یاتمارام نازلی رقیّه ن بیر گجه
گوئلونی آلّام یرین سینه مده راحت ایلرم
.
آغلیاندا باشینی آلّام دیزیم اوسته أخا
گوز یاشین سیلّم آنان جانی محبت ایلرم
.
کربلاده چکدیقیم درد و بلادن شامده
اهل شامه بیر به بیر قارداش حکایت ایلرم
.
ماجرای شام شومی صفحۀ رخساریمه
اشگ نابیله گجه گوندوز کتابت ایلرم
.
ساخلاسا هر کیم سنه دنیاده ماتم حشریده
منده اوندان درگه حقده شفاعت ایلرم
.
اولسا دردی هر کیمون دوتسون حسینون دامنین
دردینه بولسون یقین قطعی طبابت ایلرم
.
ویر قلم بو بابیده «آثم» دایانما نوحه یاز
منده سندن جان ویرن ساعت عیادت ایلرم
.
.
#وداع_آثم_تبریزی
#حسینیه_وداع
#دخت_زهرایم_بلایه_استقامت_ایلرم
#ترکی
.
#زبدةالاشعار
.
: @nohe_torki