دشت غمه یتوردی حسین کارواننی #ورود_کربلا_سیفی_اردبیلی

ورود کاروان حسینی به کربلا
و وداع حضرت علی اکبر (ع)
.
#زبدةالاشعار
.
: @nohe_torki
.
سیفی اردبیلی
.
دشت غمه یتوردی حسین کارواننی
مسکن ایدوبدی جلوه گه دلستانی
.
دقّتله نینوا چولینه ایلدی نظر
آگاهیدی توکللر او صحراده قاننی
.
ای کربلا دیدی سنه مهمان گلوب حسین
هر میزبان گرامی دوتار میهماننی
.
عهد ایتمشم الستیده میقات ایدوم سنی
سنده گرک حسین ویره عشق امتحانی
.
جنّتدی ایستی قوملارون ای کربلا منه
حق اهلی سنده آختارار ئوز آرماننی
.
غملی دیاره تا که دیدی قلبینون سوزین
گفتاریدن دایاندیروب حقّون لساننی
.
بعداً اراده ایتدی ئوزی شهریار دین
محمل لریندن اندیره تا بانوانینی
.
بیر بیر حیالی قیزلارینی اندیروب یره
حتّی رباب و لیلی عفّت نشانینی
.
نوبت چاتاندا زینبینه آغلادی امام
ترک ایلیوبدی محمل آرام جاننی
.
عبّاسی سسلیوب دیدی ای سر سپاه عشق
غصّه حسینون آلدی الیندن تواننی
.
گل زینبی کجاوه دن اندیر ئوزون یره
گورسون باجون مساعدت پاسبانی
.
شرم ایلورم باخام یوزینه غملی زینبون
ترک ایلیوبدی مندن اؤتور خانماننی
.
زینب منیم اسیریم اولوب چوللره دوشوب
باشدان آتوبدی زندگی و آشیاننی
.
الله ئولونجه زینبی چوخ گورمسون منه
حفظ ایلسون بلا چولینون قهرمانینی
.
قلبیم یانور باخاندا بو صدّیقه مظهره
وورّام ورق کتاب محن داستانی
.
گورّم او ساعتی آغاروب زلفی زینبون
سالّام خیاله بیر گوننی بیر زماننی
.
گه تلّیدن خیامه قاچار گاه مقتله
طوفان ایچینده دیلدن اوجالدار فغانی
.
باخدوقجا سرو قامتنه سویلرم اوخای
ایکاش گورمیم بیله قدّون کمانی
.
حاصل قورولدی دشت بلاده خیام عشق
مات ایتدی منظری فلکون کهکشانی
.
خیمه نه خیمه سندس و استبرق بهشت
عشقون نشان ویرردی کأنّه جناننی
.
دولدی ستاره لر او صفالی چادرلارا
هر کس آلوب کنارینه ئوز هم زبانی
.
گهواره ترپدنلر اولوب همدم رباب
شاید آزالدالار محن جانستاننی
.
ساعات کئچدی سرعتیلن اولدی صبح عشق
گیدی کفن اولار که دوتوب الده جانی
.
سس دوشدی بیر زمان که اراده ایدوب امام
میدان جنگه گوندره لیلا جوانینی
.
اکبر کفن گیوب باجیلار آلدى دوره سین
عرشه اوجالتدیلار هاموسی اَلاَمانینی
.
لیلانی قویمادی قاباقا چخماقا حیا
گوستردی سوز آهیله درد نهانینی
.
ای یوسفیم نه سرعتیلن دوشموسن یولا
تزدور گورم سنون کیمی سروین خزاننی
.
اون سگّیز ایل مشقّته دوزدوم گوزل اوغول
داماد ایدم سنی گورم عمر آرماننی
.
قویماز فلک ننون یتیشه دل مرادینه
بش گون گوزی ایشقلی گوره دودماننی
.
آواره ام اوغول بیلوسن عاشقم سنه
بیر باخ بیانان دلیمده گور عشقون نشاننی
.
آهیمدن اود یاغور اریدور جسمیمی بالا
جسم ضعیف ساخلیا بیلمز رواننی
.
بیر عاشقانه باخ منه گیتسونده گیت گلوم
هر گل سارالسا یاندیرار ئوز باغباننی
.
گل خلوت ایلیک داریوم قاره زلفوی
آلما بو لیلینون بیله الدن تواننی
.
بیر بوسه ویر منه دوداقون قانه باتمامش
سوندور شرار سینۀ بوسه آلاننی
.
اگلش دویونجا بیر دولانیم باشوه على
پروانه نون کول اولماقینون گور عیاننی
.
فرصت قوتارمامش دولا قول بوینما بالا
اولادینون سوؤَر ننه شیرین بیاننی
.
بیر صاق صولا یرى او گوزل قدّیوه باخوم
دنیا آلور بو لیلینون الدن اولاننی
.
بیلمم بو گتمگون گلیشی واردی یا که یوخ
غملر پوزار یقین ننه وون دودماننی
.
ایکاش عباده گلمگوی گورمیم سنون
سندن قاباقدا ترک ایلیم دهر فانینی
.
لیلانون حقّى وار دوگونه قلبی قوش کیمی
امّید الینده پاره گورور ریسمانینی
.
.
.
#ورود_کربلا #سیفی_اردبیلی
#اکبریه_شهادت
#دشت_غمه_یتوردی_حسین_کارواننی
#ترکی
.
#زبدةالاشعار
.
: @nohe_torki