دعوالرین اصلانی پیمبر دل و جانی #حیدریه_علومی_تبریزی

شهادت حضرت علی (ع)
.
✍️ #زبدةالاشعار ✍️
.
🆔: @nohe_torki
.
علومی تبریزی
.
دعوالرین اصلانی پیمبر دل و جانی
صف لر داغدان جنگلرین شیر ژیانی
توپراقلارا میداندا یخان اهل جفانی
ارکان هدا راه هدایتده یخلدى
بیر تیغله محراب عبادتده یخلدی
.
.
حیرتده قویاردی هامونی وقت عبادت
پیکانی چکوبلر ایاقندان ایله راحت
بیر طاعته باخ ائتمیوب احساس اذیّت
علّت نه ئیدی سجدۀ طاعتده یخلدی
بیر تیغله محراب عبادتده یخلدی
.
.
تنها نه بو اسلامه پیمبرلره حامی
شمشیری کیمی قاطع و برّنده کلامی
اعدانی سالان خونه اونون شهرت و نامی
آتمش اوچ ایل عمر ایلدی محنتده یخلدی
بیر تیغله محراب عبادتده یخلدی
.
.
پیغمبر رحمت ایلین وقتده معراج
گوردی که علی باشینا گویده قویولوب تاج
ویردی اسداللهه اوز انگشترینی باج
افسوس که اجرای عدالتده یخلدی
بیر تیغله محراب عبادتده یخلدی
.
.
بیر شه که یته مرحمتی شاه گدایه
ویرانه ده دائم اولا همدم فقرایه
باشسیزلارین عالمده سالا باشینه سایه
قویدی بو فنا عالمی ظلمتده یخلدی
بیر تیغله محراب عبادتده یخلدی
.
.
.
بیر شه که اونون وصفنه نازل اولوب آیات
توصیفنه قالمیش هامی ارباب خرد مات
هیهات اونون مثلی گله عالمه هیهات
صد حیف که بیر تیغ عداوتده یخلدی
بیر تیغله محراب عبادتده یخلدی
.
.
حیدر یخلوب سجده ده شقّ القمر اولدی
جنّتده خانم فاطمه خونین جگر اولدی
سسلندی ملک دین ایوی زیر و زبر اولدی
محرابه على حین صلابتده یخلدی
بیر تیغله محراب عبادتده یخلدى
.
.
سس دوشدی که محرابده حیدر یارالاندى
معناده دل پاک پیمبر یارالاندى
آلدی بو سسی زینب مضطر یارالاندى
مشغول نمازیدی او حالتده یخلدی
بیر تیغله محراب عبادتده یخلدی
.
.
.
#حیدریه_علومی_تبریزی
#حیدریه_شهادت
#دعوالرین_اصلانی_پیمبر_دل_و_جانی
#ترکی
.
✍️ #زبدةالاشعار ✍️
.
🆔: @nohe_torki