دلده عشق و محبتون یارالی #اربعین_تائب_تبریزی

اربعین
..
..
..
..
مرحوم تائب تبریزی
..
..
..
..
دلده عشق و محبتون یارالی
باشدا شوق زیارتون یارالی
..
شامدن چکدی کربلا چولینه
غمزده آل عصمتون یارالی
..
هامی درد اهلی منده درد اهلی
خستۀ درد فرقتون یارالی
..
دردی درد اهلیسَن أؤزون بولوسن
وار گوزل خُبرَویَّتون یارالی
..
غملیسن دردیله دولان دلده
وار غم بی نهایتون یارالی
..
هامی دل دردینه دوا ایستر
مین دوا بیرجه رأفتون یارالی
..
بو سنق قلبلر صفا ایستر
بسدی رمز محبّتون یارالی
..
دوشنوب قبریوه شفا ایستر
ناخوش خسته حالتون یارالی
..
دور مریض اوغلوا شفا ویر اؤزون
مین شفا بیر طبابتون یارالی
..
شکر قیلّام که ویردی مهلت اجل
قسمت اولدی زیارتون یارالی
..
قبریوین باشینه دولانّام من
آلارام عطر و نکهتون یارالی
..
بوردا گوردوم گیدنده دوشموشدی
یارالی سرو قامتون یارالی
..
قلبون ایتمیشدی بیر پیالۀ خون
زخم تیر عداوتون یارالی
..
گلدیم ایمدی گورم بیتوب صافالوب
دلده کی اوخ جراحتون یارالی
..
سنه من آغلیانمادیم گئتدیم
دلده داغ مصیبتون یارالی
..
من اسارتله ایلدیم اعلان
خلقه سرّ شهادتون یارالی
..
..
..
..
گلمیشم ایمدی سینه داغلاماقا
قبرون اوسته دویونجا آغلاماقا
..
..
..
ایسترم اذن شهریاریمدن
تا دییَم شرح روزگاریمدن
..
نه دیوم چکمیشم نلر یارالی
آیریلاندان حضور یاریمدن
..
گلشن عزّتیم خزان اولدی
اوزدوم ال گلشن بهاریمدن
..
جبراً ایستکلیلردن آیریلدیم
دویمادیم نازنین نگاریمدن
..
دوشدی بو چولده گللریم پرپر
باد غم اسدی هر کناریمدن
..
قولی باغلی اسیر ایدوب دشمن
چکدی اؤز صحن لاله زاریمدن
..
اوردا صد برگ لاله لر گوردوم
آخدى قان قلب داغداریمدن
..
ایتدی ناله نوالی بلبل لر
مین نوا قاخدی مرغزاریمدن
..
سالدیلار کوفیه گذاریمیزی
آه ایله روز و روزگاریمدن
..
اولمادی اوردا زینبون تانیان
اشک آخوب چشم اشکباریمدن
..
باشلادیم خطبه شوریله توکدوم
درّ لعل گهر نثاریمدن
..
یاد ایدوب نطق بوترابیله
دورۀ باب تاجداریمدن
..
خواب غفلتدن ایلدیم بیدار
مردمی بانگ هوشداریمدن
..
بیلدیلر بیز پیمبر عترتیوخ
یاندیلار حال انکساریمدن
..
گیتدیم ابن زیاد مجلسینه
سنمادیم ذرّه جه وقاریمدن

دوشه دی سفرۀ طعام او لعین
تاب آلوب قلب بردباریمدن
..
قزلارین بعضی بویلانوب باخدی
چخدی اود قلب شعله باریمدن
..
یومدی امّا رقیّه گوزلرینی
وقر گوردوم او باوقاریمدن
..
دیدیم احسن حسینیمین قزینا
آلدی اود بو دل فگاریمدن
..
پوزدوم ابن زیاد مجلسینی
منه لطف اولدی کردگاریمدن
..
دوشدی شامین یولوندا قزلاردان
بیری یول اوسته غم قطاریمدن
..
بیر مسلمان تاپیلمادی گتوره
بیر خبر طفل گلعذاریمدن
..
عاقبت من أؤزوم گیدوب تاپدیم
اولدوم آگاه او حالی زاریمدن
..
گوردوم آلموش آنام قوجاقینه
آلوری درد او دل فگاریمدن
..
دیدی بیر یادگار دور بو بالا
بیر حسین آدلی یادگاریمدن
..
بو قزی ساخلا سن گوزون اوسته
اول مواظب بو خوش تباریمدن
..
رنگی سولموش خزان ایگی گلوری
بو گوزل نوگل بهاریمدن
..
او قزی ساخلادیم گوزوم اوسته
قویمادیم آیری اؤز کناریمدن
..
داد و فریاد شام ظلمیندن
نه دیوم شام انزجاریمدن
..
وردی شام اهلی چوخ شماتتله
دل یاراسی دل فگاریمدن
..
وورمیَن دل یاراسی گچمزدی
ردّ اولمازدی رهگذاریمدن
..
ووردیلار دل یاراسی من دؤزدوم
چخمادیم خطّ اصطباریمدن
..
..
..
..
نه دیوم شام ماجراسیندن
ماجرای پر ابتلاسیندن
..
..
..
..
بیر یانا هر مصیبتیم قارداش
بیر یانا شام محنتیم قارداش
..
بیزی هر یرده انجیدوب دشمن
شامدن وار شکایتیم قارداش
..
شام دروازه سی قیامتیدی
اوردا قوپدی قیامتیم قارداش
..
اوردا سجّاد ایستدی ئولومون
اولدی تاراج طاقتیم قارداش
..
دیدی ایکاش دوغمییدی آنام
بسدی تک بو اشارتیم قارداش
..
آتدیلار اود عمامه سی یاندی
گچدی مین ایل او ساعتیم قارداش
..
گه باشون اوردا سنگسار اولدی
ای منیم شأن وعزّتیم قارداش
..
گاه قوردی یزید بزم شراب
مجلسه اولدی دعوتیم قارداش
..
گتدیم اوردا محاکمه قوردوم
باشدا شور شهامتیم قارداش
..
باش و جاندان گیچوب دانشدیم من
اولمادی خوف و وحشتیم قارداش
..
نه دیدی من جوابینی ویردیم
دوتدی بزمی اُبُهّتیم قارداش
..
ایلدی بزم عیشینی برهم
او بیانیم او صحبتیم قارداش
..
ایتدی فرمان قتلیمی صادر
دشمن پست فطرتیم قارداش
..
منده بولموب على شهامتی وار
اونا واردور وَراثتیم قارداش

بیر بیره دگدی لیک او مجلسده
او پریشان جماعتیم قارداش
..
آز قالوب قورخودان ئوله بالالار
آرتدى قلبیمده رقّتیم قارداش
..
اولمادی بیر نفر هواداریم
کمکه اولدی حاجتیم قارداش
..
یتدی امدادیمه یارالی باشون
باشدا ای تاج عزّتیم قارداش
..
باشلادی کفر ایوینده قرآنی
خوش بیان خوش تلاوتیم قارداش
..
آیۀ ظلمی ایلدی ایراد
شاه ملک عدالتیم قارداش
..
مندن ال گوتدی قصد ایدوب باشوی
دشمن بی لیاقتیم قارداش
..
آلدى بیر چوب خیزران الینه
آرتدی درد و مصیبتیم قارداش
..
دیمورم نولدی پرده لی گچورم
واردی اؤزگه حکایتیم قارداش
..
نه چکوب شامدن خلاص اولدوم
بولی خلّاق خلقتیم قارداش
..
..
..
..
باشه اؤز عهدیمی یتوردوم من
قزلارون قبریوه گتوردوم من
..
..
..
..
ایتدیم ایفا أو عهد و پیمانه
تا یتوردوم او عهدی پایانه
..
شامدن اهل بیتوی گوتوروب
تا گتوردوم ریاض رضوانه
..
شوریله بلبلان باغ عزا
یول سالوب بو گوزل گلستانه
..
شمع عشقین تاپوبلا مدفنینی
شمع عشقه اولوبلا پروانه
..
هره بیر نوعیله دیور دردین
توکوری اشگ چشم دامانه
..
بیر قزون لیک آیریلوب مندن
گله بولموب بو مهد ایمانه
..
قدرتی اولمادی گله بیزیله
چوخ یورولموشدی چون او دردانه
..
منه سندن حسین وصیّتیدی
که محبّت ایدم او نالانه
..
او بالانی گوز اوسته ساخلاردیم
گیده قویمازدیم اؤزگه بیر یانه
..
نیلییدیم الیمدن آلدى أجل
منی قویدی بیله یانا یانه
..
چوخ سُوردیم ایکی گوزومدن اونی
روحیدی جسمیمه او ریحانه
..
یاندویروب قلبیمی یاخاردی منیم
او باخاندا منه یتیمانه
..
باغریقان لاله تک اوتاردیم قان
دوندَرَردی بو باغریمی قانه
..
..
..
..
نه دیوم شرح روزگاریندن
عصمتیندن و یا وقاریندن
..
..
..
..
او بالا عصمتین عیاریدی
عفّت و شرم پرده داریدی
..
اؤزی عفّت حیا گوزیدی گوزی
ادبین شأن و اعتباریدی
..
أؤزی باشدان باشا محبّتیدی
سؤزی مهر و وفا عیاریدی
..
ظاهراً دشمنه اسیر ولی
عشق بی غشّینین شکاریدی
..
اوتاناردی دیمزدی اؤز دردین
صبریله صبر پایداریدی
..
آج قالاردی غذا یئینمَزدی
بوغازی غصّه زخمداریدی
..
غم گلوگیر ایدردی دائم اونی
روز و شب آغلاماق دچاریدی
..
گه باخاردى قابار ایاقلارینا
شام یوللارینین قاباریدی
..
دولی گوزلی باخاندا قلبینده
گیزلنن دردین آشکاریدی
..
تاپدی رنگ خزان گولین گرچه
عمرینین اوّل بهاریدی
..
بابا جان سولیوب یولوندا سنون
روز و شب چشم انتظاریدی
..
تاپدی آخر سنون یارالی باشون
حیف اولا حال احتضاریدی
..
سنله سوز باشلادی دانشدی بیر آز
شرح مشروح او اختصاریدی
..
آزجا فرصتده چوخ او شیرین دل
دیدی هر رنج روزگاریدی
..
ایستدی باغرینا باسا باشوی
لیک مَعدوم اختیاریدی
..
اگیلوب بیر دوداق دوداقه قویوب
هامی بو حالین اشکباریدی
..
آبیله گون قووشدی بیر بیرینه
زینبین موقف شماریدی
..
ویردی بلبل گل اوسته شیرین جان
سن گولین با وفا هزاریدی
..
آتدی هجرانی نقد جانیله
وصل آلوب عشق جان نثاریدی
..
دوداقوندا دوداقی جان ویردی
اودا مهر و وفا شعاریدی
..
ائل لریم اولمادی ایده تشییع
لیک جمع اوردا غم قطاریدی
..
او قزین قبرینی اؤزوم قازدیم
بو همین امر اضطراریدی
..
اؤز قرا معجرین کفن ایلدیم
أؤزی بو امره خواستاریدی
..
خدمتیم آزدی چوخ حساب ایله
او گونون وضع کار و باریدی
..
هامی نشریه لرده نشر اولاجاق
زینبین عالی ابتکاریدی
..
ئولدی بیر خردا قز اونون بی بی سی
قبرینی قازدی حُسن کاریدی
..
دفن قیلدیم خرابه ده بیر گنج
فاطمه درّ شاهواریدی
..
قیزیوا پر بها کفن قیلدیم
قیزیوین پر بها عیاریدی
..
گیدرم اوندان اؤتری شامه گینه
اونیله زینبین قراریدی
..
تائب الده بو دوتدوقون خامه
لطف خلّاق کردگاریدی
..
جمعه بیر اربعین زیارتی آل
بو قدم امر شاهکاریدی
..
کربلا گورمین اولار ناکام
کربلا باغ کامکاریدی
..
..
#اربعین #تائب_تبریزی #ترکی #زبدةالاشعار