زبان حال حضرت علی اصغر (ع)
..
..
مرحوم تائب تبریزی
..
..
گلموشم اللرون اوستونده بو میدانه بابا
صودامر وقتی فدا اولماقا قرآنه بابا
..
..
سسون آلدیم بابا گهواره ده آچدیم گوزومی
یاندیم احوالووه آلدى ئورگیمدن دوزومی
دلده لبیک بشیکدن یره سالدیم ئوزومی
ناصر اولماقلیقا سلطان شهیدانه بابا
..
..
شایقم سیر مقامات وفا ایلماقا
ئوزومی محو رَهِ صدق و صفا ایلماقا
صودامر جانیمی دین اوسته فدا ایلماقا
جان دن دینی مقدّمدی مسلمانه بابا
..
..
گرچه سنّیمده صغیرم بابا بیر صودامرم
الون اوستونده سوسوزدان لب لعلی امرم
صف سربازی اسلام ده زرّین کمرم
خدمتیم اعظم اولارسن کیمی سلطانه بابا
..
..
دین و قرآن گورورم سسلوری امداده سنی
گتوروب شوره او انگیزه بو صحراده سنی
اصغرون تک قویا حاشا بیله اثناده سنی
وقف ائدوب جانین او انگیزۀ شایانه بابا
..
..
ائدرم فتح ئوزومی خلقه نشان وئرماقیله
حق سوزون قانیمیله شرح و بیان وئرماقیله
تازه جان دینیمه وئررم بابا جان وئرماقیله
جانه منّتدی گله هر نه بلا جانه بابا
..
..
سیل کفرایستوری طغیان ائده قرآن آپارا
ریشه سیندن قوپاروب نخلۀ ایمان آپارا
قویمارام دین گئده هر چند منى قان آپارا
دینی قورتاررام ئوزوم غرق اولارام قانه بابا
..
..
دولدوروب عالم امکانی بابا نالۀ دین
سولدورار گلشنینی یاغماسا گر ژالۀ دین
قانیمی سپ گویه یرده گوؤَره لالۀ دین
دوندَرَه بو چولی بیر گلشن ایمانه بابا
..
..
من تقلّا ائدرم دین ده بدعت قویانا
یوز گوزوم بوردا ولو ظلمیله قانه بویانا
اوخلانوب یوخلیَم امّا بو جماعت اویانا
دین ساتوب ائتمیه لر خواب ذلیلانه بابا
..
..
منی شوره گتوروب باشدا اولان شور و شعف
جان به کف سوق ایلیوب قانلو بو میدانه طرف
الون اوستونده باتوب قانه ائدم کسب شرف
اولا سرمشق هامی محترم انسانه بابا
..
..
خردسالم من اگر ای شه اقلیم بلا
تاپموشام لیک الون اوستونده مقامات علا
وورار اصغر گوزه اکبر، اوجا یرلرده بلا
صدق ائدر ایمدی منیم حالیم او عنوانه بابا
..
..
من بابا شاخۀ ایمان دا سولان غنچه گلم
سالما گوزدن منی ترک ائتماقا شایان دگولم
گلمیشم کامه چاتوب اللرون اوستونده ئولم
آنام آغلار قالی هر چند یانا یانه بابا
..
..
عهدناموندا بو عنوان اولوب ای جان جهان
قوزی قربانون ائده دینوه جانین قربان
او سوزون اوسته وارام سینسادا پیمانۀ جان
قویمارام من یتیشه نقض او پیمانه بابا
..
..
من بابا نقش مهمی بوگون ایفا ائدرم
بویانوب قانیله دین امرینی اجرا ائدرم
آل سفیانی ایله دهرده رسوا ائدرم
باخیلار نفرتیله امّت سفیانه بابا
..
..
اولدوزام گون الى اوستونده بو چولده آخارام
آخارام ئوز باباما حسرتیله من باخارام
یَدِ احسانویله اللریمه قان یاخارام
حسرت انگشتون ائدر تللریمه شانه بابا
..
..
وئردی هر بیر آنا قربان برازنده بوگون
قویمارام هرگز آنامی اولا شرمنده بوگون
تشنه لب دینیمه قربان اولارام منده بوگون
تا یتوررم آنامی عزّت شایانه بابا
..
..
دعوتیم واردی بوگون ترک سر و جان ائدرم
درکِ مهمانی خلوتگه جانان ائدرم
جامه می اُنّوگومی قانیله الوان ائدرم
وار نیازیم بیله بیر خلعت الوانه بابا
..
..
«تائبا» شور حسینی گتوروب شوره سنی
نظم قیلدون هدف اصغر غنچه دهنی
بیرده یاز دفتر اشعارده بو سرسخنی
گلمیشم اللرون اوستونده بو میدانه بابا
..
..
#اصغریه #تائب_تبریزی #اصغریه_شهادت #ترکی #زبدةالاشعار
نظر دهید