دل دوشوب پیچ و خمه دلبره آخر گجه دور #حیدریه_انور_اردبیلی

حالات شب آخر حضرت علی (ع)
#گریز به #شب_عاشورا
ـ
زبدة الاشعار

?: @nohe_torki
ـ
مرحوم انور اردبیلی
ـ
دل دوشوب پیچ و خمه دلبره آخر گجه دور
یاندی جان رشته سی جان پروره آخر گجه دور
ـ
آز قالور یاتسون عدالت علمی عالمده
دوز قضاوت ایلین داوره آخر گجه دور
ـ
ایتوروب قافلۀ راه ، سعادت یولونی
رهنمالیق ایلین رهبره آخر گجه دور
ـ
لیلیۀ بیست و یکم دور سحری صبح عزا
یخلوب شیر خدا بستره آخر گجه دور
ـ
آز قالوب تاجینی باشدان گوتوره روح الامین
عمری باشه یتشوب حیدره آخر گجه دور
ـ
ضربت زادۀ ملجم ایلیوب مغزه اثر
یوخ توانا او قوی پیکره آخر گجه دور
ـ
ایشیدور ناله سسین شیر خدا طاقتی یوخ
سس ویره زینب غم پروره آخر گجه دور
ـ
ایستیور تکیه قیلوب بالشینه صحبت ایده
زهریلی جسمی دوشسور لنگره آخر گجه دور
ـ
گاهی غش ایلیوری گاهی آچور گوزلرینی
ایستیور تزتز حسینی گوره آخر گجه دور
ـ
مختصر حاله گلوب عترتینه سالدی نظر
باغبان باخدی سولان گوللره آخر گجه دور
ـ
گوش مولایه اوزاقدان یتشوب ناله سسی
دوزمدی نالۀ حزن آوره آخر گجه دور
ـ
دئدی کیمدور گتورور قلبیمی درده دئدیلر
اوغلون عباس آچوب منظره آخر گجه دور
ـ
قیلدی فرمایش حسن قارداشوزی رام ایلیون
چاغرون گلسون اونی محضره آخر گجه دور
ـ
گلدی عباس یسارینده علی وئردی مکان
باخدی صرّاف او گوزل گوزلره آخر گجه دور
ـ
الینی آلدی اله قویدی حسینون الینه
دئدی اوغلوم بو گجه حیدره آخر گجه دور
ـ
سنه من اوغلوم ابوالفضلیمی نوکر وئریرم
ثبت ایله نوکر آدین دفتره آخر گجه دور
ـ
دئدی عباسه ده طاهادن امانتدی حسین
گورسون هر وقت بو بی یاوره آخر گجه دور
ـ
قوشونی گتسه ده تک قالسادا سن گیتمیه سن
او گجه زادۀ پیغمبره آخر گجه دور
ـ
کچدی ایللر دولانوب اولدی شب عاشورا
چخدی شاه شهدا منبره آخر گجه دور
ـ
دئدی گئتسون بو چوله کیم طمع ماله گلوب
حاجتیم یوخدی ایله لشگره آخر گجه دور
ـ
هوس سلطنطیله بو یره گلمه میشم
گلمیشم بیر هدف دیگره آخر گجه دور
ـ
ایستورم دهرده قرآن مبین زنده قالا
ویرمرم بیعت الین کافره آخر گجه دور
ـ
من سحر ئولملیم گر کمکیم اولماسادا
قانعم اوغلوم علی اصغره آخر گجه دور
ـ
ایلیون مشعلی خاموش گیدنلر گیتسون
ایدورم مطلبیمی یکسره آخر گجه دور
ـ
فکر امواله گلن دوردی یریندن ایاقا
گیدیگون سویلدیلر بیربیره آخر گجه دور
ـ
سعی ایدون جانیمیزی مهلکه دن تیز قوتاراق
الیمیز یتمدی سیم و زره آخر گجه دور
ـ
بش بش اون اون داغلوب اولدی پراکنده قوشون
بلی ظلمتده اوچان شب پره آخر گجه دور
ـ
یاندی مشعل شه دین باخدی سنان لشگرینه
دئدی سیزده داغلون چوللره آخر گجه دور
ـ
اوغول اکبر گوتورب لیلینی عزم ائت وطنه
قویما سالسون قره ، آغ معجره آخر گجه دور
ـ
آغلادی عرض ایلدی من گیده بُللم هایانا
ایاقون آلتدا یاتان اکبره آخر گجه دور
ـ
قاسمه دوتدی یوزون ایلدی فرمایش امام
عمون ایستور سنه یول گوستره آخر گجه دور
ـ
بودی فکری آنووی قارداشووی حاضر ایده
سیزی سالم وطنه گوندره آخر گجه دور
ـ
فرق قویما منیله اکبره عرض ائتدی عمو
قیل توجه بو شکسته پره آخر گجه دور
ـ
منده اکبر کیمی بو چولده شهادت گزورم
مژده ویر بو دل خوش باوره آخر گجه دور
ـ
دئدی عباسینه یغ باشیوه قارداشلارووی
قویما محنت سیزه یوز دوندره آخر گجه دور
ـ
آنوزون گوزلری یولدا قالا انصاف دگول
ائتمیون توش اوزوزی خنجره آخر گجه دور
ـ
عرض قیلدی قاپودان نوکریوی قووما آقا
شب عاشور آقیا نوکره آخر گجه دور
ـ
غیرتیمدن چوخ اوزاقدور قاپووی ترک ایلیم
درگهوندن گیدم آیری دره آخر گجه دور
ـ
اذن ویر باشیوه قارداشلاریملا دولاناق
عون و عباسیویله جعفره آخر گجه دور
ـ
آتامون خاطرینه لطف ایله سندیرما منی
باخ بو گوز یاشی توکن گوزلره آخر گجه دور
ـ
دیمورم سن منی سرلشگر ایله لشگریوه
بسدی سقا آدی بو مضطره آخر گجه دور
ـ
من گرک قلبی یانان قزلاریوا سو گتورم
کربلا دشتی دونوب محشره آخر گجه دور
ـ
قوی گیدوم نهره سوسوزلار سسی ئولدوردی منی
گتورم سو بو علی بنذره آخر گجه دور
ـ
بستر مرگیده هر شب منی درک ائتسه اجل
یا حسین داده یتیش « #انوره» آخر گجه دور
ـ

#حیدریه_شهادت #حیدریه
#دل_دوشوب_پیچ_و_خمه_دلبره_آخرگجه_دور
#انور_اردبیلی
#پیام_عزا_انور
#ترکی

#زبدةالاشعار

?: @nohe_torki