دنیایه نه گلمیش نه گلور تا دم محشر #کوچ_کربلا_کاتب_اردبیلی

کوچ کربلا
.
✍️ #زبدةالاشعار ✍️
.
🆔: @nohe_torki
.
مرحوم کاتب اردبیلی
.
دنیایه نه گلمیش نه گلور تا دم محشر
بیر قارداش حسین تک اولا زینب کیمی خواهر
.
.
یثربده گوروب بیر گون او مصباح هدایت
نازیله یاتوب زینب علیا به فراغت
گون روزنه دن ایلر او خاتونه اذیت
گویا عرق ائتمیشدی رخ زینب مضطر
.
.
بو حالی اونون ائتدی حسین قلبینه نسکل
فوراً اوز عباسینی گونه ایلدی حایل
بیر قدری همان ائودن ائدوب ایستینی زایل
گوندن ائلدی خواهری محفوظ برادر
.
.
بیدار اولوب چون یوخیدان زینب علیا
احوالی بئله گوردی او صدیقه ی صغری
عرض ائتدی حسین چوخ منه لطف ائتمیسن حقا
قیلّام عوضین منده حیات اولسا میسر
.
.
بو مرحمتون وئردی باجی زینبه خجلت
لازمدی منه ایلوم ئولنجه سنه خدمت
بو لطف بو احسان بو مهر و بو محبت
ممکن دگی یاددان چیخا ای زاده ی حیدر
.
.
زینب اوره گینده واریدی شیعه بو مطلب
تا کرب وبلا واقعه سی اولدی مسبب
میدانه گذار ایلدی بیر وقتده زینب
گوردی یخلوبدور یارالی قارداشی بی سر
.
.
واردور نه الى نه باشی جسمین بوریوب قان
دگمیش یارالی سینه سینه نیزه و پیکان
گل پیکری گونلر قباقیندا قالوب عریان
باشسیز بدنی زخم دم تیردی خنجر
.
.
بیر حاله سالوبلار بدن اشرف ناسی
قویموبدولا اگنینده قالا بیرجه لباسی
گرمیدی او قدری عربستانون هواسی
گویا توکر اول دسته گونون ایستیسی آذر
.
.
یوز دوتدی گونه ایلدی فرمایش او خاتون
ای گون ندن اولموش بئله گرمیّتون افزون
بو جسم حسیندور که اولوب زینت هامون
آیا بو دگل زینت آغوش پیمبر
.
.
ای گون بو حسیندور بیلوسن سرور بطحا
بسلوبدی قوجاقینده بونی حضرت زهرا
رحم ائت بونا سن رحم ائلموب لشگر اعدا
ناحق سوسوز ئولدوردیله بو فرقه ی کافر
.
.
ای گون بو حسیندور که گئچوب باشیله جاندان
اکبر کیمی اوغلینی وئروب امته قربان
اوخلاندی قوجاقینده علی اصغری عطشان
کافی دگل آیا اونیچون بیر بئله غملر
.
.
ای گون بو حسینون باشینون چوخدی بلاسی
قوللاری دوشوب قارداشینون ، یاتدی لواسی
ظلمیله اولوب قاسمینون قان طوى حناسی
آغلار اونون احوالینه آفاق سراسر
.
.
ای گون سن اذیّت ائلمه خسرو دینه
چوخ ظلملر ایلوبدی اونا لشگر کینه
تورپاقلارون اوسته قالوب اول یاره لی سینه
آغشته اولوب قانینه اول جسم مطهر
.
.
ای گون بو حسین دایه سى جبریل امیندور
سبط نبوی قطب سماوات و زمیندور
قرآن بونون اوصافینه برهانی متیندور
بو حجت خلاقیدی عالملره رهبر
.
.
بو سؤزلرى القصه دیوب زینب غمخوار
یوز دوتدی حسین نعشینه با دیده ی خونبار
عرض ائتدی باجون ئولسون حسین ای شه بی یار
عریان نه روادور قالا بو یارالی پیکر
.
.
چیخماز بو خیالیمدن ایا شاه شهیدان
یثربده منی حفظ ائلدون گوندن حسین جان
نه چاره قیلوم یوخدی تلافی منه امکان
قویموبلا باشیمدا آنام اوغلی قالا معجر
.
.
یوخ بیر زادا امکانیم حسین دوت منی معذور
گوندن سنی محفوظ ائلمک اولمادی مقدور
حالیّه گمانیم آغاران زلفیمه واردور
قیلام اونی حایل من مغموم مکدر
.
.
اول وقته گلوب درده دل زینب خسته
آچدی باشینی توکدی او عریان بدن اوسته
بوینینی قویوب چگنینه با قلب شکسته
باخدوقجا حسین نعشینه آغلاردی مکرر
.
.
کاتب بو قدر شرح ائلمه لال اولاسان کاش
بی پرده مصیبات مبادا یازاسان فاش
دنیا یوزینه گلموب اولار تک باجی قارداش
محنتده مصیبتده محبّتده برابر
.
.
.
.
#دنیایه_نه_گلمیش_نه_گلور_تا_دم_محشر
#ترکی
.
✍️ #زبدةالاشعار ✍️
.
🆔: @nohe_torki