زبانحال حضرت لیلا (س) در شهادت حضرت علی اکبر (ع)
.
✍️ #زبدةالاشعار ✍️
.
🆔: @nohe_torki
.
حاج حسین حسنی تبریزی
.
چکوب قضا الی قاندان اوغول نقاب اوزیوه
اذیّت ایلمه سین بلکه آفتاب اوزیوه
.
.
نئدیم نه چاره، ائلیمدن اوغول الیم اوزولوب
بو قان نه قاندی باشوندان عذاریوه سوزولوب
و یا که سبحۀ مرجاندی رشته تک دوزولوب
اولوبدی یا یم حسنونده چون حباب اوزیوه
.
.
اجازه وئر یارالی باشیوه دوروب دولانیم
کیمیم واریمدی داخی سایه سینده دالدالانوم
یوخومدی آرخام ائلیم بس کیمه من آرخالانوم
گوزوم توکر او سببدن سرشک ناب اوزیوه
.
.
سنیله همدم اولوب یاتمادیم گئچن گجه من
گیدوبسن اللهیم عالمدی دوزموشم نجه من
هامی گلوب سنی گورماقه قالموشام گجه من
توکوب سرشکین ازل آل بوتراب اوزیوه
.
.
اؤزومی سن گیده لی مونس غم ایلمیشم
محبت عالمینی آیری عالم ایلمیشم
سرشکیمیله یوزون قانینی نم ایلمیشم
سیلیم بو زلفیمیله اولماسین عذاب اوزیوه
.
.
تعجبم نیه من ئولمورم علی قالّام
سنون غمونده اوغول باشیمه قرا سالّام
غم ایلمه باشووی سینم اوستونه آلّام
چتیندی لیلیه اولسا مکان تراب اوزیوه
.
.
اولوبدی گور نجه سندن صورا سوزوم بالا وای
سنه فدا اولا ای کاش ایکی گوزوم بالا وای
چتیندی بیرده یوزوندن دونه یوزوم بالا وای
که اورگشوبدی یوزوم نیلوم ای شباب اوزیوه
.
.
دگوب یارا باشیوا مرتضایه بنزرسن
نماز صبحده محراب ایچینده حیدرسن
یارالی شیر خداسن و یا پیمبرسن
آپاراجاقدی اوغول باخسا کیم صواب اوزیوه
.
.
خراب اولیدی گوروم تئز بو عالم فانی
آنان یووا یوزیوون قانینی یوخ امکانی
سووا یوخومدی گمانیم داخی اوغول جانی
ولی رقیّه سَپَر اشک دن گلاب اوزیوه
.
.
علاوه نازلی رقیه یانان دلی داغلار
آچوبدی معجرینی یاره لی باشون باغلار
من آغلارام بالالار آغلار عمّه لر آغلار
قوجاقدا قارداشون اصغر باخار رباب اوزیوه
.
.
دئمه آنام نیه رخت حیاتینی سویمور
عجبدی تیر جفا قلبیمه دگوب اویمور
گوزوم باخا سنه مایلدی گوز یاشیم قویمور
باخا دویونجا اولا بلکه کامیاب اوزیوه
.
.
عجب مرامه یتیشدون بئله مرام اولماز
جهاندا سن گیده سن من علی قالام اولماز
جمالیوون سوزی دنیا بویی تمام اولماز
اگر یازا «حسنی» گونده بیر کتاب اوزیوه
.
.
#اکبریه_حسنی_تبریزی
#اکبریه_شهادت
#چکوب_قضا_الی_قاندان_اوغول_نقاب_اوزیوه
#ترکی
.
✍️ #زبدةالاشعار ✍️
.
🆔: @nohe_torki
نظر دهید