اربعین
..
..
..
..
مغانلو
..
..
..
..
دور ای اولان سینه سی اوخلارا نشان یارالی
گلوبدی شامه گیدن خسته کاروان یارالی
..
باجون گلوبدی سفردن دور ایله استقبال
اوقان دولان گوزون آچ زینبم اویان یارالی
..
سنون فراقیوه دؤزمک حسین قوجاتدی منی
بلای هجرون ایدوب قدیمی کمان یارالی
..
گیدنده کوفیه جسمون کفن سیزیدی سنون
بو ماجرا باجوین قلبین ایتدی قان یارالی
..
کفن تاپولدی و یا قبریده کفن سیزسن
آپاردی کؤینگیوی شامه کوفیان یارالی
..
یارالی سینوین اوسته آلوبسان اصغریوی
بوغازی یاره الون اوسته ویردی جان یارالی
باشیوی شمر ستمگر بدندن آیری سالوب
ستمله اللریوی کسدی ساربان یارالی
..
بو رسمدور که قوناق گلسه گر اوزاق یولدان
چیخار قباقینه البته میزبان یارالی
..
سوسوز بوغازیوه قربان نیه سسون گلمور
دانیش منیله تاپوم طاقت و توان یارالی
..
کسیلموش اللریوی چک یتیم لر باشینا
باجون فدا سنه ای یار مهربان یارالی
..
حسین گوزوندن ایراق گل لرون سولوب سارالوب
سولار گل اولماسا گلشنده باغبان یارالی
..
گلوبدی لیلی علی اکبرین زیارتینه
دیور اوغول آناوام بس هایانداسان یارالی
..
کمک سیزم چاغور عباس نامداری گله
اولا بو چولده من زاره پاسبان یارالی
..
اوقدری دیل یاراسی شامین اهلی ووردی منه
شماتت اوخلارینا اولموشام نشان یارالی
..
تحمل ایلموشم هر مصیبته قارداش
ووراندا قمچی منه شمریله سنان یارالی
..
دیار کوفه ده بیر خطبه ایلدیم ایراد
جداده قانلی باشووی گورن زمان یارالی
..
شل اولسون اللری بیر داش جداده ووردی سنه
آلوب قراریمی داش یاره سین ووران یارالی
..
باشیمی محمله ووردیم دیدیم سنه قربان
بو داغدیده باجون ای عزیز جان یارالی
..
باخوردی کوفه لی لر سن گلنده بازاره
دؤنیدی کاش بیله گردش زمان یارالی
..
جدا باشیندا باخیردون یتیم اوشاقلاریوا
ووراندا اهل ستم طعنه زبان یارالی
..
بو آلتی گوشه لی قبرون فداسی آی قارداش
گلوبدی زینب دلخسته میهمان یارالی
..
رقیه گلمدی ویرانسراده دفن اولدی
بابا دیه دیه ویردی او طفل جان یارالی
..
«مغانلو» شام و سحر ایلیر بو غمده نوا
اولوبدی یوسف زهرایه نوحه خوان یارالی
..
..
#اربعین #مغانلو #ترکی #زبدةالاشعار
نظر دهید