شهادت حضرت امام صادق علیه السلام
.
.
.
حاج روح الله رمضانی ( خاکی )
.
گلور سرشک عزا دیده ی خلایقدن
گدور سمایه نوا سوسن و شقایقدن
قلم یازاندا ملال امام صادقدن
اونوندا قلبینه غم مدینه ده قالانیب
آناسی فاطمه تک قاپیسی اوتدا یانیب
.
.
فنون علمیده هرکیمسیه سرامدیدی
فقاهت عالمینه رهبر مؤیدیدی
مقام و مرتبه ده تالی محمدیدی
خلف بی مثل امام باقریدی
علوم فقه واصول و رجاله ناشریدی
.
.
جهانه کحل بصردی ایاقینین گردی
افق فقهیده بیر اختر منوردی
کویر علمی اوشه گلستانه دوندردی
سپوبدی مزرعه ی علمه بزر عرفانی
عیاره حکمتینین گلمیوبدی میزانی
.
.
فقط نه شیعه لره رئیس مذهبیدی
تمام عالمه بلکه چراغ مکتبیدی
سلونی منبرینه عالم مجربیدی
یتیشدی علم لدنی اوشاهه حیدردن
که شیعه عرشه اونی آشنا بیلر یردن
.
.
بجادی شیعه لرین گوندوزی دونه شامه
گجه یاری آقانی سالدی خصم دون دامه
یوخیدی حضرتین حتی باشیندا عمامه
امان او شپره لر وئرمدی گجه نوره
آپاردیلار باش آچیخ قصر شوم منصوره
.
.
اوداغلانان اورگین اهل کینه داغلادیلار
قولون گجه یاری ائوده ستمله باغلادیلار
حالینا فوج ملائک سماده آغلادیلار
یوخیدی رحم ائلین بیر نفر اورنجوره
اسیریدی قولی باغلی غلام منصوره
.
.
دئیوله ابن ربیع اول غلام بد سیرت
پیمبر اوغلونا هیچ قویمادی قالا حرمت
ویریردی مرکبه مهمیز گدوردی باسرعت
دالیمجا هیچ دئمدی حجت خداده،گلور
ایاق یالین قولی باغلی یولی پیاده گلور
.
.
گورنده بیشه ی علم و فقاهتین شیرین
چکوبدی غیضیله منصور امامه شمشیرین
پیمبرین نچه یول رأیت ائتدی تصویرین
وجود نحسی اونون اسدی خوف و وحشتدن
وگرنه ال گوتومزدی اودم جنایتدن
.
.
اولونجه لعن ائله خاکی همیشه منصوره
جهاندا عاملیدی ظلم و فتنه و جوره
الیکی زهر جفا وارد ائتدی انگوره
گوی اهلی یاسه باتیب باشه قاره باغلادیلار
امام صادقه یکسر ملکلر آغلادیلار
.
.
#صادقیه_شهادت
#گلور_سرشک_عزا_دیده_خلایقدن
#رمضانی_خاکی
#ترکی
#زبدةالاشعار
نظر دهید