زبدةالاشعار

دور حسین زینبوی کرب و بلادن یولا سال #کوچ_کربلا #انور_اردبیلی

در حالات کوچ اسرا
زبانحال حضرت زینب کبری (س)
..
✍️ #زبدةالاشعار ✍️
.
🆔: @nohe_torki
.
مرحوم انور اردبیلی
.
دور حسین زینبوی کرب و بلادن یولا سال
تز آیور بو اسرانی شهدادن یولا سال
.
.
عشقیمیز روز ازل سیل کیمی ائتدی خروش
جرعه جام بلانی ائلدوک عشقیله نوش
سن شهید اولدون حسین زینب اولوب خانه بدوش
سفر پرخطره پیر و جوانسیز گیدورم
زجر مهمان آپارور تخت روانسیز گیدورم
.
.
گرم ائدوب اشکیمی هجرونده شرربار اورگیم
یوخدی بو اشکلی گوزدن صورا قارداش کمگیم
ای الى قطع اولان اللرده قالوبدی اتگیم
دیندیروم هانسی قزی هانسنی آغوشه آلوم
هانسینون باشینه معجر الیمه گلسه سالوم
.
.
سن یغوبسان باشوا عزّتیله لشکروی
عونوی جعفروی اکبروی اصغروی
کرم ائتدون منه وئردون قره معجرلروی
سن باخوب فخر ایله دورونده دلاور قوشونا
من باخوب فخر ائلیوم بو قره معجر قوشونا
.
.
گلدوم امّیدیله مقتلده اوپم اللروی
اللرون اولمادی اوپدوم کسیلن حنجروی
گورسه یولدان کچن آغلار یارالی پیکروی
نقش جسمون پوزولوب باروون اندازه سی یوخ
بنذرون واردی او قرآنه که شیرازه سی یوخ
.
.
ای سلیمانیدن آرتوق دوشیَن خوان کرم
کوفه ده قانلی باشون منتظریمدور بیلورم
دوشرم تز یولا قویسا منی بو اهل حرم
آتش غصه ده پروانه لر ایستور یانالار
بالالاردان چکوب ال آیریلا بیلمور آنالار
.
.
سینون اوستونده که قزلار قالورئولدورسون ئوزون
اورگ ایستور ایشیده غصّه لی نسگلّی سوزون
گه یومور سینوه با خدوقجا آچور گاه گوزون
یوخ تواناسی کچیرده نظریندن یارووی
نه باشون وار نه الون بیلمیور اوپسون هارووی
.
.
لحن پرشوری سالوب مقتله آوازه حسین
چوخ سوور قزلار آتانی نه بو اندازه حسین
آز قالور روحی بدندن گله پروازه حسین
ئولسه بو خرداجا قز نظم سپاهیم پوزولار
شامیده منزل ویرانیه کیم صاحب اولار
.
.
عجبا قارداش آروزدا نه محبت واریمیش
مرحبا عشقوزه عشقوزده نه قدرت واریمیش
سنده چوخ مهر و وفا بوندا خوش الفت واریمیش
گرمدور عشقوزیله بزم محبت یارالی
بو قوجاقلاشماقا حیراندی طبیعت یارالی
.
.
سن گل گلشن زهرا بو سنه غنچۀ ناز
گل گلون حالینه باخدوقجا ائدر سوز و گداز
چشم عالم گوره بیلمز بیله خلوتگه راز
عشق خورشیدی تجلّی ائلین یردی بو پر
یرلرون افضلی غوغا ائلین یردی بو پر
.
.
گوگلوم ایستور سنه درد دل ائلم یوخدی مجال
آلوب اطرافیمی رجّاله لر ای فخر رجال
گیدورم کوفیه دلده غمیم آشفته خیال
آتا پاتختنی باهم لیگه گورسوک خوش اولار
چوخدی اغیار ایکیمیز باش باشا وئرسوک خوش اولار
.
.
توکرم اشکیمی دنیانی حسینچی ائدرم
ملرم عالم امکانی حسینچی ائدرم
دانشوب گبر و نصارانی حسینچی ائدرم
سنمارام دشنمیوی منطقیله سندیرّام
کوفه دن شامه کیمی پرچم نصرت وورّام
.
.
ائدورم من کوچری ائللره مقتلده پیام
یولی دوشسه ائلسه یا که بو صحراده مقام
محض خشنودی زهرا ائده لر حقّه قیام
نچه گون قاره گیوب رخت نشاطی سویالار
سنه ماتم دوتالار زینبه منّت قویالار
.
.
خیمه گورجاق سالالار یاده یانان خیمه لری
شعله ایچره دولانان عدۀ شوریده سری
اولدی نمرودیدن آرتوق بیله لر شمر جری
آیری سالدی اود ایچینده بالالاردان آنانی
الینی دوتدوم اوتوردوم چوله بیر بیر یانانی
.
.
وای منه وای منه نه حاله قالوبدور بدنون
وای منه کرب و بلا تپراقی اولموش کفنون
وای منه کیمدی بو صحراده سنون وای دینون
واردی مانع باجوون ناله سینه رقّتینه
قالدی بو ایش عرب عورتلرینون همّتینه
.
.
#کوچ_کربلا #انور_اردبیلی
#دور_حسین_زینبوی_کرب_و_بلادن_یولا_سال
#یادگار_انور
#ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  فاطمۀ دوم علی اختر طاها خوش آمدی! #زینبیه_سازگار

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی