ولادت حضرت موسی بن جعفر (ع)
.
#زبدةالاشعار
.
: @nohe_torki
.
مرحوم شعاع تبریزی
.
رشک طور آفاقی بیر خورشید انور ایلدی
نور زیبای رخ موسی بن جعفر ایلدی
.
.
عالم معناده حیران قویدی موسانی بو نور
شعشعاتیندن او نورون خیره لندی چشم حور
منفعل اولدى طلوعیندن کواکب ماه و خور
بو تجلّیاته غبطه مهر و اختر ایلدی
.
.
دولدوراندا محور آفاقی نور سرمدی
طوردن باش ایتدی کونی انجلای احمدی
عالم معناده خوشحال اولدی جدّ امجدی
خالقه حمد و ثنا ساقیّ کوثر ایلدی
.
.
شأنینه قربان اولوم اولماز بیله شأن وجلال
سینۀ خورشیده نصب ایتدی تعجّبدن مدال
دوشدی حیرتدن محاقه چرخ اطلسده هلال
گوردی بو نور عالمی بسکه مسخّر ایلدی
.
.
جمله اقطار سماوات اولدولار مبهوت و مات
مقدمیندن رشگ جنّت اولدی صحن شش جهات
بهره مند اولدی بو لطف حقدن اهل کاینات
اهل حقّه حق او شاهی خلق یاور ایلدی
.
.
لبده انگشت تحیّر فرقۀ ناسوتیان
صف به صف دوردی تماشایه او دم لاهوتیان
سجدۂ شکره قویوب باش قدسیان سبّوحیان
دلده لاحول و لا جاری ملکلر ایلدی
.
.
دوشدی سس گوگلرده بوموسی بن جعفر نوریدور
فاطمه دل بندی فرزند پیمبر نوریدور
شهرتی باب الحوائج پور حیدر نوریدور
حق اونی مخلوقینه حجّت مقرّر ایلدی
.
.
بیستم ذی الحج اولاندا هفتمین خورشید دین(1)
باش ویروب برج امامتدن او نور نیّرین
باش ترابه قویدی دوتدی سمت افلاکه الین
اوز موحد اولماقین اظهار او سرور ایلدی
.
.
هیکل توحید اقرار ایتدی وحدانیّته
چکدی یعنی خطّ بطلان جهل و نفسانیّته
ویردی پیرایه او اقراریله انسانیّته
یعنی دعوت خلقی راه حقّه یکسر ایلدی
.
.
گون به گون سالدى «شعاع» حبّی نور عالملره
گون کیمی تابش ایدردی نور عشقی دلّلره
مایۀ آلامدی امّا او شه مشرکلره
حقّینی کتمان اودی قوم ستمگر ایلدی
.
.
ایسته دی هارون او نور حقی خاموش ایله سون
قلب زهرانی خدنگ ظلمونه توش ایلسون
خلقی جهل و انحرافیله هم آغوش ایلسون
حجت الله قتلینه اقدام او کافر ایلدی
.
.
اون بیر ای دورد ایل و یا اون یدی ایل بو سروری
ایلدی ظلمیله زندانی ولی داوری
مونسی زنجیر اولوب آب و غذا اشتری
روز و شب محبسده ناله پور حیدر ایلدی
.
.
اولماسیدی عید مولودی شه بی یاورین
عرض ایدردیم کیم نجه محبوسیدی سلطان دین
یر نه یر زندان نه زندان چاهدی ایله یقین
قامتین بوکدی امامین زار و مضطرّ ایلدی
.
.
کاش هارون ایلییدی تک او ظلمه اکتفا
ویرمییدی اول غریب و بیکسه زهر جفا
اولمییدی بیرده مأموری اونون سند دغا
سند ظلمی سالدی اود قلبین پر آذر ایلدی
.
اولمادی بر کس دیه هارونه ای حقدن بری
بوغریبون وار نه تقصیری اونا اولدون جری
بیر بیله اینجیتمه یاندرما دل پیغمبری
بسدی ظلمون قلب زهرانی مکدّر ایلدی
.
.
طوطی طبعون «شعاع» جوش و خروش ایلور گینه
قلبوی امواج سرگردانه توش ایلور گینه
صرصر غم عیشوون شمعین خموش ایلور گینه
سوز سوزی چکدی عزا نقشین مصوّر ایلدی
.
.
.
.
(1)در اصل اینطور بود :هفتم ماه صفرده هفتمین خورشید دین
.
.
#کاظمیه_شعاع_تبریزی
#کاظمیه_میلادیه
#رشک_طور_آفاقی_بیر_خورشید_انور_ایلدی
#ترکی
.
#زبدةالاشعار
.
: @nohe_torki
نظر دهید