رنگینی الدن ویروب حبّ ولایت کوفه ده #مسلمیه_هدایت_تبریزی

حالات حضرت مسلم علیه السلام
.
زبدة الاشعار

?: @nohe_torki
.
هدایتی تبریزی
.
رنگینی الدن ویروب حبّ ولایت کوفه ده
قوزادی باشین نفاق ئولدی صداقت کوفه ده
.
مسلمی تک قویدی مسجدده نمازاوسته گیدوب
ایولره بیعت پوزان دل مرده امّت کوفه ده
.
چخدی مسجددن گوروب یوخ یارویاوردن بیری
غربتین مشکل لرین لمس ایتدی حضرت کوفه ده
.
مرکبین آزاد ایدوب حیرت زده دوشدی یولا
مسکنی یوخ گیتسین ایتسین استراحت کوفه ده
.
قلبی سندی، غصّه دن پژمرده اولدی صورتی
حمله وراولدی اونا مین درد ومحنت کوفه ده
.
کوبه کوشهری گزورآزرده خاطربی هدف
یوخدی بیرکیمسه اونی ایتسین اجابت کوفه ده
.
آهی آه اوستن چکور هردن باخیرگوی سمتینه
کوفه اهلیندن ایدورحقّه شکایت کوفه ده
.
کوفه نی گزدی غریب کوفه چاتدی بیر یره
بیرعفیفه عورتی گوردی اوساعت کوفه ده
.
ایتدی فرمایش سوواگلسه گمانین تشنه یم
بیر ایچیم سوویرمنه،ایله سقایت کوفه ده
.
سوگتوردی عورت،آلدی ایچدی امّا گیتمه دی
عورت عرض ایتدی جوان ایله رعایت کوفه ده
.
گیت دایانما بوردا حرمت حقّینی حفظ ایت جوان
اوّل شب دورگیت ایله استراحت کوفه ده
.
ایتدی فرمایش غریبم کوفه ده یوخ بیریئریم
گلمیشم حقّه ایدم خلقی هدایت کوفه ده
.
مسلمم قائم مقام سرور اهل حجاز
بوجماعت منله اوّل ایتدی بیعت کوفه ده
.
ایمدی امّا بیرنفرقالموراوسایسیزعدّه دن
محض لله ایله سین مندن حمایت کوفه ده
.
عرض قیلدی وای منه تک قویموش انصارون سنی
دام تزویزه دوشوب مرغ سعادت کوفه ده
.
گل منیم ایله ایویمده بوگجه سکنا آقا
قیل تفضّل ایت منی مقرون منّت کوفه ده
.
شهره باخ بیرشهرین اهلیندن تاپولموب بیرکیشی
حامی سی بیرشهریدن اولدی بیرعورت کوفه ده
.
وارد اولدی بیر اطاقدا ایلدی سکنا آقا
اولدی اخلاصیله مشغول عبادت کوفه ده
.
راکع وساجد ایدوب صبح عمرونون آخرشبین
گه نماز ایتدی گهی ایتدی ندابت کوفه ده
.
قلبینین دردین دیدی درگاه حیّ داوره
حقّی دوتدی حالینه صاحب شهادت کوفه ده
.
.
ناگهان درک ایلدی واردورهیاهوکوچه ده
جنگینه عزم ایلیوب بیرجمع نیروکوچه ده
.
.
طوعه دن آلدی حلالیّت اولوب ایودن کنار
حمله وراولدی سپاهه شیرشیرکردگار
.
کیم شجاعت ادّعاایتدی دایاندی قاچمادی
تیغ تیزمسلمه باشی،قولی اولدی دچار
.
ایستدی کیم کسب نام ایتسین ئوزون ویرسین نشان
باشینی الدن ویروب اولدی وجودی یرده خوار
.
حیدریّتدن بیرآزویردی نشان کوفی لره
تک باشاروبه صفت کوفی لره گتدی فشار
.
بعضینی ووردی بؤلوب شمشیریله سالدی یره
بعضینی گوتدی داما آتدی الینده کاه وار
.
خاک وخونه چکدی قرخین جنگجوی دشمنین
جسم بی سر،پیکربی روح اولوب یولدا قطار
.
اشعث اوغلی یوللادی ابن زیاده بیرپیام
تئزکمک یوللا بیزه ای حاکم با اقتدار
.
یوللادی بئش یوزنفر،بیرسوزسفارش ایلدی
حاجب،ابن اشعثه گلدی یتشدی بیقرار
.
موبموشرح ایلدی ابن زیادین سوزلرین
اشعث اوغلی غیضه گلدی ایلدی ترک وقار
.
گیت دیدی ابن زیاده دی،بولورسن کیمدی بو
تیز شمشیربنی هاشمدی،ایلورکارزار
.
فکرایدورسن کوفه اصنافیله من جنگ ایلورم
مرتضانون ایلوری جنگ وجدالین آشکار
.
کوفه اوباشی قارشدی بیربیره قوّت تاپوب
هرطرفدن حمله گتدی مسلمی ایتدی حصار
.
گه باخور ساقه صولا یوخدور گورور بیرآشنا
یاحجازین سمتینه یوزدؤندروب گاهی باخار
.
کاش اولیدی اکبروعبّاس یانیمده دیور
چوخ چتیندی تک قالا دشمن آرا هرنامدار
.
دگدی ناگه آغزینا بکرابن حمران ضربتی
اوست دوداقی قطع اولوب دوشدی لبیندن آخدی ثار
.
بیربیله یاریله ایلوردی گینه شیرانه جنگ
بام لراوستن توکوردی باشینه اود، اهلی نار
.
گوردولر دوتماق چتیندی اول رشادت پیشه نی
خط سیرینده بویوک گودال فوری قازدیلار
.
سوق ویردیله اونی اول قانلی گوداله طرف
حیله ومکریله گوداله اوشیری سالدیلار
.
سالدیلارفرصت اله،ووردی قاچانلار مسلمی
یاره اوستن یاره گوتدی پیکراولدی خون نثار
.
.
تیغ وشمشیره گمانی گلدی کیم ووردی اونی
داش یاراسی ،نیزه خنجریاره سی یوردی اونی
.
.
اشعثون اوغلی ویروبدورمسلمه وعد امان
آلدی شمشیرین زره سویدی بدندن دشمنان
.
قوللارین باغلادیلارچکدی یارالی دلدن آه
کوفه نین گوردی امانی بی اماندور دردجان
.
هتک حرمت ایتدیلربیعت شکن لر مسلمه
طعنه لی سوزلر نثار ایلردی بیعت سندیران
.
وارد دارالعماره ایتدیلراول سروری
دوردی،دیواره دایاندی،ایلدی دردین بیان
.
یاندی اکبادیم سوسوزدان چوخدی یارم تشنه ام
بیرایچیم سوایلیون احسان منه ای کوفیان
.
دل یاراسی ووردولاراول حضرته اهل نفاق
یاندی عطشان قلبی چکدی دلدن آه جانستان
.
بیرنفررحمه گلوب بیرجام ویردی سواونا
تایتوردی آغزیناجامی سوجامی اولدی قان
.
اوچ دفعه تکرارایدوب قانلی سویی ایتدی عوض
قان امان ویرموب ایچه بیرجرعه اول حضرت سودان
.
سوّمین دفعه توکولدی دیشلری سوجامینه
قسمت اولمادی ایچه سوخسته تشنه میهمان
.
وارددارالعماره ایتدیلرویرموب سلام
حاجب ابن زیاده بوعمل گلدی گران
.
سسلدی مسلم امیرکوفیه ایله سلام
قیلدی فرمایش سلامون اهلی وارای دون روان
.
فاسقه هیهات ایده مسلم سلام ای دون سیر
بیزده بیرزرّه تاپولماز دون صفت لیقدان نشان
.
مسلمه ایتدی زیاد اوغلی عتابیله خطاب
سن گلندن کوفیانون اتّحادون پوزموسان
.
باشیزه دوشموش حکومت فکری الله قویمادی
ویردی بونوعی جوابین رادمرد جانفشان
.
کوفه اهلی جانه گلمیش ظلمدن،بیداددن
ظلموله قتل ایلیوبدورکوفه ده ملعون آتان
.
قیصروکسریٰ امیری تک حکومت ایلیوب
مردمه قان اوتدوروب،هئچ حق دیین تاپموب امان
.
گلمیشم من کوفه ده قسط وعدالت ایلیم
سنّت پیغمبری احیا ایدم،ای بدگمان
.
بوسوزه دؤزموب زیاداوغلی دانشدی ناسزا
بیزدیدی بوملّته خدمت ایدوردوخ ای جوان
.
شهریثربده سن اوندا می گساریدون هله
بیزآچوردوخ کوفه نون مشکل لرین سرّوعیان
.
مسلمون قانی جوشوب فرمایش ایتدی بوسوزون
حق بولورکه افترادور،کذب فاحشدور،اوتان
.
.
می ایچن سن سن امیرون دورکه ناحق قان توکور
بی گنه انسانلارین قانین یره آسان توکور
.
.
ویردی حکم قتلینی ابن زیاد فتنه گر
ساق صولا بیر گوزدولاندیردی سفیرنامور
.
بیرنفرایستوردی که ایتسین وصایاسین اونا
بیرنفرایستوردی که اولسون امین وامربر
.
گوزلری سعداوغلونادوشدی،بویوردی یابن سعد
صادرایتدی قتلمین فرمانینی بوتخم شرّ
.
اوچ وصیّت ایلورم،ایله وصایامه عمل
امرواجب دوروصایایه عمل ایتسن اگر
.
اوّلی دفن ایله قویما نعشیمی یرده قالا
یرده قلساپیکریم توهین اولارحرمت گیدر
.
کوفه نین اصنافینه واردوربیرآزبورجوم منیم
بوزره بوتیغی سات ویربورجوم اوسا هرقدر
.
یازمیشام بیرده حسینه کوفیه فوری گله
عزم کوفه ایلیوب حتماً اوشاه دادگر
.
یازاونابوشهره گلمه یاحسین بیعت سینوب
هرقدمده بیر تله قورموش بوقوم بدسیر
.
باشه که یتدی وصایاسی،دولاندی ابن سعد
فاش ایدوب ابن زیاد دونی ایتدی باخبر
.
ایت دیدی حقّ اماناتی رعایت یابن سعد
بووصیّت لرامانتدورسنه ای دل کدر
.
مسلمه دارالعماره بامینی یر ویردیلر
بامین اوستن بیر حجازین سمتینه سالدی نظر
.
زمزمه ایلوردی هردن یاحسین گلمه بورا
گلمه،گلسن کوفه خونخواری سوسوزقانون توکر
.
ویرمه دی جلّادی فرصت قلبینین دردین دیسین
بولمورم نه ظلم ایدوب، ووردی نجه،اولدی نه لر
.
بوقدروارکه،کسیلدی باش بدن دوشدی یره
فکرایله گورپیکری یرده نه احواله دوشر
.
قانی رنگین ایلدی دارالعماره بامینی
قان ایچینده یرده باشسیزپیکری پژمرده تر
.
کاش بو ظلمه کفایت ایلییدی کوفیان
دفن ایدیدی اول یارالی پیکری اهل شرر
.
پیکری دفن اولمادی هئچ،آیری فکره دوشدولر
باغلیوب بیرایپ ایاقیندن اوشیرین کوفی لر
.
چکدیلریرده اوباشسیزیارلی گل پیکری
کوچه بازاری دولاندیردی گروه بی بصر
.
واژگون حالدا اونی آویزهٔ دارایتدیلر
ارمغان گوندردیلرباشین یزیده سربسر
.
ای #هدایت داش ئورکلرمسلمه آغلاریانار
آزدی یانسان آغلاسان اولسان بو غمده خونجگر

.

#مسلمیه
#رنگینی_الدن_ویروب_حب_ولایت_کوفه_ده
#هدایت_تبریزی
#ترکی
.
#زبدةالاشعار

?: @nohe_torki