روز محشر چون خدادن حکم نفخ صور اولور #قیامت_راجی_تبریزی

حالات و اوضاع #قیامت
.
.
مرحوم‌ میرزا ابوالحسن‌ راجی تبریزی
.
.
روز محشر چون خدادن حکم نفخ صور اولور
عرصۀ محشر او نفخ صورله پُر شور اولور
.
.
مصدر غیبیّه دن صادر اولار حکم حضور
قبردن باش قوزار اِمّا شاکِراً اِمّا کَفور
کشف اولار معنای یَومَ یَبعَث مَن فیِ القُبور
خلق جمله ایتدوقی اعمالیله محشور اولور
.
.
خوفدن اَینَ اَخی نه حضرت موسی دیر
هول محشردن نه مریم دلده بیر عیسی دیر
اول محبّتلن گینه یعقوب وا نفسا دیر
یوسفین آختارماز اولکس کیم گوزینده نور اولور
.
.
چون گورر بو خلق چهر مهرده تأثیر تاب
چرخ چارمدن نزول ایلر هویدا آفتاب
گرم اولار بیر نحو کیم محو اولسون ایستر شیخ و شاب
مهربان باجی برادر بیر بیریندن دور اولور
.
.
نعرۀ دوزخ ز بس یغمای عقل و هوش ایدر
شعله ور اولدوقجا خلقی نطقدن خاموش ایدر
حدّتندن مغز باشلار کاسه سینده جوش ایدر
چشم خلقه روز روشن چون شب دیجور اولور
.
.
نامۀ اعمالینه اهل عذاب ایلر نگاه
جز گنه گورمز اولور بس نادم و بس روسیاه
دمبدم سویلر سنون ای نفس اَلوندن آه آه
ایمدی هر مسطور افعالیم منیم مشهور اولور
.
.
اهل تقوانون گورر چون رتبه سین اهل عذاب
انفعالیندن دیر یا لَیتَنی کُنت تُراب
بیزلری خلق ایتمییدی کاش ربّ مستطاب
بُلمدوق کیم متّقی لر غرق بحر نور اولور
.
.
عرض ایدلّر اولموشوق یا رب پشیمان خطا
روسیاهوق بنده لوقدا قیل دوباره عمر عطا
بیرده قایتار بارالها بیزلری دنیایه تا
ایلیاق طاعت سنه هر قدر کیم مقدور اولور
.
.
عقلی آتدیم قلبدن ای نفس دون دوتدوم سنی
ساکن تخت سلیمان ایلدون اهریمنی
بُلمدیم اولدوم عَبَث مفتونون ای نفس دنی
عاقبت مقهور اولور هر کیمسنه مغرور اولور
.
.
چون یتر فرمان قهر آمیز خلّاق جلیل
ختم پیغمبر گورر مضمون حکمی بو قبیل
امر ایدر بو امّت الدن گیتدی ایوای جبرئیل
گلمسه صدّیقۀ کبری هامی رنجور اولور
.
.
سطوت قهر الهیدن چکنمز کیمسه دم
هیچ کیمون نطقنده قالماز قوّۀ لا و نعم
حضرت زهرا قویار تا که او صحرایه قدم
بیر جمالیله که محشر رشگ کوه طور اولور
.
.
محضر حقّه یتوب سویلر بِصَد شور ونوا
نیلمشدی امّته آخر حسینیم ای خدا
ایستورم گلسون او نوعیله بساط کربلا
شور محشردن عَلیحّده بیر اوزگه شور اولور
.
.
لشگر کوفه تاپار صورت همان تصویریله
حرمله پیدا اولار اَلده کمان و تیریله
مَنقَذ ابن مروه ناحق قان توکن شمشیریله
شمر اَلینده قانلو خنجر گَلمگه مأمور اولور
.
.
بیر طرفده اهلبیتون گردنینده سلسله
اُسرایه عابد بیمار اولور سر سلسله
قطره قطره اشگ ایدر جاری یوزه بیفاصله
دلده ورد و ذکری یا مَن نَحره منحور اولور
.
.
حُزن قلب زینب ایلر محشری بیت الحزن
باشدا مین دوقّوز یوز اَلّی بیر یارالو پیرهن
سویلر هانسی جسم اولور بو قسم بیغُسل و کفن
یا کیمون توپراقی اوز اعضاسینه کافور اولور
.
.
شورله بیر شور اولور باشدان باشا اول عرصه گاه
یدین اوز الینده اوز باشی چون قرص ماه
باجیسی ماه بنی هاشم باشین ایلر نگاه
اَللّری چون یوخ اونون بو باره ده معذور اولور
.
.
عرض ایدر شاه شهیدان ایخدای لَم یَزل
من سنیله عهد و پیمان ایلدیم روز ازل
کربلاده ایلدیم اوز ایتدیقیم عهده عمل
شاهدیم بو باش بو اَل بو سینۀ مکسور اولور
.
.
سنده یا رب باخ منیم بو سینۀ سوزانیمه
خنجر و شمشیریله ناحق توکولموش قانیمه
امّتین جرم و گناهین دوت منیم بو جانیمه
درگهونده خاطریم بُلّم منیم منظور اولور
.
.
روشن ایله خانۀ قبری بو شمع آهله
گوز یاشیندان جمع قیل بو راهه زاد و راحله
بَسلَمه جسمون بو عمر اندک و کوتاهله
عاقبت «راجی» نصیب رزق مار و مور اولور
.
.
#قیامت
#روز_محشر_چون_خدادن_حکم_نفخ_صور_اولور
#راجی_تبریزی
#ترکی
#زبدةالاشعار