ریانی بوشلا عزیزیم، صفانی گُل لَندیر #پندیات_سیفی_اردبیلی

پندیات

….

سیفی اردبیلی

….

ریانی بوشلا عزیزیم، صفانی گُل لَندیر
سئوار بو رهگذرِ کاروانی گُل لَندیر

آپارمیوب عُقلا کِید وکینه دن بهره
سرای اُلفت و مهر و وفانی گُل لَندیر

قلمی نیش ایلیوب اهل عشقی اینجتمه
اگر گلاب ساتانسان زبانی گُل لَندیر

یاواش یاواش بو فنا ایوده عُمروموز قوتارور
عمیق فکر ایله سِیرِ زمانی گُل لَندیر

نه فرقی واردی که من یاخچی سوز یازام یاسَن
منیم، سنون نَدی، بَزم ولانی گُل لَندیر

ستاره آیدان آلار نور، ئوزینده یوخدی هنر
تلاش ایله گُونَش اول کهکشانی گُل لَندیر

حسین دینده همیشه رضای دلبری گَز
نگاریدن مدد آل ماسوانی گُل لَندیر

آچاندا طاعت خلّاق عشقه سَجّاده
حضور قلبیله ذکر و دعانی گُل لَندیر

علی مُریدی سَن، انسانلیقا تلاش ایله
فنا حیاتیده نام و نشانی گُل لندیر

عَمَلده حیدری اول، بار دردی چیگنوه آل
محیط زندگی بینوانی گُل لَندیر

وقار درسینی آل شهریار عاطفه دن
نَمای سُفرۀ درد گدانی گُل لندیر

مَرام زینبی تاپ، غملری گوزَلّیک گور
خَم اولسا قَدّون اولوب، کربلانی گُل لَندیر

#پندیات
#شاعر
#ریانی_بوشلا_عزیزیم_صفانی_گل_لندیر
#سیفی_اردبیلی
#ترکی