زینب او گونکه داخل بزم شرابیدی #مجلس_یزید_صحاف_تبریزی

ورود اهل بیت پیغمبر به #مجلس_یزید
.
.
مرحوم صحاف تبریزی
.
.
زینب او گونکه داخل بزم شرابیدی
نار غم و مصیبتله دل کبابیدی
.
روم و فرنگ ایلچیلری صف صف اگلشوب
بیر ایله بزمه وارد او عصمت مآبیدی
.
زردوز پرده لرده یزیدون حرملری
پیغمبر اهل بیتی ولی بی حجابیدی
.
سانما على بالالارینی سن نقاب سیز
مه یوزلرینده گیسوی مشگین نقابیدی
.
وارد اولاندا بزم یزیده مخدّرات
یانسون دلیم دیسم هامی بند طنابیدی
.
بی اعتنا یزید اوتورمشدی تختده
مشغول شُرب خمر سوال و جوابیدی
.
بوینوندا غُلّ جامعه دورموش امام عصر
گویا نظرده اهل حبشدن حسابدی
.
کسمشدی بوینینین دامارین غل جامعه
دلگیر ضعف شدت و بی صبر و تابیدی
.
قویموشدی پای تختینه سلطان دین باشین
مقصودی قلب زینبه رنج و عذابیدی
.
بولمزدی نیلسون او زنازاده ، وجددن
بسکه شراب کبریله مست و خرابیدی
.
گه ناسزا دیردی خواتین عصمته
گه فکری خردا قزلارا غیظ و عتابیدی
.
شطرنج تخته سین دوشه میشدی او بزمده
خوشنود قتل خسرو گردون جنابیدی
.
نرد اوینیوب حریفینه غالب اولان زمان
گاه الده خیزران، گهی جام شرابیدی
.
لعل لب حسینه آغاج آشنا ایدوب
منظوری دهن و رأس شه مستطابیدی
.
تیترردی نازنین بالالار برگ بید تک
قانه دونن اورک لری پر اضطرابیدی
.
بیر سمتدن بنات پیمبر سزیلتسی
بیر یان نوای بَربَط و چنگ و رَبابیدی
.
هر سوز گلوردی نطقنه ایتمزدی اجتناب
چون تخت سلطنتده او گون کامیابدی
.
زهرا قزی گوروب او دنی گیچدی حدّدن
گفتار باشلادی دیه سن بو ترابیدی
.
بیر سوزناک غیظله سسلندی ساکت اول
فکر ایلوسن بو گوردوقون ایشلر ثوابیدی
.
وورما آقاج او لبلره جدّیندن ایله شرم
بو باش رسول اکرمه نایب شاهیدی
.
بو ناخوشی که ساخلامسان قید ظلمیلن
ظالم اوتانمسان که بو نه انتصابیدی
.
سس ایستدی ویره باجیسی زینبه اودم
اثبات حقّینه نظری فتح بابیدی
.
ناگه اوجالدی قاخدی هوایه حسین باشی
قانلو جمالی جلوه ده چون آفتابیدی
.
ظلم آیه سین فصاحتله ایلدی بیان
باشدان باشا محاسنى قاندان خضابیدی
.
اوضاع بزمی پوزدی هامی سربدوش اولوب
بو عالم خیالیدی یا اینکه خوابیدی
.
حیرت گوتوردی شام و فرنگ اهلینی تمام
حیران ماجرایه هامی شیخ و شابیدی
.
بی اختیار دوردی ایاق اوسته #جاثلیق
قلبی دولی صفائیله چشمی پر آبیدی
.
سسلندی ای یزید اوتان بیر حیا ایله
پیغمبر اهلینه بو نه غیظ و عتابیدی
.
بو قانلو باش که خارجی آد قویمسان اونا
ختم مآب عزیزیدی امّ الکتابیدی
.
نه سوزدی خارجی باشی قرآن اوخور مگر
بالله بو باش حقیقت و دینین نصابیدی
.
حکم ایلدی یزید آپارون ئولدورون بونی
ایتدی منه بو بزمده بو نه خطابیدی
.
جان تک یوگوردی باغرینا باسدی حسین باشین
رخسارینه ایدن جریان اشگ نابیدی
.
اسلامه گلدی ایلدی جان فدیۀ حسین
تاپدی او شاهراهی که عین صوابیدی
.
«صحاف» مختصر ایله بو اودلی قصّه نی
شرحی بتول خاطرینون التهابیدی
.
یاز شام شوم قصه سنی اوزگه طرزیله
روز ازل او سوز که سنه انتخابیدی
.
#مجلس_یزید #صحاف_تبریزی
#زینب_او_گون_که_داخل_بزم_شرابیدی
#ترکی
#زبدةالاشعار