زینب گورنده شاه شهیدان مزارینی #اربعین_شانی_تبریزی #اربعین_ذهنی_زاده

اربعین
.
زبدة الاشعار
.
: @nohe_torki
.
مرحوم شانی تبریزی و مرحوم حاج عبدالعظیم ذهنی زاده
.
زینب گورنده شاه شهیدان مزارینی
شوره گلوبدی آرتیروب ئوز آه و زارینی
.
تل سلام اوسته سلامه دل اولمادی
آلموشدی ذوق قبر حسین اختیارینی
.
البته نطق اولماز ادای کلام ایده
عاشق گورنده وصل زمانینده یارینی
.
بولمم سوروندی یا یریدی یتدی قبرینه
واضح سوروشما حفظ ایله زینب وقارینی
.
بلبل نجه تاپاندا گولون گلستانده
شرح فراقه اَوَّل ایدر اعتذارینی
.
ثاراللّهین مزارینه زینبده تا یتوب
آچدی بیان حاله لب دُر نثارینی
.
عرض ائتدی آلتی گوشه لی قبره باجون فدا
چوخ غملنوب دل آختارور اوز غمگسارینی
.
قبرون مجاوری یوخوموش بیله توز باسیب
سیلَّم سرشک چشمیله ایندی غبارینی
.
شامه گیدنده نعشیوی دفن ایلینمدیم
عفو ایله بو قصورین اولان شرمسارینی
.
گوردون نجه آپاردیلا گئتدیم نه حالیله
آلمیشدیلار بو غمزده نین اختیارینی
.
بولدوم علاوه ساخلیوب ائتسون صبا کفن
گول جسمیوه چولون خس و خاشاک و خارینی
.
آلدون علیِّ اصغری آغوشه جان کیمی
ایتدون ربابین حشره کیمی ناله کارینی
.
باخ بیر ربابه سینه سینه سود گلوب گزر
دشت بلانی آختارار ئوز شیر خوارینی
.
ویر سود امر بالاسینی آلسون قوجاقینه
بوش گورمه سینله اهل حرم تا کنارینی
.
نی تک گلوبدی نالیه بو مدتی مدام
هر دم آچوب عذارینه گوز آبشارینی
.
هجران غمی نوای حرم نالۀ رباب
بالمَرَّه زینبین آلوب الدن قرارینی
.
بو مدّت مدیدی دوزوب هجره عاقبت
گتدیم مزارون اوستونه محنت قطارینی
.
معذوریدی رقیّه قیزون قالدی شامده
ویرسن اجازه شرح ایدرم اعتذارینی
.
ویرانسراده حسرتیله ویردی جان قیزون
مانعدی شرم شرح قیلام احتضارینی
.
سولدی حجاز گلشنینون تازه غنچه سی
شامین هواسی ائتدی خزان نوبهارینی
.
تابوتین ایلدیم او قزون خشت پاره دن
گور بو تراب عزیزه سی انجام کارینی
.
ویردیم تَیَمُّمیله او مظلومه غسلینی
آچدیم اگر چه ئوستونه گوز آبشارینی
.
ئوز قاره کوینگین ئوزونه ایلدیم کفن
تا تیره شام ، شامین ایدم روزگارینی
.
بیر کیمسه اولمادی بالامین قبرینی قازا
قازدیم ئوزوم او طفل یتیمه مزارینی
.
ویرانسراده دفن ایلدیم بیر خزینه من
صرّاف روزگار بولنمز عیارینی
.
قبره قویاندا آلنینی ئوپدوم دیدیم بالا
یات چک بو شهریده بی بیوون انتظارینی
.
بیر گون اولار که شامی دوتار قدر و قیمتی
عالم بولر بیز آل علی اعتبارینی
.
قویمام قالا او شهریده یالقوز رقیه نی
قویدوم ئوزوم اونیلا بو امرین قرارینی
.
گر ئولمسَم مدینیه گئتسم دایانمارام
ترک ایلرم پیمبر رحمت جوارینی
.
بیر باش گلوب خرابه ده اولام مجاورون
کسب ایلرم مجاورتین افتخارینی
.
یاندیرام آه شمعیمی هر جمعه آخشامی
روشن قیلام او روضۀ تاریک و تارینی
.
گوز یاشیمیله سو سَپرم هر گیجه گونوز
مژگانیمیله سیلَّم او قبرین غبارینی
.
توزلی مزارینه دوشرم فرش زلفیمی
حفظ ایلرم ئولونجه او روضه وقارینی
.
مندن سوروشسالار که هارالیدی بو بالا
ویرم نشان حجازده یثرب دیارینی
.
هر اوچ یاشیندا قیز یولی دوشسه خرابه دن
آلّام کناریمه ئوپرم گول عذارینی
.
مین دیللّریله دل دییرم بلکه دیندیره
گلزاریمین خموش مصیبت هزارینی
.
قالام او قدر تا اجلیم درک ایده منیم
ویرم حیاتیمین باشا لیل و نهارینی
.
گر نقص شأنی اولسا جوارینده یاتماقیم
قیلام من اختیار او شهرین کنارینی
.
توپراقلار اوسته گاه اوتوراردی او خسته دل
معلومیدی که غملر آلوب اختیارینی
.
هر سمتدن علاجی کسیلمیش یتیمه تک
بیزدنده گیزلدردی غم آشکارینی
.
هر دم ووراردی بارماقیلا نقش تُپراقا
بیر آز باخوب سیلردی او نقش و نگارینی
.
آخرده یازدی تُپراقا بیر کلمه سیلمدی
بیر آز تیکوب او کلمیه چشم خمارینی
.
بیردن اَگیلدی یازدیقینی ئوپدی آغلادی
قویدی او کلمه اوسته دل داغدارینی
.
آهسته بعضی سوز دیدی اما ایشیتمدوخ
آلدوق فقط او تنگ نفسدن شمارینی
.
آخرده سیلدی صورتیله یازدیقی سوزی
آلدی حرملرون هامی دلدن قرارینی
.
ایتدیم سؤال آی بالا نه یازمیسان یره
چوخ سالموسان گوگل لره محنت شرارینی
.
عرض ایتدی عمّه اکبریمین یازمیشام آدین
نیلوم غم اهلی آختارار اوز غمگسارینی
.
ایمدی اَلیم یتیشموری دامان وصلینه
طرح ایتمیشم آدیله گلایه شعارینی
.
چون بولموشم که آخر عمریمدی بو گیجه
عمریم قوتاردی روز و شب مستعارینی
.
بیر اولدوزام که آخماقیما مایل اولموشام
قبره چکر ئولوم بو ستاره مدارینی
.
فکر ایلدیم که قارداشیما ایلیوم خبر
بلکه گلوب گوره باجیسی احتضارینی
.
هر نیلدیم وسیله پیامه تاپانمادیم
بولدوم گِله یری عدم اختبارینی
.
یازدیم آدین یره سوزومی آدینا دیدیم
ایتدیم سفیر اکبره اسم کُبارینی
.
عرض ایلیه بو عرضیمی قارداشیم اکبره
قارداش آتارمی خواهر محنت دچارینی
.
جان ئوستیم یولوندا قالوب منتظر گوزوم
دور بارگاه خاطره بو غصّه بارینی
.
لطف ایله همّت ایله سنی ئولمه میش گوروم
آز زحمتیله دلدن آزات غم فشارینی
.
انصافیدور رقیّه ئوله گورمیه سنی
حسرت مکان ایده جگر داغدارینی
.
تئز گل بویون بلاسین آلوم آز قالور یخا
خوناب دل بنای دل پایدارینی
.
گوندردیم آه قاصدیمی کربلایه من
تا شامه دعوت ایلیه غم شهریارینی
.
عرض ایلیه که شام غریباندی شامده
گل بیر منوّر ایله بو ظلمت دیارینی
.
چوخ وار امید آتام گئجه ویرانیه گله
بیر یاد بود ایلیه بیز غم قطارینی
.
گلسه بابام خرابیه گر قویمارام گیده
سالّام کمنده پای دل بُردبارینی
.
عرض ایلرم که هر یره گیتسن آپار منی
گوزدن کناره آتما بو هجر اشگبارینی
.
بیرده شکسته دل قیزیوی آل کناریوه
ترمیم قیل بو شیشۀ دل انکسارینی
.
دریای بی کرانۀ محنت غریقیم
ای کشتی نجات اوزون دوت کنارینی
.
« شأنی » بو شرح محنتی یاخشی شروع ایدوب
ناقص قویوب بو نوحۀ بس شاهکارینی
.
تعقیب ائتدی « ذهنی » « سائل » بو سوزلری
سالدی ایشه او خامۀ زرّین نگارینی
.
لطف ایت بابا بو « ذهنیه » هر ایلده حجّیله
فیض زیارت حرم هشت و چارینی
.
خاصّه بو ایل گوتورسون هامی اهل بیتی نی
حجّ ایلسونله خانۀ پروردگارینی
.
اوردان گلوب بو شامده شوریله باشلاسون
پژمرده غنچه ن اوسته نوای هزارینی
.
.
#اربعین
#زینب_گورنده_شاه_شهیدان_مزارینی
#شانی_تبریزی
#ذهنی_زاده
#ترکی
.
#زبدةالاشعار
.
: @nohe_torki