مدح و میلادیه حضرت امام حسن مجتبی علیه السلام
#گریز به شهادت
.
.
.
حاج داود بیدق داری ( داور )
.
.
.
یازماقا شعری قلم بیر یاخشی عنوان آختارور
مرغ طبعیم پر آچوب سیر گلستان آختارور
.
بیر گلستانه گذاریم دوشدی چون خلد برین
گوردوم اوردا بلبلی شوقیله ریحان آختارور
.
سس گلوب خوش حالیوه ای بلبل شیدای عشق
بیر بئله گلزاری هر مرغ غزلخوان آختارور
.
شامل حال اولدی لطف یار ، گوردوم بیر گولی
گورمگین گوز ، ئوپمگین لب ، نکهتین جان آختارور
.
سویلدیم کیمدور؟ گلوب سس یوسف زهرادی بو
بیر گوزلدور وصلینی یعقوب کنعان آختارور
.
نام زیباسی حسندور بزم خلقت مشعلی
طوریده نورین بونون موسَی بنِ عمران آختارور
.
سنده گل درگاهینه سویله عزیز فاطمه
ای که عالم وصلوی پیدا و پنهان آختارور
.
کوه دردم ، سائلم ، محتاج درمان اولموشام
ای طبیبی که سنی شوقیله لقمان آختارور
.
گوشه ی چشمیله باخسان من بهشتی نیلورم
کوریدور هر کیمسه سنسیز باغ رضوان آختارور
.
گلمیشم درگاهیوه ای شهریار ذُوالحَشَم
من او موره بنزرم خوانِ سلیمان آختارور
.
ایسته دیم مدح ایلیم دریای صبر و حکمتی
اوخشادیم بیر تشنیه دریانی حیران آختارور
.
عُمری مانند غزل دردی قصیده دفتری
شرحِ شعرِ غصّه سی بیر عارف انسان آختارور
.
یاز قلم دریای احسانی نئجه سخدی فلک
آغلاسین احوالینه هر کس که احسان آختارور
.
قالدی تنها ئوز دیارینده دئدی صبر ایلرم
صبر ائدر مشکل لره هر دل که جانان آختارور
.
صبر ائدیب تا که قضاوت ایلیه آینده لر
چون قضاوت مسندی بیر زنده وجدان آختارور
.
دوزدی هر بیر محنته تا که گلوب پیک اجل
گوردی وصل یارینی اول شاه خوبان آختارور
.
تا سبودن ایچدی سو فرمایش ائتدی گل باجی
بیر یانان دل حالیمه بو قلب سوزان آختارور
.
شیعه تا روز قیامت آغلاسا واردور یری
جان وئرنده زینبی مظلوم دوران آختارور
.
بیر طبیبی که اونا درد و دوا وابسته دور
قالدی بیر حاله ئوزی جان ئوسته درمان آختارور
.
سنده آغلا ای قلم یاز غربت جانانه دن
آغلاسون هر کیم رضای حیِّ سبحان اختارور
.
سالدی بو مطلب منیم کرب وبلایی یادیمه
مرغ روحیم کربلانی چون که هر آن آختارور
.
اولدی برعکسِ مدینه قتلگاه کربلا
اوردا زینب گوردولر یارین پریشان آختارور
.
عرض ائدیب قارداش قوناقه حرمت ایللّر ولی
قمچی الده کوفه لی چوللرده مهمان آختارور
.
دختری که گول یوزون گون قالدی حسرت گورمدی
ایندی چولده سایه ی خار مغیلان آختارور
.
ای قلم بسدور اشاره طول وئرمه مطلبه
چون اشاریله سوزی هر عارف انسان آختارور
.
ای کریم اهل بیت ای درگهی باب المراد
درگهونده « #داور » درمانده احسان آختارور
.
.
.
#حسنیه_میلادیه #شهادت
#حسنیه_میلادیه
#حسنیه_شهادت
#یازماقا_شعری_قلم_بیر_یاخشی_عنوان_آختارور
#بیدقداری #زبدةالاشعار
#ترکی
نظر دهید