ساقیا وئر شراب روح افزا #ورود_محرم_دلریش

#ساقی_نامه
حالات مرد تعزیه دارِ سید ابرار
#گریز به #خرابه_شام
.
#زبدةالاشعار
.
: @nohe_torki
.
مرحوم دلریش
.
ساقیا وئر شراب روح افزا
ایله بو مرده گوگلومی احیا
.
چوخ پریشان ائدوب فراق منی
می گتور ایله تر دماغ منی
.
ساغر سرگرانیله می صاف
ساقیا ائتگیلن منه الطاف
.
نشئه سی اوزگه دور می صافون
اگر ای ساقی اولسا انصافون
.
مست اولان ساقیا بو ساغردن
ایسته مز سلسبیل و کوثردن
.
بو میی توکسه لر گِله گُل اولور
بو میی ایچسه زاغ بلبل اولور
.
خاک دری که بر می اولا افشان
خاک اولور درّ ریگ اولور مرجان
.
قطره سی دوشسه گر بیابانه
او بیابان دونر گلستانه
.
هر پریشانی شادمان ایلر
پیر اگر ایچسه نوجوان ایلر
.
جاهل ایچسه یقین اولور کامل
کامل ایچسه اولور او دریا دل
.
ایچسه گر ماهی قعر دریاده
مهر و ماهی گئچر تجلاده
.
کرم ائت ساقی منده مخمورم
نئچه مدّتدی باده دن دورم
.
وئر می ناب، ساقی پی در پی
غم دنیا ائدوبدی عمریمی طی
.
نوش قیلسام شراب گلگونی
گتورر نطقه طبع موزونی
.
.
حالات مرد تعزیه دار سید ابرار
.
.
ای سُون شاه کربلانی مدام
وی اولان صدقیله بو شاهه غلام
.
بیر زمان چیخ بو قید دنیادن
بیر فضیلت دیوم او مولادن
.
نقل ائدر راویان نیک شعار
واریدی بیرجه شخص تعزیه دار
.
ایلده اون گون محرّمی شب و روز
اوندا عشق حسین ائدردی بروز
.
بو حسینه قوراردی بزم عزا
گییونوردی اوزی عیالی قرا
.
صرف قیلدی تمام دولتینی
بیر گورون سیز او مردین همّتینی
.
گینه بیر ایل یتیشدی ماه عزا
اولمادی اوندا جیفۀ دنیا
.
دئدیلر خلق اُول پریشانه
اُول عزیز خدای سبحانه
.
ماه غم گلدی یتدی وقت بكا
نیه بس دوتموسان حسینه عزا
.
نه که راه صداقتیله دئدی
بلکه طعن و شماتتیله دئدی
.
ائشیدوب بو جوابی تعزیه دار
اولدی دنیا گوزینه تیره و تار
.
آغلیا آغلیا او ماه جلال
ائوینه گلدی مضطرب احوال
.
گوردی عورت، اری ائدر شیون
دئدی ایله بیان گوروم منه سن
.
ندی باعث گلوبسن افغانه
رقت ال وئردی اول پریشانه
.
آرتیروب ناله سین او بیچاره
دیدی یوخ سنده دردیمه چاره
.
گینه ماه محرم اولدی عیان
اودی باعث من ایلرم افغان
.
خالی دور گینه مال دنیادن
خجل اولدوم جناب زهرادن
.
بول بونی ئولدورور منی بو غم
دوتماسام شاه دینه گر ماتم
.
دیدی عورت او پاک بنیاده
آغلاما گلمه شور و فریاده
.
منده وار بیرجه پربها گوهر
اونی وئرّم سنه وفا پرور
.
او سنون دردیوه دوا ایلر
سنی بو غصّه دن رها ایلر
.
نئچه ایلدور گلور گمانیم اونا
گرچه وار میل بی کرانیم اونا
.
آپاروب سات اونی ائله سودا
گینه گل ایله تعزیت برپا
.
ائشیدوب بو سؤزی او صاحب هوش
ترک ائدوب ناله سین اولوب خاموش
.
دئدی، عورت هانی بس اول گوهر
دی گوروم ای زن نکو منظر
.
دئدی عورت، او مرد دانایه
حمد بیحد خدای یکتایه
.
بیزه بیر قز عطا ائدوب داور
یوخدی بیر بیله پربها گوهر
.
گرچه خاتوندور او حور لقا
ایلیوم من اونی حسینه فدا
.
باخما بو شهریده عزیز آدینا
سن آپار سات اونی کنیز آدینا
.
دئدی صد آفرین سنه ای زن
واریدیم بو خیالیده چوخ من
.
لیک مانع منه اولوردی حیا
اصل مقصودیمی سن ائتدون ادا
.
ایلدیلر قیزون اوزین حالی
دئدیلر سربه سر بو احوالی
.
دئدی اول قیز بو جانه منت دور
منی ساتسوز عجب سعادت دور
.
صبح اولوب دوردی مرد مردانه
قیزینون زلفینی ائدوب شانه
.
گوزینه سرمه چکدی با دل زار
گوتوروب اولدی عازم بازار
.
گتدی میدانه کیم او عالی مقام
جمع اولوردی اورا کنیز و غلام
.
عصره دین ساخلادی او بی یاری
اولمادی بیر نفر خریداری
.
اولدی اول مرد پاکدل مأیوس
اوز اوزینه ائدردی چوخ افسوس
.
ناگهان گوردی با هزار وقار
گلدی بیر مشتری ناقه سوار
.
او قزا مشتری سالوبدی نظر
گوردی خیلی نجیبیه بنزر
.
دانیشوب قیمتینی قیلدی تمام
وئروب آلدى ائدوب ائوینه خرام
.
گوتوروب پوللاری او مرد غیور
ذکری نام حسین دل مسرور
.
داخل خانه اولدی، اولدی خموش
دئدی عورت کنیز اولدی فروش
.
ائشیدوب بو جوابی چون عورت
اوزگه حاله دوشوب همان ساعت
.
وقت شام اولدی ایلدی اقدام
گتدی عورت قویوب آرایه طعام
.
آغلاماق دوتدی اونلاری او زمان
دئدیلر ای خدای کون و مکان
.
بیزه مین قیز اگر سن ائتسن عطا
جمله سین ایلروق حسینه فدا
.
یتمه میشدی تمامه چون بو خطاب
ناگهان ایلدیله دقّ الباب
.
دوردى ایاقه اول ملک فطرت
قاپویه گلدی ایلیوب سرعت
.
سرعتیله آچوب قاپونی او زن
گوردی كیم اوز قیزی ائدر شیون
.
دئدی هاردایدون ای ملک منظر
دئ صریحین به حق پیغمبر
.
قاچمیسان یوخسا قیل منه اظهار
دئدی مادر غریبه نقلیم وار
.
منی آزاد ائدوب جناب بتول
گوش قیل نقل ائدیم سن اولما ملول
.
آنا چون آلدى اول سواره منی
آپاروب شهریدن کناره منی
.
یتیشوب اوز ائوینه ائتدی قیام
باشینه جمع اولوب عیالی تمام
.
اولارا سویلدی ایا انصار
آلمیشام بیر نجیبه خدمتکار
.
من اوزومدن اونی رضا ائلدیم
هر ایشی اولدی جابجا ائلدیم
.
تا که اولدی زمان شام و عشا
منه بیر ائوده وئردیلر مأوا
.
دوشدی بو خانمانیمیز یاده
اولدی گوگلوم نوایه آماده
.
بیر قدر ائتدیم آه و افغانی
یوخی دوتدی من پریشانی
.
گوردوم اوندان صورا من تنها
یوخوما گلدی حضرت زهرا
.
گوتوروب قویدی باشیمی او زمان
دیزی اوسته به دیدۂ گریان
.
گه چکوب زلفیمه منیم الینی
گه تسلّی ایچون آچوب دلینی
.
بویوروردی منه چوخ اولما ملول
باشون آلمیش سنون دیزینه بتول
.
گر حسین آدینه کنیز اولدون
درگه حقیده عزیز اولدون
.
دوشموسن آیری مادروندن اگر
آغلاما ایندی من سنه مادر
.
دانیشوردوم او ماه طلعتیلن
صاحب خانه گلدی سرعتیلن
.
یوخیدان ایلدی منی بیدار
دئدی قالموبدی منده صبر و قرار
.
منه ایله بیان گوروم کیمسن
ائتمه بو سرّیوی نهان کیمسن
.
من کنیزم سنه سن اول خاتون
به حق ذات خالق بی چون
.
چون ساتوبلار حسیندن اوتری سنی
تانیموب صاحبیم باغیشلا منی
.
منه رؤیاده حضرت زهرا
دئدی بو ماجرانی سر تا پا
.
گلدی اوندان صورا او مرد عزیز
سویلدی ای اولان حسینه کنیز
.
بولمدوم من عزیز دنیاسن
جان نثار بتول عذراسن
.
دور ایاقه سن ای وفا کانی
ایلمه داخی آه و افغانی
.
آناوا یتوروم سنی بو زمان
دئدی رؤیاده چون شه مردان
.
میندیروب ناقیه گتوردی منی
آناجان تا سنه یتوردی منی
.
چون یتیشدی بو قصه اتمامه
گئتدی گوگلوم خرابۀ شامه
.
یاده دوشدی حسین اسیرلری
خولی و شمر دستگیرلری
.
داخل شام ائدنده اهل عناد
گور نه لر چکدی سید سجاد
.
دئدیلر خارجی او مولایه
چوخ گراندور علىّ اعلایه
.
قوللاری باغلى آل پیغمبر
ناقه لر اوسته قیرخ قرا معجر
.
گتدی چوخ آه و زاره شمر اولاری
چکدی هر رهگذاره شمر اولاری
.
عاقبت اول لعین آهن دل
کنج ویرانه ده وئروب منزل
.
آل طاها تمام بی پرده
آج سوسوز قالدیلار قوری یرده
.
شامین اهلی اناث یا که ذكور
ایلینده او رهگذردن عبور
.
اولارا چوخ اذیت ایلردی
یعنی طعن و شماتت ایلردی
.
نئجه قان اولماسون دل زینب
اولا ویرانه منزل زینب
.
ام لیلی اولور نئجه آرام
بَلَشه قانه اکبر ناکام
.
یتدی كلثومه گور نه درد و الم
گوردی عباسینون قولونی قلم
.
بارالها به حق شاه شهید
اهل شامین عذابین ایله شدید
.
دوستان علینی ایلمه خوار
به حق آه و ناله بیمار
.
واردی هر یرده مادح مولا
اجر وئر ای خدای بی همتا
.
بعد «دلریشه» اجر وئر یارب
به حق آب دیدۀ زینب
.
#ساقیا_وئر_شراب_روح_افزا
#ترکی
.
#زبدةالاشعار
.
: @nohe_torki