ذکر فضایل حضرت علی (ع) – گریز به شهادت
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
علی محبتی قلبیمده تاپموش استیلا
ایدوبدی دایرۀ عشقده منی دارا
.
علی وصیّ پیمبردی مطلقا سوز یوخ
او نکته دن دليم آئینه سی تاپوبدی جلا
.
علیدی نکتۀ توحیدی ایلین تفسیر
ولادتیندہ گتوردی دله کلام خدا
.
پیمبرین اوزینه نازل اولمیوب قرآن
اوخودی آیۀ قرآن او سیّد والا
.
علیدی کان فضیلت علیدی پایۀ دین
علیدی شمس امامت علیدی نور خدا
.
علیدی فتح فتوح و علیدی راحت روح
علیدی قاسم نيران و جنّت المأوا
.
علیدی شاه ولایت علیدی باب الله
علیدی عزّت امّت شفيع يوم جزا
.
اولوب او شهدی که شأنینده هل اتی نازل
امام عالم الأسرار بر عیان و خفا
.
علیدی ناطق قرآن حیّ لم یزلی
امام جن و بشردی او عروة الوثقی
.
علیدی منبع احسان علیدی کان کرم
علیدی دست خداوند فرد و بی همتا
.
جمال خالقه مرآت دور جمال علی
اودور تمام صفات حمیدیه دارا
.
علیدی فارس میدان علیدی سرور دین
علی صراط حقیقت علیدی راهنما
.
علیدی علت ایجاد سایه رحمت
علیدی نور هدا حجت حق یکتا
.
علی ولایتینه هر کس ایتمسه اقرار
جحيم روز جزاده اولور اونا مأوا
.
گر اولسا اهل ولایت مقصّر و عاصی
گینه جهنم اودوندان امید وار قوتولا
.
اولوبدی امّت اليله جهاندا چوخ مظلوم
جزا گونونده گينه أمّته او دور ملجا
.
اولوبدی عمر شریف و عزیزی آتمیش اوچ ایل
گوروب آز عمرده بیحد اذیّت و ایذا
.
یازیلسا حشره کیمی ابتلاسی قورتولماز
نه لر گلوب باشینا شرحه دلده یوخ یارا
.
پیمبر امّتينه مهربانیدی چوخ چوخ
ایدردی السیز ایاقسيز جماعتی احیا
.
مگر ایشیتمه میسن کیم تمام عمرینده
گورونمیوب ایده میل استراحته ابدا
.
گورونمیوب که اولا فوت بیر گیجه اوندان
تفحُّص فقرا و عیادت مرضی
.
گیجه زمانی گلنده او شاه دریادل
چیخاردی دیشره ایویندن ولی به طور خفا
.
یتیم و قاره لچک جمع مستحقّ لره
ویرردی دائم او شه مایه معاش و غذا
.
او صاحب کرمی کیمدی بولمدی بیرکس
دوتاردى الدن آدین ایلمزدی لیک افشا
.
جماعت آنلادی کیمدور او منبع احسان
او گون که یتدی کسوفه ستمله شمس هدا
.
گیجه کی عادتیله انتظاریدی فقرا
گوروبله وقت گیچوب گلمدی او میر هدا
.
امیدلر کسیلیب هامّوسی ایدوبله یقین
همین او سروری میش دادرس اولان اولارا
.
غرض بودور که یازام مرتضا شهادتینی
اگر کمک ایلسه حیّ فرد بی همتا
.
گیچوب وفات رسول گرامدن اوتوز ایل
ابوالائمه ایدوب ترک دهر و مافيها
.
اولوب او ایلده شب نوزدهم رمضان
بير اوزگه عالم اولوب شهر کوفه ده پیدا
.
همان گيجه او امامین تمام انصاری
ایدردیلر هاموسی مسجد ایچره حمد و ثنا
.
ایدردیلر هره سی بیرطرفده راز و نیاز
بیری تلاوت قرآن بیری ایدردی دعا
.
او گیجه جمله سی مشغولیدی نماز شبه
تمام صبحه کیمی ساخلامیشدیلار احيا
.
جماعتیله دولیدی او مسجد کوفه
مهاجر ایتمیشدی اعتکاف جابرجا
.
اوزینی مُعتكفه ایلمیشدی قُطّامه
او آدیله اودا ایتمیشدی خیمه سین برپا
.
اونيله واریدی هم خیمه اوچ کیشی او گیجه
على قتالينه حاضر هر اوچ ولدّ زنا (1)
.
قلنجی هر اوچی سیراب زهر ایتمیشدی
خیال قتل شه دینينه او اوچ ادنا
.
او بی حیا هر اوچون بو ایشه ایدوب وادار
او سوزده ویر یشیدی وعدۂ وصال اولارا
.
بیریسیده اولارین ظالم ابن ملجمیدی
علاقه مندیدی قطّاميه او بی پروا
.
على قتالينه بئل باغلادی بویاندا بولار
اویان طرفدن ایویندن چیخوب ولیّ خدا
.
كمال سرعتیله مسجده روان اولدی
امیر ملک عرب شیر حق جل وعلا
.
او مقتدا يتيشوب اولدی مسجده داخل
گیچوب او وقتده محرابه ملجأ الضُّعفا
.
دولاندیروب یوزینی سمت قبلیه شه دین
نماز نافلۀ صبحی باشلادی مولا
.
گوتوردی پرده نی ستار لم يزل او زمان
به حکم خالق اکبر آچیلدی باب سما
.
ملائکه اولونوب صادر امر ربانی
گورون ایدر نجه محبوبه جان حبیبی فدا
.
ابوتراب قريان حالده ترابه جبین
علی بوزینه او دمده آچیلدی باب قضا
.
او شاه بی بدلی ابن ملجم ایتدی کمین
او زهرلی قلجين أنديروب او شوم دغا
.
دیسم غلط دگی فرق پیمبره دگدی
دگنده تیغ جفا مرتضا علی باشینا
.
اوتوردی فرقينه شمشیر آخدی آلقانی
اولوبدی قانیله سرشار دیده شهلا
.
او آق محاسینی آلقانیله خضاب اولدی
کمال ضعفيله محرابه دوشدی میر هدا
.
بویادی صفحه محرابی قرمزی قانی
ترابده هامی احکام دینی یازدی اما
.
پیمبر ایتدی نوا باشين آچدی جنتده
هواده شیونیله جبرئيل ووردی ندا
.
دیدی که قانه بوياندی علی نماز اوسته
تمام کوفه نی دولدوردی بو أسفلی صلا
.
ایشیتدی کوفه نین اهلی صدای جبریلی
توكولدی دیشره هامی دلده بانگ واویلا
.
بیوک کچیک کیشی عورت جوان و پیر او دم
قویوبلا مسجده يوز داده شیون و غوغا
.
✔️ امام حسن و امام حسین در بالین پدر
.
یازالا قالمادی ایولرده بیرجه پرده نشین
ولیک چیخمادی دیشره او زینب کبرا
.
خانمدا حالی اولوب ایستدی چیخا ایودن
چیخانمادی او حیاکانی مانع اولدی حیا
.
دیار کوفه ده قرخ مین او گون قوشون واریدی
جهاده حاضریدی دین يولوندا بی پروا
.
اولاردا اولدیلا حالی همین او واقعه دن
توكولديلر قلج اللرده دلده وااسفا
.
سپهرین آلتی دولوب صوت واعليادن
گوروندی کوفه ده شور قیامت کبرا
.
دوتوبلا حیدرین اطرافین حیدر اولادی
گلوبله شیونه گوز یاشلی دلده واغوثا
.
دیز اوسته آلدی یارالی باشین امام حسن
توکوب سرشک بصر اول شهید زهر جفا
.
بویاندا شیون ایدردی حسین تشنه جگر
ترکردی گوز یاشی بیر یاندا تشنه لب سقّا
.
#گریز به #اکبریه_شهادت
.
او زخم کینه ایاقدان علينی سالمیشدی
یوخیدی قدرتی اوز دودمانینه گیده تا
.
قویوبلا پیکرینی بیر کليمه انصاری
کمال عزتيله احترام اولوندی اونا
.
یارالی حمل اولونوب دودمان شاهه طرف
یاخونلاشاندا بویوردی او سرور بطحا
.
قویون پیاده گیدوم دودمانیمه من اوزوم
مباد بیله گوروب زینبیم منی قورخا
.
علی یارالی بو یرده کلیمه چولقالانور
سليلى نعشینه بیر یرده ده بوروندی عبا
.
بونون فقط باشینین بیر قلج يری واریدی
اونون وجودی سراسر يارائیدی اما
.
حسین هر ایکیسین حمل ایدنده حاضریدی
دیردی بوردا بابام وای او برده واولدا
.
گلوب اوغول باشی اوسته او شاه دریادل
گوروب جوانینی صد پاره دوغريرب اعدا
.
یارالی باشینی گوتدی آلوب دیزی اوسته
اورگی درده گلوب باندی سیدالشهدا
.
کمال رأفتیله اکبرینی دیندیردی
بیر اوزگه حاله دوشوب گوردی مظهر طاها
.
اورک باشینا باسوب مهريله جوان بالاسین
قویوب دوباره یره تاجدار کرب و بلا
.
دوشندی اکبرینین نعش پاره پاره سينه
گینه سوومادی قلب شريف شاه ولا
.
قویوب اوغول یوزینه اوز یوزین امام غریب
او آغ محاسنینی لاله تک بوبادی دما
.
اوغوشدوروب اورگین توکدی اشگ حسرتینی
بوحالتيله دیدی دور اياقه یاتما بالا
.
على نه خوش بزیوب قان بو جسم زیبانی
یارالارون باش آچوب مثل لاله حمرا
.
ایاقه دور آپاروم خيميه باجون گوزلر
سکینه چرخ نگراندور تیکوبدی گوز يولوا
.
سنون جوان ئولومون ای جوان قوجاتدی منی
عجب محلّده سالدی منی کمنده قضا
.
نقدر سسلدی سس گلمدی اولوب مأيوس
پوزولدی حالی اوغولدان الينى اوزدی آتا
.
خیال ایدوب که ایده نعشی حمل قتلایه
گوروب ایله داغيلوب گلمورى اله اعضا
.
او پاره پاره اولان پیکری عبايه يغوب
ووروب او دمده جوانان هاشمیه ندا
.
گلون گلون گوتورون نوجوانیمین نعشين
جوانی می گورورم روحیمه اولور ایذا
.
بو تیره توپراقا آخديقجا اکبرین قانی
همان او قانه بوقلب ملول دور مجرا
.
بالام حیاتیمه باعث دیزیمده قوّتدور
گوزومده نوردی بو قلبیمه منیم یارا
.
بو ماه طلعتی کیم دوغريوبله بندیه بند
بر روح دور من نالانه من بدن آرا
.
✔️ حمل جنازۀ حضرت علی اکبر
.
او دم که ئولدی بالام گوئيا اوزوم ئولدوم
من ایستیم داخی بوندان صورا حیات حاشا
.
یامان اولار بیلر عالم جوان اوغول داغی
خصوص بیله جوان حسنی گل قدی رعنا
.
باجیسی شیونیله خيمه ده یولون گوزلر
گوزین تیکوبدی یولا اشکبار و زار و فگار
.
خلاصه گوتدی جوانلار على جنازه سینی
دوشندی خیمه قباقینده تا او فرش عزا
.
عبادن آچدیلار اول پاره پاره گل بدنی
توكولدی دیشره خیَمدن تمام آل عبا
.
توکردی عارضه اشگ زلال عمه لری
يولوب ساچین باجیلاری ایدردی شور و نوا
.
قیامت ایتدی او نعش اوسته آل پیغمبر
او وادی غمی دولدوردی بانگ واویلا
.
قوتار بو مطلبی #تائب بیر اوزگه مطلبه گئچ
بیر اوزگه طرزيله حیدر غمین ایله انشا
.
✔️ ادامه شهادت حضرت علی
.
او گون که شیر حقين دگدی زخم کین باشینا
باشینی یاره لدی آخدى قانی گوز قاشينا
.
یتورديلر ائوینه رکن دین و ایمانی
قلج یریندن آخاردی سو تک قزلقانی
.
تصور ایله نه حاله قالار مخدّره لر
او حالتيله او رکن شریعتی گوره لر
.
او شمع دینه اولوب اهل بیت پروانه
گلوبله ناليه هر تک تکی یانایانه
.
گورنده باشدان اولوب شير لم يزل مسموم
یاخاسین ایلدی پاره یانوب خانم کلثوم
.
گورنده قان ایلیوب مرتضا یوزینی خَضَب
ال آتدى ساچلارینا شوریله خانم زینب
.
على او قوّت قلبیله تاب ایدئمزدی
نجه یارائیدی بیلمم او شه دوزنمزدی
.
يارا الیندن ایله اختيارين آلمیشدی
ایاقدان اول شه اسلامی یاره سالمیشدی
.
سزیلداشاردی یارا پیچ و تاب ایدردی علی
ایدردی ضعف اوزیندن گھی گیدردی علی
.
سالاردى یاره سینه مرهم اقرباسی اونون
ولیک شدت ایدوب دمبدم یاراسی اونون
.
قالاردی شیر خدا هر دقیقه بير حاله
باخوب یاناردی حرم لر او غملی احواله
.
دؤزوب علی ایکی گوندوز او سوز و سازيله
بولنمورم نجه صبر ایتدی اول گدازیله
.
دولاندی اولدی شب بیست یکم رمضان
یاناردی زخمی سزیلداردی حجت یزدان
.
امامده گورونوب ارتحال احوالی
بنات طاهره نی پوزدی مرتضی حالی
.
امامدن یاخون اولدى ال اوزسون آل امام
ایدوب حرم لری مأیوس وضع حال امام
.
چالیشدیلار نقدر ليک اولمادی چاره
ایدوبدی شدت امامین باشیندا کی یاره
.
✔️ عزم حسنین بدنبال جراح
.
همین او حالده اولادی بیله بیلدی صلاح
علی طبابتينه بیر نفر گله جراح
.
چیخوبلا ایودن حسین و حسن بو فکرتیله
گیدردیلر بولی چوخ منتهای سرعتیله
.
بتول گل لری دوشموشدی بسکه تشویشه
اوز اوزلرینه او يولدا ایدردی اندیشه
.
دیردی بیربیرینه بوی درد و غم گلوری
نولوبدی گوزلره بی اختیار نَم گلوری
.
گھی دوتوب گویه یوز کشف ائدردیلر مطلب
دیردیلر کی یتیم ایلمه بیزی یارب
.
پناهیمیز آتامیزدان صورا بیزیم یوخدور
گواهسن بابامیزا علاقه میز چوخدور
.
بابامیز اولماسا گولمز داخی بیزیم یوزمیز
يقين ليلۀ مظلم اولار بو گوندوزیمیز
.
یتیم لر یوزی بو آشکار دور گولمز
بیلر یتیم بواحوالی اوزگه سی بیلمز
.
✔️ جراح در بالين حضرت علی
.
طبابت اولماقا اول راه حق مصباحی
گتوردیلر اورا نعمان آدینلی جراحی
.
او مرد پاک علی باشی اوسته تا یتدی
کمال دقتیله بیر معاینه ایتدی
.
یارالی باشدا یارایه دوشوب اونون نظری
دیدی گیدون گتورون ایمدی بیر قویون جگری
.
گتوردیلر آیروب بیر دامار او آزاده
قلج ياراسينا فوراً سالوب او اثناده
.
نه گوردی یاره ده بیلمم که گوزلری دولدی
پوزولدی حالی او دم رنگ عارضی سولدی
.
یوزینه دقّتيله شیر داورین باخدی
چکوب بیر آه يوزه اشگ حسرتی آخدي
.
دیدی بو باشدا که بیله اساس غم تورو لوب
بیله نشان ویروری زهرلی قلج وورلوب
.
اولونسا مین نفره بو یارا اگر تقسیم
او یاره ئیله ایده للر تمامی جان تسلیم
.
✔️اهل بیت در دور بستر حضرت علی
.
همین او جمله ده آندیردی یعنی پوخ چاره
علينی ئولدوره جاقدور باشینداکی یاره
.
دوتوب دوباره یوزین شاه دینه گلدی دله
یغ اهل بیتیوی باشه آقا وصیت ایله
.
بو حالتوندن آقا بیله که گلور نظره
بوگیجه آخر عمریندی چخماسان سحره
.
یقیندور اولاجاقسان حیاتدن عاری
يغ عترتون باشوا بیر دویونجاگور باری
.
دیوب بو سوزلری اشگ ترین روان ایتدی
علی ایوینی او جراح ترک ایدوب گیتدی
.
علی ایوینه هوا بارش اَلم اَله دی
یغیشدی عترتی شیر خدانی دوره لدى
.
نه نوع گور پوزولار اهل بیتین احوالي
گورنده شیرخداده او پراسف حالی
.
گوروب او حالی گوزین دولدوروب امام حسین
یتیم قالماقا آماده اولدیلار حسنین
.
پوزولدی حالی توکوب گوز یاشین خانم کلثوم
او غوشدوروب اورگین سینه دن اولوب مغموم
.
او اهل بيته اولوب کشف تا همان مطلب
یانوب اوركدن ایتیردی اوزین خانم زینب
.
دولاندی زینب زهرا مثالين احوالی
بوزینده اولدی هویدا يتيمه ليق حالی
.
غرض ولی خدا باشه یغدی عترتینی
او ضعف حالتيله باشلادی وصیتی نی
.
دولاندیروب یوزینی مجتبایه میر هدا
بویوردی قاتليمه ویر میون فشار ابدا
.
اگرچه عاطفه دن بو شقی اوزاقدی اوغول
نه اولسادا ائویمیزده بیزه قوناقدی اوغول
.
تهیه ایتسوز او غول مندن اوتری هرنه غذا
ویرون مضایقه سیز، سیز همین غذادن اونا
.
نجات ویرسه منه حیّ قادر و ذوالمن
بوقاتلیله اوزوم ایلرم معامله من
.
منیم بر دردیمه هر گاه اولماسا چاره
گر ئولدوره منی باشیمده کی اولان یاره
.
ووروبدی چون باشیما بیر قلج بو شوم شرير
سن آل قصاصیمی ویر بو لعينه بیر شمشیر
.
تمام عترتینی صبره امر ایدوب اول شاه
ایدردی حسرتیله اهلبیت دینه نگاه
.
✔️ وصیت به امام حسین وقمربنی هاشم
.
سالوب نظر او زماندا او سرور حرمین
بیر اوزگه حالیله گوردی دوروب امام حسین
.
بیر آیری سمته باخاندا گوروب او اشجع ناس
دوروبدى اللری قوینوندا باوفا عباس
.
چاغیردی هر ایکیسین شاه دین مقابلينه
گتوردی قویدی ابوالفضل الين حسين الينه
.
بویوردی بیرجه تمنا واریمدی سیزدن اوغول
ئولونجه اوزمیون ال سیز بیری بیریزدن اوغول
.
دؤزون دوام ایدون هر درد و هر بلائیله
ضروردور سیزه انسیت ابتلائیله
.
همیشه بیربیریزه جان دیون ایشیدون جان
بیری بیریزدن اوغول آیری دوشميون بیر آن
.
مقدّراتوزه هر نوع حق مشیتی وار
تمامی سینده قزیم زینبینده شرکتی وار
.
حمایت ایلیه سیز دینه سیز شهادتيله
سيزيله شرکت ایدر زینبیم اسارتيله
.
بو کوفه کیم منه حرمت ایده لَّه خلق عرب
اسیر اولوب گله جاقدور بورا قزيم زينب
.
بو رمزيله دیدی باشدا بلا واروزدی سیزون
که یعنی ماوقع کربلا واروزدی سیزون
.
سپرده بیربیرینه ایتدی احتضارینده
نتيجه ویردی بو سوز کربلا دیارینده
.
او گون که قالدی سوسوز خیمه لرده آل عبا
حسينه ویردی وفاسين نشان سوسوز سقّا
.
بو نکته نی قلمون ایتمه يازماقا ترغیب
على مصائبینی ایله #تائبا تعقيب
.
✔️ مشایعت حضرت زینب ازجنازه پدر
.
او گون که ایتدی بو دنیانی ترک شیر خدا
قراگیندی باتوب یاسه عترت طاها
.
علی ایویندن اوجالدی سمایه ناله و آه
قاریشدی بیر بیرینه عترت رسول الله
.
مخدّرات حرم اوزگه حالته قالدى
شه ولايتين اطرافین اهل بیت آلدى
.
گلردی نالیه شوريله زینب مظلوم
وراردی باشینه آغلاردی بینواکلثوم
.
دیردیلر بیزی بو روزگار عجب سیخدی
آلوب بابا میزی الدن ایویمیزی یخدی
.
ایدردیلر هره بیر یاندا داد و شیون و شین
توکردی گوز یاشی آغلاردی شوريله حسنین
.
بویون چیگینده دوروب حال یأسیله عباس
توکردی دیده سی رخساره سودۂ الماس
.
جناب زینب او دم اوزگه حالته قالدى
باشا ووروب آتا تابوتینی بولا سالدى
.
✔️امام حسن دربالین مریض درخرابه
.
شه ولایت ایوی داد و آهیله دولدی
جنازه سی گوتورولدی نجفده دفن اولدی
.
او دم که تاپشورولوب توپراقا شه کونین
کمال حُزنيله اوردان قیتديلر حسنین
.
يول اوسته يتديله ویرانه بیر بره ناگاه
نه گوردیلر که گلور صوت ناله جانکاه
.
زبس اولاردان ایله ناله اختیار آلدى
همان خرابیه فورا اولار گذر سالدى
.
نه گوردیلر که یاتوب اوردا بیرجه پیر ضعیف
زبس سیخوب مرض اندازه سیز اولوبدی نحیف
.
ولیک یوخدی یانیندا اونون مواظب اولان
ایدن دواسینی حاضر اونا مراقب اولان
.
او پیرمرد دن ایتدی سئوال امام حسن
گتور بیانه گوروم ای مریض سن کیمسن
.
بو شدت مرضیله مراقبون کیمدی
گلور عیادتوه کیم مواظبون کیمدی
.
✔️ پیرمرد مریض و امام حسین درخرابه
.
نیه بو حالتيله بوردا ياتموسان آیا
مریض سن سنه کیملر ویرور طعام و دوا
.
شکسته دل قوجا تاگوردی بیله بير رأفت
گلوب دله بو مقالاتیله ایدوب صحبت
.
اوزوم قبیله سیزم ناخوشام غریبم من
منیم دوا ویره نیم یوخدی بی طبیبم من
.
منه مکاندی بو ویرانه یر نه مدّتدور
سزیلتی هم نفسیمدور انیس محنتدور
.
مرض سیخوب اَریوبدور بو نوعيله بدنیم
نه بیر دوا ویره نیم واردی نه گلوب گیده نیم
.
یاناردی بیر نفر آقا بو ضعف حالتيمه
گلردی لطفیله دائم منیم عیادتیمه
.
منه نوازش ایدردی کمال رأفتیله
اولاردی حاليمه جویا منیم عطوفتیله
.
اولاندا بو یره وارد او مرد پاک و سلیم
ایدردی بو در و دیوار او سروره تعظيم
.
#خرابه_شام
.
ولیک گلمیوب او چ گوندى اول حميده شعار
نه یوز ويروبدی اونا بیلمورم باشیندانه وار
.
حسن بويوردی او سیز امّتين امامیزدی
قتيل ايدوبله ستمله بیزیم آتامیزیدی
.
او پیر آغلادی عرض ایلدی منی گوتورون
مزاری اوستونه باری او سرورين يتورون
.
علی مزارینه تا سالدی مجتبای حلیم
دیولله ایتدي على قبری اوسته جان تسلیم
.
بويرده یاعلی یاندون او پیر حالتينه
خرابه ده بالاوین گلمدون عیادتینه
.
گوریدون اوردا سنون قزلارون نه حاله قالوب
رقیه رنگی غم و غصه دن سولوب سارالوب
.
يتیشدی بیر یره سوز سیندی خامۀ #تائب
مداد اشگیله ایسلاندی نامۀ #تائب
.
حسین آدین ایلیوبدور الينده دست آویز
اونا شفاعت ایدر جدی روز رستاخیز
.
ــــــــــــ
(1) حضرت امام باقر در مجلس یزید فرمود : انبیا و امام را نمی کشد مگر ولدالزّنا
.
.
.
#حیدریه_شهادت
#حیدریه_مدح
#علی_محبتی_قلبیمده_تاپموش_استیلا
#ترکی
.
✍️ #زبدةالاشعار ✍️
.
🆔: @nohe_torki
نظر دهید