قیام زینبیه (س)
.
زبدة الاشعار
.
: @nohe_torki
.
#علومی_تبریزی
.
سالان تزلزله کون و مکانی زینبدی
علی سلاله سی زهرا نشانی زینبدی
.
آلان آتاسی علیدن آناسی زهرادن
فنون عصمتی ، درس حیانی زینبدی
.
حجاب درسی ویرن بانوان اسلامه
کواکب شرفین آسمانی زینبدی
.
او که پیمبر الیندن گیوب لباس عزا
سالان طلاطمه قلب جهانی زینبدی
.
آناسینین قاپوسی اودلاناندا ظلمیله
هرایینه چاغیران مرتضانی زینبدی
.
او نصف شب آنا تابوتینی سالاندا یولا
او که باش آچدی اوجاتدی فغانی زینبدی
.
علی باشی یارالاندی سحر نماز اوسته
او عورتی که بُلوب ماجرانی زینبدی
.
حیاسی مانعیدی مسجده گئده او خانم
او گونده باغلیا ن آخر یارانی زینبدی
.
اولاندا زهر جفائیله مجتبی مسموم
ازلده درک ائلین مجتبانی زینبدی
.
دوشنده زورق دین کربلاده طوفانه
محیط امنه چکن ناخدانی زینبدی
.
حسین گلشن آل پیمبرین گلیدی
هامی بلور او گولین باغبانی زینبدی
.
غلط دگل که دیم زنده ساخلیان تا حشر
جهاندا واقعۀ کربلانی زینبدی
.
بلا چولونده او آموزگار حریت
عزیز فاطمه نون دلستانی زینبدی
.
مگر قویاردی حسینین پوزولسون احوالی
سیلن گوزیندن او اشک روانی زینبدی
.
حسین دانشمادی اکبر گئدنده میدانه
دانشدوران اونی تنده روانی زینبدی
.
حسینه چوخ چتین اولدی جوان اوغول ئولومی
گوروب شریک غم بیکرانی زینبدی
.
دوشنده پرچم الیندن رشید علمدارین
اوجالدان عالمه قانلی لوانی زینبدی
.
گینده اگنینه بیر کهنه پیرهن شه دین
سالان خیالینه خیر النسانی زینبدی
.
حسین شهادته یتدی تالاندی خیمه لری
او طایری که یانوب آشیانی زینبدی
.
خطا الی نجه دامان عصمته یتیشر
حرم محترمین پاسبانی زینبدی
.
یازان صحیفۀ تاریخه کربلا آدینی
ائدن قیامیله روشن جهانی زینبدی
.
حسین شهادتینی شوقیله ایدن تکمیل
بلوندورن هامویا ماجرانی زینبدی
.
سالان طلاطمه ابن زیاد مجلسینی
ووران بیری بیره پیر و جوانی زینبدی
.
زیادین اوغلی هجوم ائتدی ئولدوره خانیمی
نه گوردی نطقیده شیر خدانی زینبدی
.
بویوردی بیر بیله بالیدلنمه لشگریوه
حسینیدن صورا حق جانفشانی زینبدی
.
حسین ئولوب بیله شاد اولما ئولمیوب زینب
آلان زمانه ده سندن او قانی زینبدی
.
دونوب حسین باشینا باخدی بیر سلام ایله دی
دیدی یارالی ، بلا میزبانی زینبدی
.
اگرچه یاره لرین باغلیانمادیم عفو ائت
گور ایمدی قیزلاروین نوحه خوانی زینبدی
.
کسوبدی شمر اگر باشیوی نماز اوسته
سالان نظامه نماز و دعانی زینبدی
.
علی قیزی دَگُلَم یخماسام یزیدین ایوین
دیار شامه چکن کاروانی زینبدی
.
او قافله دولانوب شامیده مکان تاپدی
ایدن نشیمن او ویرانسرانی زینبدی
.
یزید مجلسینی مجلس عزا ایلدی
مرتب ایلین اوردا عزانی زینبدی
.
حسین حسین دیوب آخر یخوب یزید ائوینی
یخان خطابیله محکم بنانی زینبدی
.
یزید دوردی سوروشدی بو شیره زن کیمدی
جواب ویردیله زهرا نشانی زینبدی
.
دئدی اوزوم تانیدوم مرتضی علی قیزیدی
دیون بلا چولونون قهرمانی زینبدی
.
منیم ریاستیمه عاقبت سالان رخنه
یخان جهاندا بو عزت سرانی زینبدی
.
بیر عده قاره گینلر یزیدی خوار ایتدی
چکن او شهره همان کاروانی زینبدی
.
گرک صحیفۀ تاریخه ثبت اولا بو سوز
یازان اورکلره بو داستانی زینبدی
.
دیار شامیده مسجدده منبره چیخادان
مقام صاحبی زین العبانی زینبدی
.
اولان دوباره حسینین مزارینه زوار
چکن جمالینه خاک شفانی زینبدی
.
«علومی» زینبین آدین صحیفۀ دله یاز
بو سوزلرین بُلوسن یازدیرانی زینبدی
.
ندور بو خدمته قیمت ئولن زمان بله سن
ذخیره دور سنه سندن آلانی زینبدی
.
#زینبیه_مدح
#سالان_تزلزله_کون_و_مکانی_زینبدی
#ترکی
.
#زبدةالاشعار
.
: @nohe_torki
نظر دهید